Indira Nawagamuwaශ්රී ලංකාවේ ගුවන්විදුලි විකාශනය ආරම්භ වූයේ එවකට යටත් විජිත විදුලි පණිවුඩ දෙපාර්තමේන්තුව විසින් පවත්වන ලද පර්යේෂණ මට්ටමේ විකාශනයක් ලෙසිනි. ප්රථම විකාශනය සඳහා ග්රැමෆෝන් සංගීතය භාවිතා කළ අතර, ඒ සඳහා අවශ්ය සම්ප්රේෂකය නිපදවා තිබුණේ අත්අඩංගුවට ගත් ජර්මානු සබ්මැරීනයකින් සොයාගත් ගුවන්විදුලි උපකරණ කොටස් භාවිතයෙනි. නිත්ය ගුවන්විදුලි සේවාව ‘කොළඹ රේඩියෝ‘ (Colombo Radio) නමින් 1925 දෙසැම්බර් 16 වන දින ආරම්භ විය. මෙය ආසියාවේ ප්රථම ගුවන්විදුලි මධ්යස්ථානය වූ අතර ලොව දෙවන පැරණිතම ගුවන්විදුලි මධ්යස්ථානය ද වේ.
විදුලි පණිවුඩ දෙපාර්තමේන්තුවේ ප්රධාන ඉංජිනේරු එඩ්වඩ් හාපර් මහතා “ලංකා ගුවන්විදුලි විකාශනයේ පියා” ලෙස සැලකේ. එවකට සිටි බ්රිතාන්ය ආණ්ඩුකාර සර් හියු ක්ලිෆර්ඩ් මහතා විසින් ශ්රී ලංකාවේ ගුවන්විදුලි සේවාව නිල වශයෙන් ආරම්භ කරන ලදී.
පළමුව ‘සෙයිලෝන් රේඩියෝ’ (Ceylon Radio) ලෙස හැඳින්වුණු මෙය, දෙවන ලෝක යුද්ධය හේතුවෙන් 1943 දී ටොරින්ටන් හි සිට බොරැල්ලේ කොට්ට පාරේ පිහිටි ‘බවර්’ (Bower) නම් බංගලාව වෙත ගෙන යන ලදී. දෙවන ලෝක යුද්ධ සමයේදී ගුවන්විදුලිය ඉතා වැදගත් මූලෝපායික මෙහෙවරක් ඉටු කළ අතර, විශේෂයෙන් Radio SEAC (ගිනිකොනදිග ආසියානු විධානය) හරහා සන්නද්ධ හමුදාවන්ගේ මානසිකත්වය ඉහළ නැංවීමට කටයුතු කළේය. අද්මිරාල් ලෝඩ් ලුවී මවුන්ට්බැටන්ගේ නායකත්වයෙන් යුත් මිත්ර පාර්ශ්වීය හමුදාවන් විසින් ඒකල ප්රදේශයේ සිට දකුණු සහ ගිනිකොනදිග ආසියාව පුරා වැඩසටහන් සහ පුවත් විකාශය කරන ලදී.
1949 දෙසැම්බර් 30 වන දින මධ්යම රාත්රියෙන් පසු ‘බවර්’ මධ්යස්ථානයේ විකාශන කටයුතු අවසන් වූ අතර, 1950 ජනවාරි 1 වන දින සිට එය ‘රේඩියෝ සිලෝන්‘ (Radio Ceylon) ලෙස නම් කර නැවත ටොරින්ටන් චතුරශ්රය වෙත ගෙන එන ලදී. ඕස්ට්රේලියානු ජාතික ක්ලිෆර්ඩ් ආර්. ඩොඩ් මහතා ලංකාවේ “වාණිජ ගුවන්විදුලි විකාශනයේ පියා” ලෙස සැලකෙන අතර, 1950 දී වාණිජ සේවය ආරම්භ විය. මෙහි හින්දි සේවය ඉන්දියාව පුරා අතිශය ජනප්රිය වූ අතර, එකල සමස්ත ඉන්දීය ගුවන්විදුලිය (AIR) මගින් සීමා කර තිබූ චිත්රපට ගීත විකාශය කිරීම නිසා එය ඉන්දියානු අර්ධද්වීපයේම ප්රසිද්ධ විය. ‘බිනාකා ගීත්මාලා’ (Binaca Geetmala) වැනි වැඩසටහන් ඉතා ජනප්රිය වූ අතර, රේඩියෝ සිලෝන් ආසියාවේ “ගුවන් තරංගවල රජු” ලෙස විරුදාවලිය ලැබූ මෙම යුගය එහි “ස්වර්ණමය යුගය” ලෙස හැඳින්වේ.
1967 ජනවාරි 5 වන දින ගුවන්විදුලි දෙපාර්තමේන්තුව ලංකා ගුවන්විදුලි සංස්ථාව (CBC) නමින් පොදු සංස්ථාවක් බවට පත් කරන ලදී. පසුව 1972 දී ශ්රී ලංකාව ජනරජයක් වීමත් සමඟ එය ශ්රී ලංකා ගුවන්විදුලි සංස්ථාව (SLBC) ලෙස නම් විය. 1990 දශකයේදී FM තාක්ෂණයට මාරු වෙමින් නවීකරණය වූ එය, අද වන විට සිංහල, දෙමළ සහ ඉංග්රීසි භාෂා රැසකින් නාලිකා කිහිපයක් පවත්වාගෙන යයි.
SLBC සතු සංගීත පුස්තකාලය ආසියාවේ හොඳම පුස්තකාලයක් ලෙස සැලකෙන අතර, එහි 78rpm තැටිවල සිට ලක්ෂයකට අධික ගීත එකතුවක් පවතී. 2009 සිට ආරම්භ වූ ඩිජිටල් සංරක්ෂණ ක්රියාවලිය හරහා මෙම වටිනා උරුමයන් අනාගතය වෙනුවෙන් සුරක්ෂිත කෙරේ. 1953 දී එවරස්ට් කන්ද තරණය කළ ශ්රීමත් එඩ්මන්ඩ් හිලරි සහ තෙන්සිං නෝර්ගේ පවා රේඩියෝ සිලෝන්හි ඉංග්රීසි සේවයට සවන් දුන් බව පැවසේ.