Indira Nawagamuwaඉන්දියාවේ ගුජරාට් ප්රාන්තයේ සිට වැඩම කරවන ලද ගෞතම බුදු රජාණන් වහන්සේගේ දෙව්නිමෝරි සර්වඥ ධාතූන් වහන්සේලා ප්රදර්ශනය කිරීමේ පුණ්ය මහෝත්සවය, 2026 පෙබරවාරි 04 වන දින කොළඹ ගංගාරාම විහාරස්ථානයේදී ආරම්භ විය. ශ්රී ලංකා පාර්ශවයෙන් අතිගරු ජනාධිපති අනුර කුමාර දිසානායක මහතා ද, ඉන්දීය පාර්ශවයෙන් ගුජරාට් ආණ්ඩුකාර ශ්රී ආචාර්ය දේව්ව්රත් සහ ගුජරාට් නියෝජ්ය ප්රධාන අමාත්ය ශ්රී හර්ෂ් සංඝවි යන මහත්වරුන් ද මෙහි සමාරම්භක අවස්ථාවට එක් වූහ. ගංගාරාම විහාරාධිකාරී පූජ්ය ආචාර්ය කිරිඳේ අස්සජී ස්වාමීන් වහන්සේගේ ප්රධානත්වයෙන් පැවැති මෙම අවස්ථාවට බුද්ධශාසන, ආගමික හා සංස්කෘතික කටයුතු අමාත්ය ගරු (ආචාර්ය) හිනිදුම සුනිල් සෙනෙවි, සෞඛ්ය හා ජනමාධ්ය අමාත්ය ගරු (ආචාර්ය) නලින්ද ජයතිස්ස සහ රාජ්ය පරිපාලන, පළාත් සභා හා පළාත් පාලන අමාත්ය ගරු (මහාචාර්ය) ඒ.එච්.එම්.එච්. අබයරත්න යන මහත්වරු ද සහභාගී වූහ. මෙම සර්වඥ ධාතු ප්රදර්ශනය 2026 පෙබරවාරි 05 වන දින සිට මහජන ගෞරවය සඳහා විවෘත වේ.
ඉන්දීය අග්රාමාත්ය ශ්රී නරේන්ද්ර මෝදි මහතා 2025 අප්රේල් මාසයේදී ශ්රී ලංකාවේ කළ රාජ්ය සංචාරය අතරතුර කරන ලද ප්රකාශයකට අනුව මෙම ප්රදර්ශනය සංවිධානය කර ඇත. මෙයින් ඉන්දියාව සහ ශ්රී ලංකාව අතර පවතින ගැඹුරු ආධ්යාත්මික සහ ශිෂ්ටාචාරමය සබඳතාව මැනවින් පිළිබිඹු වේ. ශ්රී ලංකාවේ 78 වන නිදහස් දිනය යෙදී ඇති පෙබරවාරි 04 වන දිනම මෙම සර්වඥ ධාතූන් වහන්සේලා මෙරටට වැඩම කරවීම විශේෂත්වයකි.
මෙම ධාතූන් වහන්සේලා ඉන්දියාවෙන් බැහැර රටක මහජන ප්රදර්ශනයක් සඳහා ඉදිරිපත් කරන පළමු අවස්ථාව මෙය වීම ද සුවිශේෂී කරුණකි. මීට පෙර ඉන්දියාව විසින් 2012 වසරේදී කපිලවස්තු සර්වඥ ධාතූන් වහන්සේලා ද, 2018 වසරේදී සාරානාත් සර්වඥ ධාතූන් වහන්සේලා ද ශ්රී ලංකාවේදී ප්රදර්ශනය කිරීමට කටයුතු කර තිබුණි.