මාධ්‍යවේදීන්ගේ වෘත්තීය තත්ත්වය පිළබ‍ඳ ගවේෂන වාර්‍තාව හා විඩියෝපට පිරිනැමීම!

ජනමාධ්‍යවේදීන්ගේ ජාත්‍යන්තර සම්මේලනයේ (International Federation of Journalists-IFJ) මග පෙන්වීම හා සහයෝගය ඇතුව IFJ-Union to Union (UTU) Global Union වැඩසටහන යටතේ, මාධ්‍ය සේවක වෘත්තිය සමිති සම්මේලනය විසින් මාධ්‍යවේදීන්, මාධ්‍යවේදීන්ගේ වෘත්තීය තත්ත්වය හා ජනමාධ්‍ය කර්‍මාන්තය මුහුණදෙන අභියෝග පිළිබඳව සුවිශේෂී ගවේෂණයක යෙදෙමින් සකස්කරණ ලද සමීක්ෂණ වාර්‍තාව හා මාධ්‍යවේදින්ගේ වෘත්තීමය ගැටළු පිළිබඳව දැක්වෙන විඩියෝ පට 16 ක් ඇතුලත් ඩී.වී.ඩී. පටය, යාපනය දිස්ත්‍රික් මාධ්‍යවේදි, කේ. සෙල්වකුමාර් මහතා විසින් කම්කරු හා විදේශ රැකියා අමාත්‍ය මනුෂ නානායක්කාර මහතාට කම්කරු අමාත්‍යාංශයේදි පිරිනමන ලදී.

එම අවස්ථාවට කම්කරු අමාත්‍යාංශයේ ලේකම්, ආර් පී. ඒ. විමලවීර, කම්කරු කොමසාරිස් ජෙනරාල් නීතිඥ ප්‍රභාත් චන්ද්‍රකීර්ති, මාධ්‍ය සේවක වෘත්තීය සමිති සම්මේලනයේ ප්‍රධාන ලේකම්, ධර්මසිරි ලංකාපේලි, එහි ජාතික සංවිධායක ඩග්ලස් නානායක්කාර ඇතුළු මාධ්‍ය සේවක වෘත්තීය සමිති සම්මේලනයේ දිස්ත්‍රික් නායකයන් විශාල පිරිසක් සහභාගි විය.

මෙහිදි මාධ්‍යවේදීන් අමතමින් කම්කරු අමාත්‍ය මනුෂ නානායක්කාර මහතා ප්‍රකාශ කළේ, කෑලි ක්‍රමයට සේවය කළත් කොන්ත්‍රාත් ක්‍රමයට සේවය කළත් නිදහස් මාධ්‍යවේදී ක්‍රමයට සේවය කළත්, ඒ සියලු‍ දෙනාගේම වෘත්තීය සුරක්ෂිත භාවය ආරක්ෂා කිරීම ප්‍රතිපත්තියක් ලෙස කළ යුතු බවයි. කම්කරු අමාත්‍යාංශය ලෙස තමන් බැදි සිටින්නේ එලෙස සේවය කිරීමට බවත්, පාර්ලිමේන්තුවේදී අයවැය කතාව ඉදිරිපත් කරමින් ජනාධිපතිවරයා ද කොන්ත්‍රාත් සහ අර්ධකාලීන රැකියා කරන අයවලුන් ඇතුළත් වන පරිදි කම්කරු නීති සම්පාදනය කිරීමේ අවශ්‍යතාව සම්බන්ධයෙන් විශේෂ අවධානයක් යොමු කළ බව සිහිපත් කළේය.

කම්කරු නීති සම්පාදනයේ දී පෙර මෙන් මාස අවුරුදු ගණන් ප්‍රමාද කිරීමට තමන් බලාපොරොත්තු නොවන බවත්, කම්කරුවාත් ව්‍යවසායකයාත් ආරක්ෂා වන පරිදි ඉතාම කඩිනමින් අවශ්‍ය නීති රීති සම්පාදනය කිරීමට පියවර ගන්නා බවත් ප්‍රකාශ කළ ඔහු මාධ්‍යවේදීන් අමතමින් වැඩි දුරටත් සදහන් කළේ මෙම නව නීති සම්පාදනයේදී මාධ්‍යවේදීන්ගේ වෘත්තීය සුරක්ෂිතභාවය ආරක්ෂා කිරීමටත්, 2023 වර්ෂය අවසන් වීමට පෙර එම කටයුතු අවසන් කිරීමටත් තමන් බලාපොරොත්තු වන බවයි.

මෙම අවස්ථාවට මාධ්‍ය සේවක වෘත්තීය සමිති සම්මේලනයේ විධායක සභා නිළධාරීන් හා සියලුම මාධ්‍යවේදීන් නියෝජනය කරමින් දිස්ත්‍රික් නායකයින් ගණනාවක් සහභාගි වු අතර අදාල සමීක්ෂණ වාර්තාව හා වීඩියෝ පට ඇතුලත් ඩී.වී.ඩී. පට කම්කරු අමාත්‍යාංශයේ ලේකම්වරයාට හා කම්කරු කොමසාරිස් වරයාට වෙතද ඔවුන් විසින් භාරදෙනු ලැබිය.

ශ්‍රී ලංකාවේ මාධ්‍යවේදීන්ගේ වෘත්තීය තත්ත්වය පිළිබඳ ගවේෂණ වාර්‍තාව – 2022

මාධ්‍ය නිවේදනය
2022 නොවැම්බර් 26

ශ්‍රී ලංකාවේ මාධ්‍යවේදීන්ගේ වෘත්තීය තත්ත්වය පිළිබඳ ගවේෂණ වාර්‍තාව – 2022

ජනමාධ්‍යවේදීන්ගේ ජාත්‍යන්තර සම්මේලනයේ (International Federation of Journalists-IFJ) මග පෙන්වීම හා සහයෝගය ඇතුව IFJ-Union to Union (UTU) Global Union වැඩසටහන යටතේ, මාධ්‍ය සේවක වෘත්තිය සමිති සම්මේලනය විසින් මාධ්‍යවේදීන්, මාධ්‍යවේදීන්ගේ වෘත්තීය තත්ත්වය හා ජනමාධ්‍ය කර්‍මාන්තය මුහුණදෙන අභියොග පිළිබඳව සුවිශේෂී ගවේෂණයක යෙදෙමින් වාර්‍තාවක් සම්පාදනය කරනු ලැබ ඇත. විශේෂයෙන් තරුණ පිරිස් මාධ්‍ය කර්‍මාන්තයට ප්‍රවේශ නොවීම හා තරුණ මාධ්‍යවේදීන් මාධ්‍ය සංවිධාන නායකත්වයට යොමු කිරීම මෙම වැඩසටහනේ ප්‍රධාන අරමුණක් විය.

ඒ සඳහා මුලිකව සකස් කරන ලද ප්‍රශ්නාවලියක් මාර්‍ගගත ගූගල් අයදුම් පත්‍රයක් ලෙස යොමුකොට මාධ්‍යවේදීන්ගේ දත්ත එක් රැස්කර ගනු ලැබීය. මාධ්‍යවේදීන්ගේ ස්ත්‍රී පුරුෂ භාවයේ සිට සෑම තොරතුරක්ම වෙන් වෙන්ව හඳුණාගැනීම හා ඔවුන් විඳින වෘත්තීමය පීඩාවන් පිළිබඳව හා ශ්‍රී ලංකාවේ මාධ්‍ය කර්‍මාන්තය අභියෝග හඳුණා ගැනීමේ අවකාශයක් විවරකර ගැනීම මෙම ගවේෂණයේ මුලික අපේක්ෂාව විය.

එම වාර්‍තාව සැකසීම සඳහා ශ්‍රී ලංකාවම ආවරණය වන පරිදි විද්‍යුත් හා මුද්‍රිත කේෂේත්‍රයේ 300 කට අධික, ප්‍රධාන දහරාවේ සහ ප්‍රාදේශීය වශයෙන් සිංහල, දෙමළ හා ඉංග්‍රීසි භාෂා මාධ්‍ය වෘත්තිකයන් පිරිසක් සහභාගී කරවා ඇත.

මේ ගවේශණය හා සම්බන්ධ වෙමින් තරුණ මාධ්‍යවේදීන් විශේෂ පුහුණුවකින් පසු මාධ්‍ය කර්‍මාන්තය හා ජනමාධ්‍යවේදීන්ගේ වෘත්තීය ප්‍රශ්ණ පිළිබඳව සිංහළ, දෙමළ හා ඉංග්‍රීසි භාෂාත්‍රයෙන් සැකසූ වීඩියෝපට 15ක් ද නිෂ්පාදනය කර ප්‍රකාශයට පත්කොට තිබේ.

සම්පූර්‍ණ වාර්‍තාව, වීඩියෝ පට 15, සමීක්ෂණයට සහභාගීවූ පිරිස් පිළබඳ සම්පූර්‍ණ විස්තර සටහන් https://fmetu.org/?page_id=9839 අප වෙබ් අඩවියේ ප්‍රකාශයට පත්කර තිබේ.

එම සමීක්ෂණයෙන් මාධ්‍යවේදීන් හා මාධ්‍ය කර්‍මාන්තය සම්බන්ධ සුවිශේෂි කරුණු රාශියක් හෙළදරව්කර ගැනීමට හැකියාව ලැබි ඇත.

එම සමීක්ෂණ වාර්‍තාවට අනුව ශ්‍රී ලංකාවේ මාධ්‍ය ආයතනයන්හි සේවය කරනු ලබන මාධ්‍යවේදීන්ගෙන් 59% කට නියමිත දිනක වැටුප් නොලැබෙන බව හෙළිදරව් වී තිබේ. එම මාධ්‍යවේදීන් අතරින් 91% පමණ ප්‍රතිශතයකට කිසිදු විශේෂ දීමනාවක් හිමි නොවන බවත්, හෙළිදරව් වී ඇති අතර ඔවුන්ට ලැබෙන වර්‍තමාන වේතනය මාධ්‍යවේදීන්ගේ වෘත්තිය සුදුසුකම් සඳහා ප්‍රමාණවත් නොවන බව 92% ක පිරිසක් පවසා ඇත.

මේ වන විට මාධ්‍ය ක්ෂේත්‍රයේ සේවය කරන මාධ්‍යවේදීන්ගෙන් වයස අවුරුදු 35 ට අඩු අය පිරිස ඇත්තේ 26% ක පමණ ප්‍රතිශතයකි. වයස අවුරුදු 35 ත් 45 ත් අතර 31% පමණ ප්‍රමාණයක් ද, වයස අවුරුදු 45 ත් 55 ත් අතර 25% ක ප්‍රමාණයක් ද, සේවය කරන අතර, මේ වන විට වයස අවුරුදු 55 ද ඉක්මවා මාධ්‍ය ක්ෂේත්‍රය තුළ සේවක කරන පිරිස 16% කි.

මෙම මාධ්‍යවේදීන් වැඩිම කොටසක් අ. පො. ස. උසස් පෙළ හැදෑරුවන් වේ. එය ප්‍රතිශතයක් ලෙස ගතහොත්, 36% කි. එමෙන්ම අ. පො. ස. සාමාන්‍ය පෙළ දක්වා අධ්‍යාපනය හදා ඇති අය 19% ප්‍රමාණයක් ක්ෂේත්‍රයේ කටයුතු කරන අතර, ඩිප්ලෝමා ලාභින් 28% ප්‍රතිශතයක්ද, උපාධිධාරින් 9% ක පමණ ප්‍රතිශතයක්ද ජනමාධ්‍යවේදිනියන්, ජනමාධ්‍යවේදීන් ලෙස මාධ්‍ය කර්‍මාන්තයේ නිරත වේ.

මෙම වාර්‍තාවට අනුව සිංහළ භාෂා මාධ්‍යයෙන් 65.2% ද, දමිළ මාධ්‍යයෙන් 34.3% ද, ඉංග්‍රීසි මාධ්‍යයෙන් 10.5% මාධ්‍ය වෘත්තියේ නියැලෙති. මේ අතරින් මුද්‍රිත මාධ්‍ය ක්ෂේත්‍රයේ 53.3ක් ද, රූපවාහිණී ක්ෂේත්‍රෙයේ 47.9% ද, ගුවන්විදුලි සේවාවන්හී 27.8% ද, ඩිජිටල් මාධ්‍යකරණයේ 27.5% ද සේවයේ නිරත වෙති. විශේෂත්වය වනුයේ ඔවුන්ගෙන් 90% ක්ම පුර්ණකාලින මාධ්‍ය වෘත්තියේ නිරත වීමයි. එහෙත් මෙම සමීක්ෂණය මගින් අනාවරණය වී ඇත්තේ ඔවුන්ගෙන් 18% කටම කිසිදු මාධ්‍ය පුහුණුවක් සඳහා අවස්ථාව ලැබි නොමැති බවයි.

මාධ්‍යවේදීන් අතුරින් ස්ථිර සේවයේ පිහිටුවා ඇත්තේ 21% කි. එසේම ඔවුන්ගෙන් ද උසස්වීම් පිළිබද ක්‍රියාපටිපාටියක් හිමිව ඇත්තේ 14% පමණ පිරිසකට පමණි. මාධ්‍යවේදීන්ගෙන් 52% පමණ ප්‍රතිශතයක් සේවය කරනු ලබන්නේ කෑලි ගණනට (peace rate) වන අතර තවත් 26% ක ප්‍රමාණයක් කොන්ත්‍රාත් පදනමින් සේවයේ යෙදෙයි. වන අතර අනිත් 86% ක පමණ ප්‍රමාණයකට කිසිදු උසස්වීම් ක්‍රියා පරිපාටියක් නොමැති බව තහවුරුකර ඇත.

දිවයිනේ මුද්‍රිත, විද්‍යුත් හා ඩිජිටල් මාධ්‍ය ආයතනයන් සඳහා සේවය ලබාදෙන 80% වඩා වැඩි පිරිසකට වාර්ෂික වැටුප් වර්‍ධක, සේවක අර්‍ථසාධක අරමුදලේ‍ ප්‍රතිලාභ, සේවක භාර අරමුදලේ ප්‍රතිලාභ, සේවා පාරිතෝෂික හෝ ප්‍රසාද දීමනා හිමි නොවන බවද මෙම සමීක්ෂණය මගින් හෙළිවී තිබේ.

මෙම වාර්‍තාවට අනුව පත්වීමේ ලිපියක් හිමිව ඇති පිරිස 66.8කි. පත්වීම් ලිපියක් රහිත පිරිස 31.2කි. බොහෝවිට අනුමාන කළ හැක්කේ සේවාව අළුත්කරනු ලබන ලිපිය, මොවුන් පත්වීමේ ලිපිය ලෙස සළකන බවකි. මාධ්‍ය හැදුණුම්පතට හිමිකම් කියන පිරිස 78.2% ක් වන අතර 21.8 ට හැඳුණුම්පතක් හිමිව නැත.

මෙවන් අඩු සැළකිළි යටතේ සේවය කරන අතරම, වෘත්තිමය වශයෙන් තමන් පීඩාවට පත්වූ අවස්ථාවන් සුලභ බව 68% ක පමණ ප්‍රමාණයක් දක්වා තිබේ. මාධ්‍ය වෘත්තිය කරගෙන යාමේදි තමන්ට ප්‍රමාණවත් ආරක්ෂාවක් නොමැති බව දක්වා ඇති මාධ්‍යවේදීන් සංඛ්‍යාව 77% කි. ස්ත්‍රි පුරුෂ සමාජභාවය මත පදනම්ව ප්‍රචන්ඩත්වයට ගොදුරු වූ පිරිස 16.4%කි.

මෙවන් තත්ත්වයක් යටතේ තම සේවා තත්ත්වය උසස් කර ගැනීම සදහා 98% කම අදහස වී ඇත්තේ තමන් සංවිධාන ගත විය යුතු බවකි. එසේම ඒ සඳහා ජාතික හා ජාත්‍යන්තර සහය අවශ්‍ය බව 95% ක්ම පිළිගෙන තිබේ.

මෙම සමීක්ෂණය සඳහා මුද්‍රිත මාධ්‍යයට සම්බන්ධ මාධ්‍යවේදීන් 188 ක් සහභාගි වී ඇති අතර ඔවුන් ප්‍රතිශතයක් ලෙස ගතහොත් 53.3% කි. රූපවාහිනි මාධ්‍යයට සම්බන්ධව සහභාගිවී ඇති මාධ්‍යවේදීන්ගේ ප්‍රතිශතය 47.9% ක් වේ. එම ප්‍රමාණය සංඛ්‍යාත්මතව ගතහොත් 169 කි. මෙම සමීක්ෂණය සදහා ගුවන් විදුලි මාධ්‍යවේදීන් 98 ක්ද, ඩිජිටල් මාධ්‍යවේදීන් 97 ක් ද සම්බන්ධවී ඇති අතර එය ප්‍රතිශතයක් ලෙස ගතහොත් 27.8% ක හා 27.5%ක අගයක් ගනියි.

ලංකාවේ වෘත්තීන් අතර අතිමහත් බහුතරයකට මූලික වෘත්තීය හිමිකම් අහිමි එකම වෘත්තිය ජනමාධ්‍ය වෘත්තිය බව මෙම සමීක්ෂණ වාර්‍තාව මොනවට පැහැදිළි කෙරේ. රටේ හතරවැනි පුරවැසියා, ජාතියේ මුරපල්ලා වැනි විශේෂිත ගෞරව නාමයන්ගෙන් හැඳින්වුවද ඒ සියල්ල කිසිදු වටිනාකමක් නැති ප්‍රලාපයන් සමූහයක් බව මෙම සමීක්ෂණ වාර්තාව මොනවට පැහැදිළි කරණු ලබයි.

2022 සැප්තැම්බර් මාසයේ සම්පූර්‍ණ කළ මෙම සමීක්ෂණ වාර්‍තාව, වෘත්තීමය ගැටළු පිළිබඳ විඩියෝපට 15 නිෂ්පාදනය, සමීක්ෂණය සඳහා තොරතුරු සපයමින් සහය දැක්වූ දිවයින පුරා මාධ්‍යවෙිදිනියන්, මාධ්‍ය සගයන් සැමට, IFJ-Union to Union (UTU) Global Union සම්පූර්‍ණ වැඩ සටහන සාර්‍ථක කිරීමට සහය දුන් සැමට, විශේෂයෙන් ජනමාධ්‍යවේදීන්ගේ ජාත්‍යන්තර සම්මේලනයට (International Federation of Journalists-IFJ) මාධ‍්‍ය සේවක වෘත්තීය සමිති සම්මේලනය සිය ප්‍රසාදය පළකර සිටී.

මෙයට, විශ්වාසී,

                                       

ධර්‍මසිරි ලංකාපේලි
ප්‍රධාන ලේකම්
විධායක සභාව වෙනුවෙන්.

නව මාධ්‍ය සහ ඩිජිටල් ආර්ථිකය තුළ මාධ්‍යවේදීන්ගේ සංවිධාන උපාය මාර්‍ග හඳුණා ගැනීම.

මාධ්‍ය නිවෙිදනය

 

2022 ඔක්තෝබර් 17

නව මාධ්‍ය සහ ඩිජිටල් ආර්ථිකය තුළ මාධ්‍යවේදීන්ගේ සංවිධාන උපාය මාර්‍ග හඳුණා ගැනීම.

ජනමාධ්‍යවේදීන්ගේ ජාත්‍යන්තර සම්මේලනයේ (IFJ) මග පෙන්වීම හා සහයෝගය ඇතිව ශ්‍රී ලංකාවේ ජනමාධ්‍ය කර්‍මාන්තය හා ජනමාධ්‍යවේදීන්ගේ වෘත්තීය අයිතිවාසිකම් නගාසිටුවීම වෙනුවෙන් මාධ්‍ය සේවක වෘත්තීය සමිති සම්මේලනය විසින් වැඩ සටහන් මාලාවක් දියත් කරනු ලැබීය.

තරුණ මාධ්‍යවේදීන්ගේ වෘත්තීය සමිති නායකත්වය හා සමස්ථ මාධ්‍යවේදීන්ගේ වෘත්තීය අයිතිවාසිකම් ජයග්‍රහණය කිරීම පිළිබඳව ජනමාධ්‍යවේදීන්ගේ වෘත්තීය සමිති සම්මේලනයක් ලෙස තමන් මුහුණ දෙන අභියෝග හඳුනාගැනීම හා නව මාධ්‍ය සහ ඩිජිටල් ආර්ථිකය තුළ සංවිධානය වීමට පවතින බාධා සහ උපාය මාර්‍ග හඳුණා ගැනීම වැඩසටහනේ මූලික අරමුණ විය.

ප්‍රධාන වශයෙන් ඩිජිටල් මාධ්‍ය භාවිතාව සමග තරුණ මාධ්‍යවේදීන් අතර සන්නිවේදනය, බඳවා ගැනීම, රඳවා තබා ගැනීම සහ ඔවුන්ගේ විශ්වාසය දිනාගැනීමට අවශ්‍ය නව කුසලතා හඳුණාගැනීම මාධ්‍ය සංවිධානයක ප්‍රධාන වගකීමකි.

මේ සඳහාල ජනමාධ්‍යවේදීන් සංවිධානයවීමේ වැදගත්කම හා ඔවුන්ගේ වෘත්තීමය ගැටළු හඳුණාගැනීම හා විසඳුම් සඳහා මෙතෙක් ගෙන ඇති හා ඉදිරියේ ගතයුතු ක්‍රියාමාර්‍ගයන් පිළිබඳව සිංහළ හා දමිළ මාධ්‍යවේදීන් 200 පමණ පිරිසකගේ සහභාගීත්වයෙන් සාකච්ඡා සභා දෙකක් සංවිධානය කෙරිණි. සිංහල හා දෙමළ මාධ්‍යයෙන් මෙම සාකච්ඡා සභා වෙන් වෙන් වශයෙන් සංවිධානය කළ අතර සිංහළ හා ඉංග්‍රීසි මාධ්‍යවේදීන් 140 ක් පමණද, දමිල මාධ්‍යවේදීන් 60 ක් පමණ සහභාගී කරගන්නට සමත්විය.

මෙහි දෙවන වැඩසටහන වනුයේ, සමීක්ෂණයක් මගින් ශ්‍රී ලංකාව පුරා විසිරී සිටින FMETU සාමාජික මාධ්‍යවේදීන්ගේ වෘත්තීය තත්ත්වය පිළිබඳ ගවේෂණය කිරීම හා එහි තොරතුරු fmetu.org වෙබ් අඩවිය තුළ සිංහල, දෙමළ හා ඉංග්‍රීසි ත්‍රෛභාෂා මාධ්‍යයෙන් ප්‍රකාශයට පත්කිරීම වේ.

සකස් කරන ලද ප්‍රශ්නාවලිය මාර්‍ගගත ගූගල් අයදුම් පත්‍රයක් යොමුකොට මාධ්‍යවේදීන්ගේ දත්ත එක් රැස්කර ගනු ලැබීය. මාධ්‍යවේදීන්ගේ ස්ත්‍රී පුරුෂ භාවයේ සිට සෑම තොරතුරක්ම වෙන් වෙන්ව හඳුණාගැනීම හා ඔවුන් විඳින වෘත්තීමය පීඩාවන් පිළිබඳව හා ශ්‍රී ලංකාවේ මාධ්‍ය කර්‍මාන්තය හඳුණා ගැනීමේ අවකාශයක් විවරකර ගැනීම එහි අපේකෂාව විය.

දැනටමත් 340 පමණ වූ මාධ්‍යවේදීන්ගේ එක්රැස් කරගන්නා ලද තොරතුරු සියල්ල fmetu.org වෙබ් අඩවියේ IFJ-UTU 2022 පිටුවෙන් ඔබට විවෘතකර තිබේ.

තෙවන වැඩසටහන තරුණ මාධ්‍යවේදීන් සඳහා වූ ජංගම මාධ්‍යවේදය (Mobile Journalism) පිළිබඳ පුහුණු පාඨමාලාව විය. ඩිජිටල් යුගයේ ජනමාධ්‍ය වාර්‍තාකරණයේ කුසලතා වලින් පිරුණු තරුණ ජනමාධ්‍යවෙදීන් හඳුන්වා දීම මෙම පුහුණු පාඨමාලාවේ අරමුණ විය. මෙම පුහුණුව සඳහා කාන්තාවන් 30% සහ දෙමළ සහ මුස්ලිම් මාධ්‍යවේදීන් 30% වන පරිදි මාධ්‍යවේදීන් 21 දෙනෙකු අයදුම්පත් කැඳවා තෝරාගන්නා ලදී. එක් දින පාඨමාලාවක් ලෙස පැවැති මෙම පුහුණු වැඩසටහන ඩිජිටල් මාධ්‍ය විශේෂඥ ආචාර්‍ය්‍ය සමීර තිලකවර්‍ධන මහතා විසින් පවත්වනු ලැබීය.

පුහුණුවෙන් පසු ශ්‍රී ලංකාවේ මාධ්‍ය කර්‍මාන්තය හා මාධ්‍යවෙදීන්ගේ වෘත්තීමය තත්වය පිළිබඳ වීඩියෝපට 15 ක් නිෂ්පාදනය කිරීම පුහුණුකරුවන්ගේ එකඟතාවය විය. ඔවුන් විසින් නිෂ්පාදනය කළ වීඩියෝපට 17 ක් fmetu.org වෙබ් අඩවියේ IFJ-UTU 2022 පිටුවේ දැන් ඔබට නැරඹිය හැක.

මෙම වැඩසටහන මගින් සම්පාදනය කළ මාධ්‍යවේදීන්ගේ වෘත්තීය අයිතිවාසිකම් පිළිබඳ සමීක්‍ෂණය හරහා එක්රැස් කරන ලද දත්ත, අද ශ්‍රී ලංකාවේ මාධ්‍යවේදීන් මුහුණ දෙන ප්‍රධාන ගැටළු සහ වෘත්තීය ප්‍රශ්ණ මතු කර ඇත. තරුණ මාධ්‍යවෙදීන් විසින් නිෂ්පාදනය කරන ලද වීඩියෝපට සියල්ලම පාහේ ශ්‍රී ලංකාවේ ජනමාධ්‍යවේදීන් මුහුණ දෙන පීඩාකාරී අවකාශයන් පිළිබඳව සාකච්ඡා කෙරේ.

අවසාන වශයෙන් මෙම දත්තයන් සමූහය මත පදනම් වූ වාර්‍තාවල ශ්‍රී ලංකාවේ මාධ්‍යවේදීන් මුහුණ දෙන වෘත්තීය සහ අයිතිවාසිකම් පදනම් කරගත් ගැටළු කම්කරු ඇමතිවරයා, ජනමාධ්‍ය ඇමතිවරයා සහ රජයේ අදාල බලාධාරීන් වෙත යොමු කරන්නට කටයුතු කරමින් සිටිමු.

මෙම වැදගත් කාර්‍ය්‍යය සඳහා මාධ්‍ය සේවක වෘත්තීය සමිති සම්මේලනය වෙත සංවිධානමය උපදෙස් දෙමින් මග පෙන්වූ IFJ-UTU 2022 වැඩසටහනට හා ජනමාධ්‍යවෙදීන්ගේ ජාත්‍යන්තර සම්මේලනයේ ආසියා ෆැෂිපික් කලාපයේ අධ්‍යක්ෂිකා ජේන් වර්තින්ටන් හා කාර්‍ය්‍ය මණ්ඩලයටත් කෘතවේදීත්වය පළකර සිටිමු.

මෙයට, විශ්වාසී,

 

 

 

ධර්‍මසිරි ලංකාපේලි                                                                                                                                                                                                                                                                                                               ක්‍රිෂ්ණි ඉෆාමි
ප්‍රධාන ලේකම්                                                                                                                                                                                                                                                                                                                         සභාපති
077 364 1111                                                                                                                                                                                                                                                                                                                               077 798 6818

මානව විරෝධී, පීඩාකාරී
”‍නිල රහස් පනත”‍
වහා අහෝසි කරනු!

මාධ්‍ය නිවේදනය
2022 සැප්තැම්බර් 29

මානව විරෝධී, පීඩාකාරී ”‍නිල රහස් පනත”‍ වහා අහෝසි කරනු!

රජය විසින් කොළඹ නගරය තුළ, රජයේ ගොඩනැගිලි, අධිකරණ බල ප්‍රදේශ ආදී වශයෙන් විශාල භූමි ප්‍රදේශයක් අධි ආරක්ෂිත කලාප ලෙස නම් කරමින් ගැසට් නිවේදනයක් නිකුත්කර තිබේ. කවර රජයක් හෝ මෑත භාගයේ භාවිතා නොකළ ”‍නිල රහස් පනත”‍ අවභාවිත කරමින් මෙම ගැසට් පත්‍රය ප්‍රකාශයට පත්කර තිබෙන බවට ශ්‍රී ලංකා රජය වෙත බරපතල ලෙස චෝදනා එල්ල වෙමින් තිබේ.

සැප්තැම්බර් 23 දින නිකුත් කළ මෙම ගැසට් පත්‍රය මගින් නම්කර ඇති “අධි ආරක්‍ෂිත කලාප” තුළ ඕනෑම මහජන රැස්වීමක් පැවැත්වීමට පොලිසියේ ලිඛිත අවසරය පැය හයකට පෙර ලබාගැනීම අවශ්‍ය වේ.

මෙම කලාපයන් තුළ සිටින ඕනෑම අයෙකු අත්අඩංගුවට ගැනීමට ද පොලිසියට පුළුල් බලයක් ඇති අතර, එහිදී අත් අඩංගුවට ගන්නා අයට ඇප ලබා දිය හැක්කේ මහාධිකරණයක් මගින් පමණක් බව සඳහන් කෙරේ. මෙම දැඩි සීමා කිරීම් මගින් ජනතාවට ඇති සාමකාමීව රැස්වීම සහ අදහස් ප්‍රකාශනයේ අයිතීන් වෙනුවෙන් පෙනී සිටින පුද්ගලයන්ට එරෙහිව අනීතික ලෙස බලය යෙදවීමට රජය පියවර ගනිමින් සිටින බව පැහැදිළිය.

භාෂණයේ හා ප්‍රකාශනයේ නිදහස නීති විරෝධී ලෙස සීමා කරන ලෙස පනවා තිබෙන මෙම නව රෙගුලාසි ඉවත් කරගන්නා ලෙස දෙස් විදෙස් මානව හිමිකම් සංවිධාන හා තවත් විවිධ සංවිධාන රජයට බලකරමින් තිබේ. ශ්‍රී ලංකා නීතිඥ සංගමය ප්‍රකාශයක් කරමින් කිසිදු සාධාරණ හෝ නීතිමය පදනමකින් තොරව පුරවැසියාගේ නිදහස සැලකිය යුතු ලෙස කප්පාදු කිරීමට රජය උත්සාහ කරන බව සඳහන් කර සිටී. ශ්‍රී ලංකා මානව හිමිකම් කොමිෂන් සභාව පවසන්නේ මෙම පනත මගින් රටේ ජනතාවගේ මූලික අයිතිවාසිකම් දැඩි ලෙස උල්ලංඝනය කෙරෙන බවකි. මෙම යල් පැනගිය නීතිය ඉවත් කරගන්නා ලෙසට රජයට වැඩිදුරටත් යෝජනාකර තිබේ.

රටවල් 146 ක, මාධ්‍ය සංවිධාන 167න් සමන්විත, ලක්ෂ හයකට අධික ජනමාධ්‍යවේදීන් පිරිසක් සාමාජිකත්වය දරණ ජනමාධ්‍යවේදීන්ගේ ජාත්‍යන්තර සම්මේලනය (IFJ) සමග එකතුවෙමින් මාධ්‍ය සේවක වෘත්තී‍ය සමිති සම්මේලනය භාෂණයේ හා ප්‍රකාශණයේ මූලික මිනිස් අයිතිවාසිකම් නොසළකා හරිමින් ජනතාව වෙත එල්ල කෙරෙන මෙම මානව විරෝධී, පීඩාකාරී පනත වහාම හකුලා ගන්නා ලෙස රජයට බලකර සිටී.

ධර්‍මසිරි ලංකාපේලි
ප්‍රධාන ලේකම්
077 364 1111

මාධ්‍යවේදීන්ගේ අයිතිවාසිකම් සුරක්ෂිත කෙරෙන FMETU-IFJ-UTU 2022 වැඩ සටහන!

IFJ-UTU 2022 වැඩ සටහන FMETU සාමාජික මාධ්‍යවේදීන්ගේ සහ මාධ්‍ය සේවකයින්ගේ වෘත්තීය අයිතිවාසිකම් ශක්තිමත් කිරීම, ඔවුන්ගේ තොරතුරු මත පදනම් වූ දත්ත සටහනක් ක්‍රියාත්මක කිරීම හා වෘත්තීය ගැටළු පිළිබඳව යොමුවූ කෙටි වීඩියෝ පට 15 ක් අන්තර්ජාල ගත කිරීම මෙම වැඩ සටහනේ මූලිකම ක්‍රියාමාර්ග වේ.

කලාපීය ජනමාධ්‍ය සංවිධාන ශක්තිමත් කිරීම වෙනුවෙන් IFJ-UTU උපකාරක වැඩ සටහන වාර්ෂිකව IFJ Asia Pacific කාර්‍ය්‍යාලය විසින් මෙහෙයවනු ලබයි.

ජනමාධ්‍යවේදීන්ගේ මූලික වෘත්තීය අයිතිවාසිකම් ජයග්‍රහණය කිරීම වෙනුවෙන් බලපෑම් කිරීම සහ ඒ වෙනුවෙන් පෙනී සිටීම පිණිස මාධ්‍යවේදීන්, මාධ්‍ය සේවකයන් දැනුවත් කිරීම මෙම වැඩ සටහන මගින් සිදුකිරීමට නියමිතය.

ජ්‍යෙෂ්ඨ මාධ්‍යවේදීන් සමඟ තරුණ මාධ්‍යවේදීන් සංවිධානය කිරීම පිළිබඳව, සාමාජික සාමාජිකාවන්ගේ අදහස් හා සාකච්ඡාව තුළින් ඔවුන් බල ගැන්වීම මෙම වැඩ සටහනේ මුලික ඉලක්කයකි. වෘත්තීය සමිතියක් ලෙස ක්‍රියාකාරී භූමිකාවක් ඉටු කිරීමට සහ නව ලෝකයේ ඩිජිටල් ආර්ථිකය තුළ ඵලදායී ලෙස සාමාජිකයන්ගේ දැනුම හා කුසලතා වැඩි දියුණු කිරීම මෙන්ම ඔවුන් දැනුමෙන් සන්නද්ධ කිරීම මෙම සටහනෙන් අපේක්ෂා කෙරේ.

2022 අගෝස්තු 27 වන දින රට පුරා මාධ්‍යවේදීන් 300 කගේ සහභාගීත්වය අපේක්ෂාවෙන් සිංහල සහ දෙමළ භාෂා මාධ්‍ය දෙකෙන්ම මෙහි මාර්‍ගගත සාකච්ඡාව සංවිධානය කර සාර්ථකව අවසන් කරනු ලැබීය.

උක්ත වැඩ සටහන යටතේ තරුණ මාධ්‍යවේදිනියන්, මාධ්‍යවේදීන්, 20 දෙනෙකු ඩිජිටල් මාධ්‍ය පුහුණු වඩසටහනක් සඳහා ද යොමුකර තිබේ. සැප්තැම්බර් 03 වෙනි දින දවස පුරා විශේෂඥ දැනුමැති පුහුණුකරුවෙකුගේ උපදේශකත්වය මත මෙම තරුණ මාධ්‍යවේදීන් පුහුණු කිරීමට නියමිතය.

එම පුහුණුවෙන් පසු මාධ්‍යවේදීන් සහ මාධ්‍ය සේවකයන්ගේ වෘත්තීය ප්‍රශ්ණ හා ඔවුන් මුහුණදෙන අභියෝගයන් පිළිබඳව විමර්‍ශනාත්මක වීඩියෝ පට 15ක් fmetu.org වෙබ් අඩවිය හරහා සමාජගත කිරීමට පියවර ගනු ලැබේ.

වැඩසටහන අවසානයේ මේ සියළු ක්‍රියාකාරකම් ඇසුරෙන් මාධ්‍යවේදීන්ගේ වෘත්තීය ප්‍රශ්ණ හා අභියෝගයන් පිළිබඳ ගොනුකරනු ලබන වාර්‍තාවක් fmetu.org හරහා අන්තර් ජාලයට මුදාහැරේ. මේ වාර්‍තාව රජයේ බලධාරීන්ට යොමුකර වගකිවයුත්තන් සමග සාකච්ඡාමය ප්‍රවේශයකට යොමුවීමට ද මාධ්‍ය සේවක වෘත්තීය සමිති සම්මේලනය අදහස් කරයි.

විධිමත් වෘත්තීය ගරුත්වයකින් යුතු වෘත්තීමය මාධ්‍යවේදීන් පිරිසක්, ශ්‍රී ලංකාවේ ජනමාධ්‍ය කර්‍මාන්තය තුළ තහවුරු කිරීම මෙම වැඩසටහනේ ප්‍රධානතම අරමුණ බව මාධ්‍ය සේවක වෘත්තීය සමිති සම්මේලනයේ ප්‍රධාන ලේකම් ධර්මසිරි ලංකාපේලි සහෝදරයා ජනමාධ්‍යවේදීන්ගේ මහගෙදර fmetu.org හමුවේ පවසා සිටී.

 

 

මෙම උද්ඝෝෂණික වැඩසටහන සමග සම්බන්ධ වෙන්නට කැමති අය සැප්තැම්බර් 05 වෙනිදාට පෙර https://tinyurl.com/FMETU-PROFILE ගූගල අයදුම්පත්‍රය පුරවා සහයෝගය පළකරන ලෙස සංවිධායකයන් ඉල්ලා සිටී

සාමකාමී අරගලකරුවන්ට සන්නද්ධ හමුදා විසින් මැදියම් රැයේ එල්ල කළ හදිසි ප්‍රහාරය වියරුවක්!

22 ජූලි 2022
මාධ්‍ය නිවේදනය

සාමකාමී අරගලකරුවන්ට සන්නද්ධ හමුදා විසින් මැදියම් රැයේ එල්ල කළ හදිසි ප්‍රහාරය වියරුවක්!

ගාලු‍ මුවදොර අරගල බිමේ රැඳීසිටි විරෝධතාකරුවන් වැටලූ, දහස් ගණනින් සන්නද්ධ ආරක්ෂක හමුදා ඊයේ මැදියම් රැයේ එල්ල කළ බිහිසුනු ප්‍රහාරය ප්‍රජාතන්ත්‍රවාදය ගරුකරන සියළු ජනකොටස් හෙළාදකිනු නොඅනුමාන බව මාධ්‍ය සේවක වෘත්තීය සමිති සම්මේලනය ප්‍රකාශකර සිටී.

ජනාධිපති ලේකම් කාර්යාල පරිශ්‍රයෙන් ඉවත්වීමට අරගලකරුවන් තින්දුකර තිබූ අවස්ථාවක, අරගල බිමේ රැඳීසිටි නිරායුද පිරිස්වලට හා විශේෂයෙන් එහි වාර්‍තාකරණයේ නියැළෙමින් සිටි දෙස් විදෙස් මාධ්‍යවේදීන් වෙත බිහිසුණු ප්‍රහාරයක් එල්ලකර තිබේ. බොහෝ දෙනෙක් අත්අඩංගුවට පත්ව ඇති බවද වාර්‍තා වේ. මේ වනවිට මාධ්‍යවේදීන් කිහිප දෙනෙකු පිළිබඳ තොරතුරක් නොමැති අතර ඔවුන් අත්අඩංගුවට ගෙන තිබේද? පහරකෑමට ලක්වීම නිසා රෝහල් ගත තිබේද? කිසිදු තොරතුරක් ලබාදීමට රජයේ වගකිව යුත්තෙකු ඉදිරිපත් නොවීම මෙම ප්‍රහාරයේ බිහිසුණු බව මොනවට පැහැදිළි සාක්ෂියකි.

නීතිඥවරුන් සහ මාධ්‍යවේදීන් මේ සම්බන්ධයෙන් ප්‍රශ්ණ කළ ද පිළිතුරක් ලබාදීමට කිසිවෙක් ඉදිරිපත් නොවීම හෙළාදැකිය යුතුය. මේ තත්වයන් අනුව මෙම ප්‍රහාරය රටේ නව ජනාධිපතිවරයා දිවුරුම්දී පැය කිහිපයක් තුළ රජයේ බලධාරීන්ගේ උපදෙස් පරිදි එල්ල කළ ප්‍රජාතන්ත්‍ර විරෝධී බිහිසුනු ප්‍රහාරයකි. නව ජනාධිපතිවරයාගේ කථාව හා ක්‍රියාවන් අතර පවතින වෙනස මැන ගැනීමට හොඳම සාධකයක් මේ සිදුවීම තහවුරු කරනු ලබයි.

හදිසි නීතිය යොදා ගනිමින් භාෂණයේ නිදහසට එල්ල කළ මෙම බිහිසුනු ප්‍රහාරය ප්‍රජාතන්ත්‍රවාදයට ලැදි සියළු පිරිස් දැඩිව හෙළාදැකිය යුතු අතර නව ජනාධිපතිවරයාගේ හා රජයේ මෙම ක්‍රියාමාර්‍ග පිටුදැකීමට හා රටතුළ ප්‍රජාත්න්ත්‍රවාදය තහවුරු කිරීමට වහාම මැදිහත්වීම ජාතික හා ජාත්‍යන්තර මාධ්‍ය සංවිධාන හා වෘත්තීය සමිති හා සිවිල් සංවිධාන සතු මගහැරිය නොහැකි වගකීමක් බව මාධ්‍ය සේවක වෘත්තීය සමිති සම්මේලනය ප්‍රකාශකර සිටී.

මෙයට, විශවාසී,

ධර්‍මසිරි ලංකාපේලි
ප්‍රධාන ලේකම්

අරගල නියමුවන් මාධ්‍ය ආයතන තුළට කඩාවැදීම නොසිදුවිය යුතු ක්‍රියාවක්!

මාධ්‍ය නිවේදනය

14. 07. 2022

අරගල නියමුවන් මාධ්‍ය ආයතන තුළට කඩාවැදීම නොසිදුවිය යුතු ක්‍රියාවක්

පසුගිය දින කිහිපය තුළ රාජ්‍ය හා පුද්ගලික රූපවාහිනි නාලිකා තුළට ඇතුල්වී එම ආයතනයන්හී මාධ්‍ය කටයුතුවලට බලපෑම් එල්ල කිරීමට අරගලකරුවන්ගේ නියෝජිත පිරිසකගේ මැදිහත්වීම මාධ්‍ය සේවක වෘත්තීය සමිති සම්මේලනය අනුමත නොකරනු ලබයි. “මාධ්‍ය සේවක වෘත්තීය සමිති සම්මේලනය” රටවල් 146 මාධ්‍ය සංවිධාන 187න් සමන්විත, ජනමාධ්‍යවේදීන්ගේ ජාත්‍යන්තර සම්මේලනයේ (IFJ) සාමාජික සංවිධානයකි.

රාජ්‍ය හා පුද්ගලික මාධ්‍ය හැසිරීම හා මාධ්‍යවේදීන්ගේ, කර්තෘ මණ්ඩල නිදහස, ජනතාව වෙත සමීප කරනු ලබන තොරතුරු පිළිබඳ පාර්ශ්වීයභාවය දීර්‍ඝ කාලයක් තිස්සේ අප සම්මේලනයේ ද දැඩි විවේචනයට ලක්වූ තත්වයක් බව ප්‍රකාශකර සිටී. එවැනි තත්වයක් බලහත්කාරී, ඒකපාර්ශවීය ප්‍රවේශයන් මගින් වෙනස් කිරීමට බලපෑම් කිරීම ප්‍රජාතන්ත්‍රවාදී මූලධර්මයන්ට මෙන්ම නිදහස් මාධ්‍ය සම්ප්‍රදායන්ට ද පටහැනි ක්‍රියාවකි. පසුගිය 13 වෙනි දින ශ්‍රී ලංකා රූපවාහිනි සංස්ථාවට බලහත්කාරී ලෙස ඇතුල්වී එහි වැඩ සටහන් අත්හිටුවා අරගලකරුවන් ලෙස පෙනී සිටි අයවළුන්ගේ අදහස්, බලපෑම්කර සජීවී ලෙස විකාශය කිරීම නිදහස් මාධ්‍ය සම්ප්‍රදායන්ට එල්ල කරනු ලැබූ මරු පහරක් බව කිව යුතුය.

ශ්‍රී ලංකාවේ රාජ්‍ය මාධ්‍ය මෙන්ම පුද්ගලික මාධ්‍ය ‘මහජන සේවා ජනමාධ්‍ය’ (Public Service Media) බවට පරිවර්ථනය කිරීමට පසුගිය දශක දෙකකට කාලයක් පුරාවට මාධ්‍ය සේවක වෘත්තීය සමිති සම්මේලනය ප්‍රමුඛ ජනමාධ්‍ය සංවිධාන අරගල කරමින් සිටිනුයේ රට තුළ ඔබ බලාපොරොත්තු වන නිදහස් මාධ්‍ය සම්ප්‍රදායක් බිහි කිරීමේ අරමුණ පෙරදැරිවය.

පසුගිය දසක ගණනාවක් පුරාවට රාජ්‍ය පාලනයේ, ජනතා විරෝධී ක්‍රියාපරිපාටීන් නිසා පීඩාවට පත්ව සිටින ජනතාව දහස් ගණන් අරගල බිමට එකතුවෙමින් ගනු ලබන සාමූහික ප්‍රයත්නයන්ට මෙන්ම ප්‍රජාතාන්ත්‍රවාදය දිනා ගැනීමේ අරගලයට ද මෙවැනි ක්‍රියා බාධා මතුකරන බව අප තේරුම් ගතයුතුව තිබේ.

භාෂණයේ නිදහස, ප්‍රජාතන්ත්‍රවාදී සමාජයක මූලික පදනමක් බව අවධාරණය කරන මාධ්‍ය සේවක වෘත්තීය සමිති සම්මේලනය මෙවැනි ක්‍රියාවන් සමාජ, ආර්ථික, දේශපාලන නිදහස වෙනුවෙන් මෙහෙයවන අරගලයන්ට සිදු කෙරෙන බාධාවක් බව සටහන් කිරීම වටී. මෙවැනි අර්ථ ශූන්‍ය ක්‍රියාවන්ගෙන් වැළකී මහජන සේවා ජනමාධ්‍ය සම්ප්‍රදායක් තහවුරු කිරීම වෙනුවෙන් මාධ්‍ය සංවිධාන ගෙනයන අරගලයද, වත්මන් ප්‍රශස්ත අරගලය සමග ඒකාබද්ධ කිරීමට සමස්ථ ජනසමාජයට අප සම්මේලනය යෝජනාකර සිටී.

මෙයට, විශ්වාසී,

ධර්මසිරි ලංකාපේලි
ප්‍රධාන ලේකම්

අග්‍රාමාත්‍ය රනිල් වික්‍රමසිංහ නිවස අසල වාර්තාකරණයේ නියැලි මාධ්‍යවේදීන්ට සිදුකළ ම්ලේච්ඡ පහරදීම!

 

මාධ්‍ය නිවේදනය

2022 ජූලි 09

අග්‍රාමාත්‍ය රනිල් වික්‍රමසිංහ නිවස අසල වාර්තාකරණයේ නියැලි මාධ්‍යවේදීන්ට සිදුකළ ම්ලේච්ඡ පහරදීම!

අග්‍රාමාත්‍ය රනිල් වික්‍රමසිංහගේ පෞද්ගලික නිවස ආසන්නයේ වාර්තා කරන කටයුතු වල නිරත වෙමින් සිටී සිරස මාධ්‍ය ජාලයේ මාධ්‍යවේදීන්, සිව්දෙනෙකුට, ඔවුන් මුදා ගැනීමට පැමිණි තවත් මාධ්‍යවේදීන් දෙදෙනෙකුට සහ දෙරණ මාධ්‍ය ජාලයේ මාධ්‍යවේදියෙකුට පොලිස් සහ පොලිස් විශේෂ බළකා නිලධාරීන් විසින් ඉතා අමානුෂික ලෙස පහරදීම මාධ්‍ය සේවක වෘත්තීය සමිති සම්මේලනය, ජනමාධ්‍යවේදීන්ගේ ජාත්‍යන්තර සම්මේලනය සමඟ එකතු වෙමින් දැඩිව හෙලා දකී.

මෙම පහර දීමට අමතරව මාධ්‍යවේදීන් කිහිප දෙනෙකුටම පසුගිය දින කිහිපය තුළ ස්ථාන ගනනාවකදී ආරක්ෂක අංශවල බලපෑමට හා තර්ජනයට ලක්විමට සිදුවූ බව වාර්තාවේ. මෙම පහරදීම්, බලපෑම් හා තර්ජනය කිරීම් සිදු කරනු ලබන්නේ ජනතාවගේ තොරතුරු දැනගැනීමේ අයිතියට වන අතර එය මූලික මිනිස් අයිතිවාසිකම් කඩකිරීමක් ලෙස අප සලකනු ලබයි. එම මූලික මිනිස් අයිතිවාසිකම් කඩකළ නිලධාරීන්ට එරෙහිව නීතිය දැඩිව ක්‍රියාත්මක කළ යුතු බව අප සම්මේලනය පොලිස්පතිවරයා ඇතුළු බලධාරීන්ගෙන් දැඩිව ඉල්ලා සිටී.

මෙම කෲර පහරදීම් වලට හා වධ හිංසාවට වගකිවයුතු නිලධාරීන් නීතිය හමුවට පැමිණවීම පොලිස්පතිවරයාගේ වගකීම වන බව අප සම්මේලනය දැඩිව විශ්වාස කරනු ලබයි. ජනතාවගේ මුලික මිනිස් අයිතිවාසිකම් ආරක්ෂා කිරීමට බැඳි සිටින ශ්‍රී ලංකාවේ මානව හිමිකම් කොමිසමද මෙවැනි සිදුවීම් පිළිබඳව මැදිහත් විය යුතු බව අවධාරණය කර සිටී.

මෙම ප්‍රහාර හා බලපෑම් සම්බන්ධයෙන් කඩිනම් පුළුල් පරීක්ෂණ සිදුකර මාධ්‍යවේදීන්ට සාධාරණය ඉටු කරන ලෙසත්, ජනතාවට තොරතුරු දැනගැනීමට ඇති මුලික අයිතිය ආරක්ෂා කිරීමට වගකීමකින් මැදිහත් වන ලෙසත්, මාධ්‍ය සේවක වෘත්තීය සමිති සම්මේලනය සියළු බලධාරීන්ගෙන් දැඩිව ඉල්ලා සිටී.

මෙයට, විශ්වාසි,

ධර්මසිරි ලංකාපේලි,

ප්‍රධාන ලේකම්.

 

 

 

2022 මාධ්‍යවේදීන්ගේ ජාත්‍යන්තර සම්මේලනයේ (IFJ), 31 වැනි ලෝක සම්මේලනයේ දී ඉන්දිරා නවගමුව එහි විධායක සභාවට !

මාධ්‍යවේදීන්ගේ ජාත්‍යන්තර සම්මේලනයේ (IFJ), 31 වැනි ලෝක සම්මේලනය, මැයි 31 සිට ජුනි 3 දක්වා ඕමානයේ, මස්කට් නුවරදී පැවැත්විණි.

රටවල් 92 ක මාධ්‍යවේදී සංගම් නියෝජනය කරමින් 250 කට අධික සාමාජික පිරිසක් සම්මේලනයට සහභාගී වූ අතර, මාධ්‍යවේදීන්ගේ නිරීක්ෂණ සහ මාධ්‍ය සේවකයින්ට එරෙහි අපරාධ සඳහා දණ්ඩමුක්තිය අවසන් කිරීමට ක්‍රියා කිරීම ඇතුළු ප්‍රධාන තේමාවන් ගණනාවක් මෙහිදි සාකච්ඡාවට බඳුන් විය.

මාධ්‍යවේදීන්ගේ ජාත්‍යන්තර සම්මේලනයේ, ප්‍රධාන ලේකම් ඇන්තනි බෙල්ලන්ජර් සමුළුව ආරම්භ කරමින් මෙහිදි පැවසුවේ, ලොව පුරා මාධ්‍යවේදීන්ගේ ජාත්‍යන්තර සම්මේලනවලට ශක්තිමත් ඉතිහාසයක් ඇති බවයි. රටවල් 140 ක මාධ්‍යවේදීන් 600,000 කට වඩා නියෝජනය කරන, මාධ්‍යවේදීන්ගේ ජාත්‍යන්තර සම්මේලනය, ලොව පුරා වෙසෙන මාධ්‍යවේදීන් සහ මාධ්‍ය සේවකයින් සඳහා ශක්තිමත් වේදිකාවක් සපයනු ඇති බව තමන් විශ්වාස කරන බව ඔහු වැඩිදුරටත් පැවසීය.

මෙවර ඕමානයේ, මස්කට් නුවර පැවති මාධ්‍යවේදීන්ගේ ජාත්‍යන්තර සම්මේලනය සඳහා ශ්‍රී ලංකාවේ මාධ්‍ය සංවිධාන තුනක් නියෝජනය කරමින් නියෝජිතයන් සහභාගි වු අතර, මාධ්‍ය සේවක වෘත්තිය සමිති සම්මේලනය නියෝජනය කරමින් ඒ සඳහා සහභාගි වූයේ එහි නියෝජ්‍ය ලේකම් ඉන්දිරා නවගමුව සහෝදරියයි.

ඇය ජාත්‍යන්තර මාධ්‍යවේදීන්ගේ සම්මේලනයේ, විධායක කමිටුවේ අතිරේක විධායක සභිකාවක් වශයෙන් පත්වූයේ, 78 ක් වැනි අතිවිශාල ඡන්ද ප්‍රමාණයක් ලබාගනිමිනි. එය මාධ්‍ය සේවක වෘත්තිය සමිති සම්මේලනයට අතිවිශාල ගෞරවයකි.

මාධ්‍යවේදීන්ගේ ජාත්‍යන්තර සම්මේලනය සඳහා 2022-25 වසර තුනක කාලය සඳහා තේරී පත්වු නව නිලධාරි මණ්ඩලය හා විධායක කමිටුව මෙසේය.

සභාපති – ඩොමිනික් ප්‍රදාලි (SNJ) ප්‍රංශය
ජ්‍යෙෂ්ඨ උප සභාපති – ශුලියානා ලැයිනෙශ් ඔටේරෝ (ANP) පේරු
උප සභාපතිවරු – නසාර් අබු බකර් (PJS) පලස්තීනය
සබීනා ඉන්ද්‍රජිත්, ඉන්දීය ජනමාධ්‍යවේදීන්ගේ සංගමය
භාණ්ඩාගාරික – ජිම් බොමිබියුලා  (NUJ) බ්‍රිතාන්‍යය

විධායක සභාව –

මොහොමඩ් අල් අරෙයිමි (OJA) ඕමානය
ධෛරාන් අල්මුටයිරි (KJA) කුවේට්
මාරියා ජෝස් බ්‍රාගා (FENAJ) බ්‍රසීලය
ලැරී ගෝල්ඩ්බෙටර් (NWU) ඇමරිකා එක්සත් ජනපදය
ඇඩ්රිනා හුර්ටාඩෝ (FECOLPER) කොලොම්බියාව
මොහොමඩ් යසීන් ජෙලාසි (SNJT) ටියුනීසියාව
ජෝකිම් ක්‍රෙයිබිච් (dju in verdi) ජර්මනිය
රෆෙල් ලෝරුසෝ (FNSI) ඉතාලිය
ෆයිල්මන් මෙඩිනා (Sindicato de Periodistas de Panama)
මැරියන් මෙඩ්ජෝ ඔබාම් (SNJC) කැමරූන්
ලුයිස් මෙනෙන්ඩශ් (FAPE) ස්පාඤ්ඤය
ජෙනිෆර් මෝරෝ (UNIFOR) කැනඩාව
ඕමාර් ෆාරුක් ඔස්මාන් (NUSOJ) සෝමාලියාව
ඇඩම් පෝටෙලි (MEAA) ඕස්ට්‍රේලියාව
මාරියා ලුයිසා රොගේරියෝ (SJA) ඇන්ගෝලා
අලි යූසෙෆ් (ORLB) ලෙබනනය

කලාප විධායක සභිකයන්

අප්‍රිකාව

1 වැනි – එඩ්වාඩෝ කොන්ස්ටන්ටිනෝ (NJ) මොසැම්බික්
2 වැනි – ස්ටීවන් ඕමා බ්වයර් (UJU) උගන්ඩාව

ආසියාව

1 වැනි – රෂීඩ් අල් හාමර් (BJA) බහරේනය
2 වැනි – මොහොමඩ් අල් හම්මාඩි (JA) එක්සත් ආරාබි එමීර් රාජ්‍යය

යුරෝපය

1 වැනි – ශෙරි ශ්ට්රුෂ්ට්කයි (IMTUU) යුක්රේනය

ලතින් ඇමරිකා

1 වැනි – ජොසේ ඇල්ටාරිකා ගුස්මාන් (NTP) ඩොමිනිකන් ජනරජය
2 වැනි – ඩොමින්ගෝ වර්ගාස් (FENATRAMCO) චිලී

ඕෂනියා

1 වැනි – කැරන් පර්සි (MEAA) ඕස්ට්‍රේලියාව

අතිරේක විධායක සභිකයින්
1 වැනි – ඉන්දිරා ප්‍රියදර්ශනී නවගමුව (FMETU) ශ්‍රී ලංකාව
2 වැනි – වංචි යූ (ATJ) තායිවානය

මන්ත්‍රිවරුන් විසින් ජනමාධ්‍යවේදීන්ගේ ජංගම දුරකථන පැහැරගැනීම මැර ක්‍රියාවකි!

18. 05. 2022
මාධ්‍ය නිවේදනය.

මන්ත්‍රිවරුන් විසින් ජනමාධ්‍යවේදීන්ගේ ජංගම දුරකථන පැහැරගැනීම මැර ක්‍රියාවකි!

සිරස මාධ්‍යවේදී කසුන් සමරවීර සහ පාර්ලිමේන්තු වාර්තාකරුවන්ගේ සංගමයේ සභාපති, මාධ්‍යවේදී ප්‍රගීත් පෙරේරා සිය වාර්තාකරණය සඳහා යොදා ගනිමින් සිටි ජංගම දුරකථන, ආණ්ඩු පක්ෂයේ ඉන්දික අනුරුද්ධ සහ ඩී. වීරසිංහ යන මන්ත්‍රිවරු දෙදෙනා විසින් බලහත්කාරයෙන් පැහැරගැනීම තිරශ්චීන මැරක්‍රියාවකි. මාධ්‍ය සේවක වෘත්තීය සමිති සම්මේලනය, ජනමාධ්‍යවේදීන්ගේ ජාත්‍යන්තර සම්මේලනය (IFJ) සමග එකතුවෙමින් මන්ත්‍රිවරුන්ගේ එම මැරක්‍රියාව දැඩිව හෙළා දකී.

මාධ්‍යවේදීන්ට සිය වාර්තාකරණයේදී ජංගම දුරකථන භාවිතා කිරීම සඳහා කථානායකවරයාගේ නිසි අවසරය ලබාදී තිබේ. නව අගමැතිවරයා ලෙස රනිල් වික්‍රමසිංහ දිවුරුම් දීමෙන් පසු රැස්වූ පළමු දිනයවූ 17 වෙනි දින ආණ්ඩු පක්ෂයේ කණ්ඩායම් රැස්වීමෙන් පසු මාධ්‍යවේදීන් සිරිත් පරිදි මෙලෙස වාර්තාකරණයේ නියැලෙමින් සිට ඇත.

එම අවස්ථාවේදී ඉහත නම් කළ මන්ත්‍රිවරුන් දෙදෙනා විසින් මාධ්‍යවේදීන් දෙදෙනාගේ ජංගම දුරකථන පැහැරගෙන තිබේ. වඩාත් හාස්‍යජනක සිදුවීම වනුයේ එම ක්‍රියාවට අනුබල දුන් චන්න ජයසුමන මන්ත්‍රිවරයා සභා ගර්භනයේදී කථානායකවරයා හමුවේ නාඳුණන පිරිසක් පාර්ලිමේන්තුව තුළ වීඩියෝ කරමින් සිටින බවට සිදුකළ ප්‍රකාශයයි.

මන්ත්‍රිවරු 225 සමගම ඉතාමත් සුහදව මිතුරන් ලෙසින් කටයුතු කරන මෙම මාධ්‍යවේදීන් දෙදෙනා නාඳුණන පුදගලයන් ලෙස චන්න ජයසුමන මන්ත්‍රිවරයාගේ හැඳින්වීම වඩාත් හාස්‍යජනක වේ. පැහැරගත් දුරකථන දෙක වේත්‍ර නිළධාරීන් වෙත භාරදීමෙන් පසු එහි ගබඩාකර තිබූ සියළු දත්තයන් නිළධාරීන් විසින් මකාදමා මාධ්‍යවේදීන් වෙත භාරදීම පිළිබඳව කථානායකවරයාගේ අවධානයට යොමුවිය යුතුය.

අදාළ සිදුවීම සම්බන්ධයෙන් මාධ්‍යවේදීන් දෙදෙනා මේ වන විටත් කතානායකවරයාට සහ වැලිකඩ පොලිසිය වෙත පැමිණිලි කර ඇත. මෙම සමස්ථ සිදුවීම පොදුවේ ජනමාධ්‍ය නිදහසට හා මාධ්‍යවේදීන්ගේ වෘත්තීය ගරුත්වයට එල්ල වූ බරපතළ තර්ජනයක් බව මාධ්‍ය සේවක වෘත්තීය සමිති සම්මේලනය අවධාරණය කර සිටී. පාර්ලිමේන්තුවේ 225 ම එපා කියමින් රටේ ජනතාව සිදුකරමින් සිටින දැවැන්ත උද්ඝෝෂණයේ නිරවද්‍යතාවය මන්ත්‍රිවරුන්ගේ මෙම මැර ක්‍රියාව මොනවට පැහැදිළි කරනු ලබයි.

මන්ත්‍රිවරුන්ගේ මෙම නිර්ලජ්ජිත ක්‍රියාව පිළිබඳව කථානායකවරයා ප්‍රමුඛ සමස්ථ පාර්ලිමේන්තුවේ අවධානය යොමුකොට මන්ත්‍රිවරුන්ගේ එකි ක්‍රියාවට එරෙහිව නිසි ක්‍රියාමාර්ග වෙත යොමුවන ලෙස මාධ්‍ය සේවක වෘත්තීය සමිති සම්මේලනය දැඩිව ඉල්ලා සිටී.

විශ්වාසී,

ධර්මසිරි ලංකාපේලි,

ප්‍රධාන ලේකම්.

ඔබට ගැටළු තිබේද?
අපව අමතන්න,
නැත්නම් පැමිණෙන්න.

+[94] 773 641 111

අංක 30,
අමරසේකර මාවත,
කොළඹ 05.
ශ්‍රී ලංකාව.

info@fmetu.org

Newsletter

Get latest news & update

© 2021 – FMETU. All rights reserved.

Carefully crafted by Cyber Ceylon