2022 මාධ්‍යවේදීන්ගේ ජාත්‍යන්තර සම්මේලනයේ (IFJ), 31 වැනි ලෝක සම්මේලනයේ දී ඉන්දිරා නවගමුව එහි විධායක සභාවට !

මාධ්‍යවේදීන්ගේ ජාත්‍යන්තර සම්මේලනයේ (IFJ), 31 වැනි ලෝක සම්මේලනය, මැයි 31 සිට ජුනි 3 දක්වා ඕමානයේ, මස්කට් නුවරදී පැවැත්විණි.

රටවල් 92 ක මාධ්‍යවේදී සංගම් නියෝජනය කරමින් 250 කට අධික සාමාජික පිරිසක් සම්මේලනයට සහභාගී වූ අතර, මාධ්‍යවේදීන්ගේ නිරීක්ෂණ සහ මාධ්‍ය සේවකයින්ට එරෙහි අපරාධ සඳහා දණ්ඩමුක්තිය අවසන් කිරීමට ක්‍රියා කිරීම ඇතුළු ප්‍රධාන තේමාවන් ගණනාවක් මෙහිදි සාකච්ඡාවට බඳුන් විය.

මාධ්‍යවේදීන්ගේ ජාත්‍යන්තර සම්මේලනයේ, ප්‍රධාන ලේකම් ඇන්තනි බෙල්ලන්ජර් සමුළුව ආරම්භ කරමින් මෙහිදි පැවසුවේ, ලොව පුරා මාධ්‍යවේදීන්ගේ ජාත්‍යන්තර සම්මේලනවලට ශක්තිමත් ඉතිහාසයක් ඇති බවයි. රටවල් 140 ක මාධ්‍යවේදීන් 600,000 කට වඩා නියෝජනය කරන, මාධ්‍යවේදීන්ගේ ජාත්‍යන්තර සම්මේලනය, ලොව පුරා වෙසෙන මාධ්‍යවේදීන් සහ මාධ්‍ය සේවකයින් සඳහා ශක්තිමත් වේදිකාවක් සපයනු ඇති බව තමන් විශ්වාස කරන බව ඔහු වැඩිදුරටත් පැවසීය.

මෙවර ඕමානයේ, මස්කට් නුවර පැවති මාධ්‍යවේදීන්ගේ ජාත්‍යන්තර සම්මේලනය සඳහා ශ්‍රී ලංකාවේ මාධ්‍ය සංවිධාන තුනක් නියෝජනය කරමින් නියෝජිතයන් සහභාගි වු අතර, මාධ්‍ය සේවක වෘත්තිය සමිති සම්මේලනය නියෝජනය කරමින් ඒ සඳහා සහභාගි වූයේ එහි නියෝජ්‍ය ලේකම් ඉන්දිරා නවගමුව සහෝදරියයි.

ඇය ජාත්‍යන්තර මාධ්‍යවේදීන්ගේ සම්මේලනයේ, විධායක කමිටුවේ අතිරේක විධායක සභිකාවක් වශයෙන් පත්වූයේ, 78 ක් වැනි අතිවිශාල ඡන්ද ප්‍රමාණයක් ලබාගනිමිනි. එය මාධ්‍ය සේවක වෘත්තිය සමිති සම්මේලනයට අතිවිශාල ගෞරවයකි.

මාධ්‍යවේදීන්ගේ ජාත්‍යන්තර සම්මේලනය සඳහා 2022-25 වසර තුනක කාලය සඳහා තේරී පත්වු නව නිලධාරි මණ්ඩලය හා විධායක කමිටුව මෙසේය.

සභාපති – ඩොමිනික් ප්‍රදාලි (SNJ) ප්‍රංශය
ජ්‍යෙෂ්ඨ උප සභාපති – ශුලියානා ලැයිනෙශ් ඔටේරෝ (ANP) පේරු
උප සභාපතිවරු – නසාර් අබු බකර් (PJS) පලස්තීනය
සබීනා ඉන්ද්‍රජිත්, ඉන්දීය ජනමාධ්‍යවේදීන්ගේ සංගමය
භාණ්ඩාගාරික – ජිම් බොමිබියුලා  (NUJ) බ්‍රිතාන්‍යය

විධායක සභාව –

මොහොමඩ් අල් අරෙයිමි (OJA) ඕමානය
ධෛරාන් අල්මුටයිරි (KJA) කුවේට්
මාරියා ජෝස් බ්‍රාගා (FENAJ) බ්‍රසීලය
ලැරී ගෝල්ඩ්බෙටර් (NWU) ඇමරිකා එක්සත් ජනපදය
ඇඩ්රිනා හුර්ටාඩෝ (FECOLPER) කොලොම්බියාව
මොහොමඩ් යසීන් ජෙලාසි (SNJT) ටියුනීසියාව
ජෝකිම් ක්‍රෙයිබිච් (dju in verdi) ජර්මනිය
රෆෙල් ලෝරුසෝ (FNSI) ඉතාලිය
ෆයිල්මන් මෙඩිනා (Sindicato de Periodistas de Panama)
මැරියන් මෙඩ්ජෝ ඔබාම් (SNJC) කැමරූන්
ලුයිස් මෙනෙන්ඩශ් (FAPE) ස්පාඤ්ඤය
ජෙනිෆර් මෝරෝ (UNIFOR) කැනඩාව
ඕමාර් ෆාරුක් ඔස්මාන් (NUSOJ) සෝමාලියාව
ඇඩම් පෝටෙලි (MEAA) ඕස්ට්‍රේලියාව
මාරියා ලුයිසා රොගේරියෝ (SJA) ඇන්ගෝලා
අලි යූසෙෆ් (ORLB) ලෙබනනය

කලාප විධායක සභිකයන්

අප්‍රිකාව

1 වැනි – එඩ්වාඩෝ කොන්ස්ටන්ටිනෝ (NJ) මොසැම්බික්
2 වැනි – ස්ටීවන් ඕමා බ්වයර් (UJU) උගන්ඩාව

ආසියාව

1 වැනි – රෂීඩ් අල් හාමර් (BJA) බහරේනය
2 වැනි – මොහොමඩ් අල් හම්මාඩි (JA) එක්සත් ආරාබි එමීර් රාජ්‍යය

යුරෝපය

1 වැනි – ශෙරි ශ්ට්රුෂ්ට්කයි (IMTUU) යුක්රේනය

ලතින් ඇමරිකා

1 වැනි – ජොසේ ඇල්ටාරිකා ගුස්මාන් (NTP) ඩොමිනිකන් ජනරජය
2 වැනි – ඩොමින්ගෝ වර්ගාස් (FENATRAMCO) චිලී

ඕෂනියා

1 වැනි – කැරන් පර්සි (MEAA) ඕස්ට්‍රේලියාව

අතිරේක විධායක සභිකයින්
1 වැනි – ඉන්දිරා ප්‍රියදර්ශනී නවගමුව (FMETU) ශ්‍රී ලංකාව
2 වැනි – වංචි යූ (ATJ) තායිවානය

මන්ත්‍රිවරුන් විසින් ජනමාධ්‍යවේදීන්ගේ ජංගම දුරකථන පැහැරගැනීම මැර ක්‍රියාවකි!

18. 05. 2022
මාධ්‍ය නිවේදනය.

මන්ත්‍රිවරුන් විසින් ජනමාධ්‍යවේදීන්ගේ ජංගම දුරකථන පැහැරගැනීම මැර ක්‍රියාවකි!

සිරස මාධ්‍යවේදී කසුන් සමරවීර සහ පාර්ලිමේන්තු වාර්තාකරුවන්ගේ සංගමයේ සභාපති, මාධ්‍යවේදී ප්‍රගීත් පෙරේරා සිය වාර්තාකරණය සඳහා යොදා ගනිමින් සිටි ජංගම දුරකථන, ආණ්ඩු පක්ෂයේ ඉන්දික අනුරුද්ධ සහ ඩී. වීරසිංහ යන මන්ත්‍රිවරු දෙදෙනා විසින් බලහත්කාරයෙන් පැහැරගැනීම තිරශ්චීන මැරක්‍රියාවකි. මාධ්‍ය සේවක වෘත්තීය සමිති සම්මේලනය, ජනමාධ්‍යවේදීන්ගේ ජාත්‍යන්තර සම්මේලනය (IFJ) සමග එකතුවෙමින් මන්ත්‍රිවරුන්ගේ එම මැරක්‍රියාව දැඩිව හෙළා දකී.

මාධ්‍යවේදීන්ට සිය වාර්තාකරණයේදී ජංගම දුරකථන භාවිතා කිරීම සඳහා කථානායකවරයාගේ නිසි අවසරය ලබාදී තිබේ. නව අගමැතිවරයා ලෙස රනිල් වික්‍රමසිංහ දිවුරුම් දීමෙන් පසු රැස්වූ පළමු දිනයවූ 17 වෙනි දින ආණ්ඩු පක්ෂයේ කණ්ඩායම් රැස්වීමෙන් පසු මාධ්‍යවේදීන් සිරිත් පරිදි මෙලෙස වාර්තාකරණයේ නියැලෙමින් සිට ඇත.

එම අවස්ථාවේදී ඉහත නම් කළ මන්ත්‍රිවරුන් දෙදෙනා විසින් මාධ්‍යවේදීන් දෙදෙනාගේ ජංගම දුරකථන පැහැරගෙන තිබේ. වඩාත් හාස්‍යජනක සිදුවීම වනුයේ එම ක්‍රියාවට අනුබල දුන් චන්න ජයසුමන මන්ත්‍රිවරයා සභා ගර්භනයේදී කථානායකවරයා හමුවේ නාඳුණන පිරිසක් පාර්ලිමේන්තුව තුළ වීඩියෝ කරමින් සිටින බවට සිදුකළ ප්‍රකාශයයි.

මන්ත්‍රිවරු 225 සමගම ඉතාමත් සුහදව මිතුරන් ලෙසින් කටයුතු කරන මෙම මාධ්‍යවේදීන් දෙදෙනා නාඳුණන පුදගලයන් ලෙස චන්න ජයසුමන මන්ත්‍රිවරයාගේ හැඳින්වීම වඩාත් හාස්‍යජනක වේ. පැහැරගත් දුරකථන දෙක වේත්‍ර නිළධාරීන් වෙත භාරදීමෙන් පසු එහි ගබඩාකර තිබූ සියළු දත්තයන් නිළධාරීන් විසින් මකාදමා මාධ්‍යවේදීන් වෙත භාරදීම පිළිබඳව කථානායකවරයාගේ අවධානයට යොමුවිය යුතුය.

අදාළ සිදුවීම සම්බන්ධයෙන් මාධ්‍යවේදීන් දෙදෙනා මේ වන විටත් කතානායකවරයාට සහ වැලිකඩ පොලිසිය වෙත පැමිණිලි කර ඇත. මෙම සමස්ථ සිදුවීම පොදුවේ ජනමාධ්‍ය නිදහසට හා මාධ්‍යවේදීන්ගේ වෘත්තීය ගරුත්වයට එල්ල වූ බරපතළ තර්ජනයක් බව මාධ්‍ය සේවක වෘත්තීය සමිති සම්මේලනය අවධාරණය කර සිටී. පාර්ලිමේන්තුවේ 225 ම එපා කියමින් රටේ ජනතාව සිදුකරමින් සිටින දැවැන්ත උද්ඝෝෂණයේ නිරවද්‍යතාවය මන්ත්‍රිවරුන්ගේ මෙම මැර ක්‍රියාව මොනවට පැහැදිළි කරනු ලබයි.

මන්ත්‍රිවරුන්ගේ මෙම නිර්ලජ්ජිත ක්‍රියාව පිළිබඳව කථානායකවරයා ප්‍රමුඛ සමස්ථ පාර්ලිමේන්තුවේ අවධානය යොමුකොට මන්ත්‍රිවරුන්ගේ එකි ක්‍රියාවට එරෙහිව නිසි ක්‍රියාමාර්ග වෙත යොමුවන ලෙස මාධ්‍ය සේවක වෘත්තීය සමිති සම්මේලනය දැඩිව ඉල්ලා සිටී.

විශ්වාසී,

ධර්මසිරි ලංකාපේලි,

ප්‍රධාන ලේකම්.

ධර්මරත්නම් සිවරාම්: සන්සුන් චින්තකයෙකුගේ නික්ම යාම

LAST UPDATED ON 30 APRIL 2015

දෙමළ මාධ්‍යවේදී ධර්මරත්නම් සිවරාම් නාඳුනන පුද්ගලයින් සිව් දෙනෙකු විසින් පැහැරගනු ලැබූ බව අපේ‍්‍රල් 28 වෙනිදා බ‍්‍රහස්පතින්දාවේ මා දැනගත්තේ ජර්මනියේ වේලාවෙන් රාතී‍්‍ර 7.30ට පමණ ය. එතැන් සිට එළඹුණු පැය අට හමාරකට ආසන්න කාලය පුරා තවත් බොහෝ අයවළුන් සමඟ වියරුවෙන් මෙන් සිවරාම්ගේ ජීවිතය ගළවා ගැනීමට අපි කි‍්‍රයාත්මක වීමු. නමුත් සිකුරාදාවේ ජර්මනියේ වේලාවෙන් අළුයම 4.00ට පමණ සිවරාම්ගේ ප‍්‍රාණය නිරුද්ධ සිරුර හමුවූ වගට ඒ ශෝකී පණිවුඩය කොළඹින් මා වෙත ලැබිණ. ඒ පණිවුඩය කියාගත නොහැකිව සිය දුරකථන ඔස්සේ වාවාගත නොහැකි වේදනාවෙන් ඉකිබිඳින දෙමළ, සිංහල සහ යුරෝපීය හිතවතුන්ගේ සාමූහික වියෝදුක දරාගත නොහැකි තරම් එකක් විණ. ඒ, අප වටකොටගත් අපේක්‍ෂා විරහිතභාවයේ පොදු හැඟීමෙනි. සිවරාම්ගේ ජීවිතය බේරාගැනීමට ඒ හෝරා කිහිපයේ අසීමිත ලෙස වෙරගත් දෙමළ, සිංහල සහ සෙසු ජාතීන්ට අයත් කි‍්‍රයාකාරීන් සියල්ල මරණය පිළිබඳවත්, අපගේ ජීවිතවලට මෙන්ම අරගලයට විශේෂ වූ සහෘදයින්ගේ හදිසි වියෝගයන් පිළිබඳවත් අතීත අත්දැකීම්  ඕනෑ තරම් විඳ තිබිණ. නමුත් සිවරාම්ගේ මරණය මුල් කොට ඇවිළ ගිය අපගේ ශෝකයේ වෙනස්කමක් තිබිණ. ඒ වනාහී සිවරාම්ගේ මරණය විසින් නියෝජනය කළා වූ යථාර්ථයන්ට අදාළ වූවකි.

‘මහා මාධ්‍ය’ විසින් පාලනය කරනු ලබන ලෝකයක දෙමළ ජාතික අරගලය පිළිබඳ යථාර්ථයන් ලෝකයට අනාවරණය කිරීමේදී සිවරාම් හැම අතින්ම සාර්ථක වූයේය. පීඩිතයින්ගේ හඬ අවශේෂ ලෝකයට ඇසීම වළක්වනු පිණිස කි‍්‍රයාත්මක මාධ්‍ය ප‍්‍රබන්ධන් විසින් පාලනය වන ලෝකයක සිවරාම්ගේ සාර්ථකත්වය වූ කලී අතිශයින් උද්වේගජනක ජයග‍්‍රහණයකි. සිවරාම්ගේ මරණය විශේෂිත සංවේගයක් දනවනුයේ ඔහුගේ මරණය සිදුවන විට හෙතෙම සිය ශක්තීන් කූටප‍්‍රාප්තියට මෙහයවා සිය කාර්යයන් සියළු පැතිමානයන් ඔස්සේ පෙරට විහිදුවමින් තිබූ නිසාය. විශ්ලේෂණාත්මක කුසලතාවත්, සුපැහැදිලි රචනා ශෛලියත්, මාධ්‍ය පිළිබඳ තියුණු අවබෝධයත්, ඔහු විසින් ප‍්‍රතිරාව කළ හඬ හිමි පීඩිත දෙමළ ජනයාගේ සංස්කෘතික පදනම් පිළිබඳ වූ ගැඹුරු වැටහීමත්, ලෝක පරිමාණව කි‍්‍රයාත්මක ආර්ථික, දේශපාලන හා මිලිටරි බලවේගයන් පිළිබඳ වූ තේරුම්ගැනීමත් එක්තැන් කළ අසාමාන්‍ය පෞරුෂයක් සහිත සිවරාම් අන්තර් ජාලය වැනි නූතන මාධ්‍ය විසින් සම්පාදනය කොට ඇති තාක්‍ෂණික ඉඩ ප‍්‍රස්ථා පිළිබඳ සමීප ඥාණයක් හිමි අයෙකු විය. ලොව පීඩිත සියලු ජනයාට මූලාදර්ශයක් කොට සැළකිය හැකි ‘ටැමිල් නෙට්’ වෙබ් අඩවියේ සාර්ථකත්වය සඳහා ඔහු විසින් ඉටුකළ කාර්‍යභාරය ගිණිය නොහැකි තරම් ය.

ක්‍ෂුද්‍ර සම්භාව්‍ය රචනා

ඔහු ඉටුකළ වැඩකොටස බහුවිධ මානයන් සහිත එකකි. ශී‍්‍ර ලාංකීය ප‍්‍රධාන ධාරාවේ පුවත් පතක් වූ ‘ඩේලි මිරර්’ පුවත්පතට ඔහු විසින් සති පතා ලියන ලද ලිපිය, එම පුවත්පතේ කර්තෘවරයා විසින්ම ප‍්‍රකාශ කළ ආකාරයට ‘සුවිශාල අනුගාමිකත්වයක්’ සහිත විය. එහි අන්තර්ජාල සංස්කරණය කියවීම සඳහා සෑම බදාදාවකම ලොව පුරා ශී‍්‍ර ලංකාව පිළිබඳ උනන්දුවක් දැක් වූ බොහෝවුන් නොඉවසිල්ලෙන් සිටියහ. ඔහු අවිවාදයෙන්ම ලොව විශිෂ්ඨතම යුද විශ්ලේෂකයෙකු වශයෙන් පිළිගැණින. ඔහු විසින් ලියන ලද බොහෝ කෙටි ලිපි වූකලී ක්‍ෂුද්‍ර මට්ටමේ සම්භාව්‍ය රචනා සේ සැළකිණ. ඒවා ගැඹුරින්ම විද්‍යාත්මක වූ අතර සරල හා සුගම ශෛලියෙන් ලියැවී තිබිණ. ඔහුගේ දේශපාලන ලිපි තුළ කෙතරම් තියුණු සහ දෝෂ රහිත තර්කනයක් අන්තර්ගත වීද යත්, ඔහුගේ අදහස්වලට එරෙහිවූවන් පවා එකී ලිපි කියවීමට මෙන්ම ඒවා වින්දනයටත් රුචි කළහ. නමුත් ඔහු ඒ පිළිබඳ අහංකාරයකින් නොපෙලුණේය. වරක්, ජාත්‍යන්තර සමුළුවකට සහභාගී වූ දෙමළ දේව ධර්මවේදියෙකු වන මහාචාර්ය එස් ජේ එම්මෑනුවෙල් පියනම සිවරාම්ගේ ගැඹුරු ආලෝචනාවන් පිළිබඳ ප්‍රසාද මුඛයෙන් කතා කළේය. ‘ෆාදර්, මම පරිඝනකයක් ළඟ ඉඳගෙන හොයා ගන්න තොරතුරු ටික එකට ගොණු කරන සාමාන්‍ය මනුස්සයෙක්’ යැයි සිවරාම් කීවේ ඔහුට ආවේණික නිහතමානී බවින් ඒ කෙරෙහි සිනාසෙමිනි.

‘‘විද්‍යාව පිළිබඳ ගැටළුවලදී ලක්‍ෂ සංඛ්‍යාතවුන්ගේ අධිකාරය හා බලයට වඩා එක් මිනිසෙකුගේ සන්සුන් තර්කනය වටිනා බව’’ ගැලීලියෝ කීවේය. සිය සමකාලීන ලෝකයේ අධිගෘහිත අදහස් හා සංස්ථාපිත තත්ත්වයන් සමඟ සටන් කිරීම සඳහා ගෙවිය යුතු මිල පිළිබඳ ගැලීලියෝ මනාව දැන සිටියේය. ගැලීලියෝගේ උපන්‍යාසය නිවැරදි බව සිවරාම් සිය භාවිතයෙන්ම සනාථ කළේය.

කරුණාගේ බිඳීම

මරණයට වසරකට පමණ පෙරාතුව සිවරාම් ජර්මනියට පැමිණියේය. බලපෑම් සහගත පුද්ගලයින් කිහිප දෙනෙකු මුණගැසීම සඳහා සූදානම් කර තිබූ රැස්වීම් වාර කිහිපයකටම මම ඔහු කැටුව ගියෙමි. ති‍්‍රකුණාමල වරාය හා අත්‍යන්තයෙන්ම ගැටගැසී පවතින එක්සත් ජනපද හා බි‍්‍රතාන්‍ය අභිලාෂයන් විසින් සාම කි‍්‍රයාදාමය අස්ථාවර කරන ආකාරයත්, මැද පෙරදිග කලාපය තුළ එක්සත් ජනපද යුද කි‍්‍රයාමාර්ගයන්ගේ අවශ්‍යතා හා පීඩනයන් විසින් සාම කි‍්‍රයාදාමය විනාශ කිරීමට පෙර ජර්මානු ජනයා සාම කි‍්‍රයාදාමයට සහාය දැක්වීම සම්බන්‍ධයෙන් කි‍්‍රයාකාරී භූමිකාවකට මැදිහත්විය යුතු ආකාරයත් පිළිබඳ ඔහු විසින් කළ සෘජු හා ඒත්තු ගන්වන සුළු දීප්තිමත් විශ්ලේෂණයෙන් මම සැබැවින්ම විස්මයට පත්වීමි. ඇත්ත වශයෙන්ම සිවරාම් මියයන මොහොත වන විට ඔහු ප‍්‍රධාන කථිකයෙකු වශයෙන් සහභාගී වන රැස්වීම් ගණනාවක් මැයි මාසයේ අග දී ජර්මනියේ සංවිධානය කිරීමට අවශ්‍ය පියවර අපි ගනිමින් සිටියෙමු.

සිවරාම් හුදෙක් බටහිර පරිභෝජනයට ගැළපෙන පරිදි තොරතුරු සංගෘහිත කිරීමට සමත් වූ ඵලදායී ප‍්‍රචාරකයෙකු පමණක් නොවීය. ඔහු තමන් පැවත එන්නා වූ දෙමළ සමාජයේ දේශපාලනය තුළ මුල් බැසගත් අයෙක් විය. දෙමළ සමාජයේ අභ්‍යන්තර දේශපාලනය සමඟ ඔහුට පැවතියා වූ සම්බන්ධයේ ගැඹුර බාහිර ලෝකයට විදාරණය කොට පෙන්නුම් කළා වූ නිදසුන් අවස්ථාවක් වන්නේ ‘කරුණා පිළිබඳ ප‍්‍රශ්නය’ හමුවේ ඔහු විසින් සිදුකළ ආකර්ෂණීය මැදිහත්වීමයි. දෙමළ ඊළාම් විමුක්ති කොටි සංවිධානය හැර ගිය සෙන්පතියෙක් වූ කරුණා, දෙමළ ජාතික ව්‍යාපාරය හා දෙමළ සමාජය කෙරෙහි සුවිශාල බාධකයක් බවට පත්වීමේ තර්ජනය මතු කරන ලදී. සිවරාම් මෙන්ම දිවයිනේ නැගෙනහිර පළාතෙන් ආ අයෙකු වූ කරුණා, සිවරාම් හොඳින් දැන හඳුනන අයෙකු විය. යුද සමයේ දක්‍ෂ හා දීප්තිමත් මිලිටරි නායකයෙකු වූ කරුණා නැගෙනහිර දෙමළ ජනයා අතර ඉමහත් ගෞරවාදරයට පාත‍්‍රවූවෙකි. ප‍්‍රචාරක සංග‍්‍රාමය ආරම්භ වීමත් සමඟම පාර්ශ්වික යුද්ධයක් මතුවනු ඇතැයි යන භීතිය හා ව්‍යාකූලත්වය නොවැළැක්විය හැකි ලෙස දෙමළ ප්‍රජාව තුළ නැගී ආයේය. නමුත් දෙමළ සමාජය තුළ සිවරාම් විසින් කරන ලද දේශපාලනික මැදිහත්වීම අර්බුදයේ තීව‍්‍රතාව අවම කිරීම අරභයා අතිමහත් ලෙස දායක විය. සැබැවින්ම අනතුරට පත්ව ඇත්තේ කුමක්ද යන්න පිළිබඳව සිවරාම් විසින් සෘජු හා දෝෂ විරහිත ශෛලියෙන් දෙමළ සමාජයට කරුණු කියා පෑවේය. අව්‍යාජ තර්කයන් හා අවස්ථාවාදී තර්කයන් අතර සුපැහැදිලි බෙදුම් රේඛාව ඔහු විසින් ඇඳ පෙන්වන ලදී. මෙම පාර්ශ්වික ගැටුම ප‍්‍රමුඛත්වයට පැමිණියහොත් ඉන් වාසි ලබනු ඇත්තේ කවුරුන්ද යන වග හෙතෙම ඉතා මැනවින් පෙන්වා දුන්නේය. සමාජයේ සංසක්තභාවය ආරක්‍ෂා කරගැනීමේ ඇති වැදගත්කමත්, දුෂ්කරතා මධ්‍යයේ දිනාගත් ජනතා පරමාධිපත්‍යය රඳවා ගැනීමේ ඇති අවශ්‍යතාවත් ඔහු විසින් තීක්‍ෂණ ලෙස පැහැදිලි කරදෙන ලදී.

කොංගෝව ගැන

ලෝකයේ බොහෝ පැතිවල සිදු වූ සමාජ බිඳවැටීම්වල ප්‍රතිවිපාක පිළිබඳ සිවරාම් සතු වූ අත්දැකීම් සම්භාරය අති විශාල විය. ඔහු ජර්මනියේ බ්‍රේමන් නගරයේ සාකච්ඡාවන්ට සහභාගී වූ දිනවල කොංගෝවේ සුවිශාල සමූල ඝාතන හා විනාශයන් මගින් බටහිර මහා පරිමාණ වෙළඳ ව්‍යාපාර ලාභ ලබන ආකාරය දීර්ඝ හා විස්තීරණ ආකාරයෙන් අප හමුවේ විග‍්‍රහ කරනු ලැබීය. ක්‍ෂුද්‍ර පරිපථයන්ට හා ජංගම දුරකථනයන්ට අත්‍යාවශ්‍ය වන අතිශයින් මිල අධික කොලම්බයිට් ටැන්ටලයිට් හෙවත් ‘කොල්ටන්’ ඛනිජය ඉතා අඩු මිලට ගැනීමට අවකාශ සළසා දීම වෙනුවෙන් බටහිර නිශ්චිත මහා සමාගම් ගණනාවක් විසින් වෙනස් බල ප‍්‍රදේශ සහිත යුද්ධාධිපතින්ට වාසි සහගත ලෙස කටයුතු කරන ආකාරය ගැන හෙතෙම අතිශයින් වැදගත් විශ්ලේෂණයක් සිදුකරන ලදී. සමාජයේ අභ්‍යන්තරික කඩා වැටීමක් තිබියදී, කොල්ටන් හා වෙනත් ඛනිජ ද්‍රව්‍ය විකිණීම සඳහා යුද්ධාධිපතීන් එකිනෙකා තරඟවැදීම විසින් අදාළ ඛනිජ මිල වේගයෙන් පහළ දමනු ලැබීම වැළැක්විය නොහැකි ය. මේ අනුව කොංගෝවේ ලක්‍ෂ සංඛ්‍යාත ජනයා මිය යාම අනිවාර්ය වන නමුත් ජංගම දුරකථන සඳහා කොල්ටන් ලාභදායී ලෙස සැපයුම බාධා විරහිතව පැවතීම ද අනිවාර්ය විය. කරුණා පිළිබඳ අර්බුදයේදී සිවරාම්ගේ මැදිහත්වීම හුදෙක් දෙමළ සමාජයේ ගැඹුරට පමණක් සීමා වූවක් නොව, ඔහුගේ ස්ථාවරයන් හා විශ්ලේෂණයන් ඉන් පරිබාහිර ලෝකයට ද පරාවර්තනය විය. සිංහලයෙකු වශයෙන් කරුණාගේ ප‍්‍රශ්නය පිළිබඳ සුවිශාල ආලෝචනාවන් මා වෙත සම්පාදනය කරගනු ලැබුවේ සිවරාම් විසින් ඉංගීසි බසින් ලියන ලද ලිපි මගිනි. එබැවින් ඔහුගේ සිතුම් සහ කි‍්‍රයාකාරීත්වයන් අතර ඒකාබද්ධතාව දෙමළ සමාජය අභ්‍යන්තරයෙන් මෙන්ම බාහිරින් ද එක සේ පැවතිණ. ඔහු යථාර්ථය හැමවිටම එහි සමස්තය තුළ තබා විග‍්‍රහ කළේය. ස්වකීය බුද්ධිමය ස්වෛරීභාවය සිවරාම් වැදගත්කොට සළකා ආරක්‍ෂා කරගන්නා ලද්දේ දෙමළ ජනයාගේ ස්වෛරීභාවය ආරක්‍ෂා කරගැනීමේදී දැක්වූ දෘඪතාවෙන්ම යුතුවය. මේ අර්ථයෙන් සැළකූ විට සිවරාම් හුදු ප‍්‍රචාරකයෙකු නොව, සත්‍ය ගවේෂකයෙකු හා සත්‍ය වෙනුවෙන් සටන් කරන්නෙකු ද විය.

සිවරාම් ඝාතනය ලක්වන විට, ඔහු කළ කාර්යයන්ගේ එකිනෙකට වෙනස් පැතිමානයන් රමණීය ලෙස සංයෝග වෙමින් තිබුණි. නමුත් ඔහු කළ වැඩ කොටසෙහි බහුවිධ මානයන්ගේ අරුත ඔහුට බොහෝ සතුරන් සිටි බව ය. ඔහුගේ මරණයට වගකිව යුත්තේ කවුරුන්ද? ඔහුගේ ඝාතනයන් සොයා ගනු ඇතිද?

බහුවිධ සතුරන්

පසුගිය වසරේ සිවරාම් ජර්මනියේ සිටින සමයේ ඔහුගේ මිතුරෙකු වූ නඩේසන් මරා දැමිණ. ශ්‍රී ලංකා රජය මේ දක්වා කිසිදු වගඋත්තරකරුවෙකු සොයාගෙන නොමැත. ඔහුගේ තවත් සගයෙකු වූ බි‍්‍රතාන්‍ය ගුවන් විදුලියේ සේවය කළ නිමලරාජන් ඊට පෙර මරා දැමිණ. රජයට අනුව ඔහුගේ ඝාතකයන් කවුරුන්දැයි තවමත් නොදනියි. දැන් සිවරාම් ද මරා දමා තිබේ. ඔහු මරා දැම්මේ කවුරුන් විසින්ද? මා සිතන ආකාරයට එය අගතා කි‍්‍රස්ටි විසින් ලියන ලද අභිරහස් නවකතාවක් වන The Murder on the Orient Express වැන්නකි. ඊට අනුව සෑම සැකකරුවෙකුම ඝාතනයට සම්බන්‍ධ බව පෙනී යයි. සිවරාම් විසින් හෙළිදරව් කරන ලද සියලුම පුද්ගලයින්ට ඔහුගේ මරණය දැකීමේ අභිප්‍රාය තිබිණ. සූරාකෑමේ නියැළුණවුන්ටද, ජනතාව අතර බෙදීම් ඇතිකොට ශක්තිමත් කළවුන්ට ද, ජාතිවාදය ප‍්‍රවර්ධනය කළවුන්ටද, දිවයිනේ ඇතැම් ප‍්‍රදේශයන්හී ආධිපත්‍යධාරී බලයක් අපේක්‍ෂා කළ බාහිර බලවේගයන්ට ද යන සියල්ලන්ට ඔහුගේ මරණය ප‍්‍රාර්ථනා කරන්නට හේතු සමුදායක් තිබුණි. සිවරාම් මරා දමන්නට මින් කවර බලවේගයන් සන්ධානගත වීද යන්න තවමත් අනාවරණය කර නොගත් අභිරහසකි. නමුත් ඔහුගේ මරණයෙන් මේ සියල්ලන්ට ප්‍රතිලාභ අත් වූ බව නම් පැහැදිලි ය.

ඔහු කායිකව ඝාතනය කිරීමෙන් ඔහුගේ සතුරන් සෑහීමකට පත් නොවේ. ඔහු සටන් කොට සුරැකි අදහස් අවමානයට පාත්‍ර කිරීමට ද ඔවුන්ට අවශ්‍යව තිබේ. ඔහුගේ අදහස් හා ඉටුකළ කාර්යය විකෘත කිරීමේ අටියෙන් ස්වකීය අභිමථාර්ථයන්ට අනුකූල ලෙස සිවරාම්ගේ ප‍්‍රතිරූපය යළි ගොඩනැංවීමට උනන්දුවක් දක්වන්නවුන් එමට ය. නිදසුනක් ලෙස දයාන් ජයතිලක වැනි සිංහල ප‍්‍රකාශකයින් සිවරාම්ගේ තර්කනයේ රූපකාරය එහි අන්තර්ගතයෙන් වෙන්කිරීමට උත්සාහ කරනු දැකිය හැක. ස්වකීය ජනයා සහ ඔවුන්ගේ අරගලය සමඟ සිවරාම්ට පැවැති සම්බන්‍ධය විසන්‍ධි කිරීමට ඔවුන්ට අවශ්‍යව තිබේ. ඔහු දිවිහිමියෙන් පෙනී සිටි දෙය විනාශ කිරීම පිණිස ඔවුහු සිවරාම්ට ප‍්‍රශංසා කරති. නමුත් සත්‍යය වන්නේ සිවරාම් ස්වකීය දිවි පරදුවට තබා ප‍්‍රකාශනයක් ලබාදෙන ලද්දේ පිබිද එන ජනතාවකට ය. දෙමළ ජනයාගේ අරගලය සිවරාම්ගේ දීප්තිමත්භාවයෙන් කඩා වෙන් කළ නොහැකිය. යුදවන් වකවානුව වූ කලී අඳුරු කුරුබිලියක් තුළ ගමන් කිරීමක් හා සමාන බවත්, සාම කි‍්‍රයාදාමය එකී කුරුබිලියෙන් බැහැරට ඒමට ඇති මාවත බව ද වේලූපිල්ලේ ප‍්‍රභාකරන් වරක් ප්‍රකාශ කොට තිබුණි. යුද වකවානුවකදී අත්‍යවශ්‍යයෙන්ම පටු ආකාරයක් ගන්නා ප්‍රජාතාන්ත්‍රික ක්‍රියාදාමයන් සාමකාමී වකවානුවක් තුළ වේගයෙන් වෙනස් කළ යුතු බවත්, සජීවී විවාදයන්ට ප්‍රකාශ වීමට අවාකශ සැළසෙන පරිදි සකළ විධ සීමාවන් පුළුල් විය යුතු බවත් ඔහු ඉන් අදහස් කළේය. සිවරාම්ගේ ශක්‍යතාවන් පෝෂණය වූයේ මෙම කොන්දේසි යටතේය. අරගලය ආයුධවලින් වචනවලට මාරුවන සැණින් සුපිරිතර රණකාමියා සිවරාම් විය. ඔහුගේ අරමුණ සත්‍යවාදී වූ අතර එය පැන නැගුණේ තුවක්කු බටයෙන් නොව, පෑන් බටයෙනි. දෙමළ සමාජය තුළ පංති අරගලය පෙරට තල්ලූ කිරීම සම්බන්‍ධයෙන් හෝ සාම උගුලේ අනතුරු පිළිබඳව හෝ ඔහු විසින් දෙමළ මාධ්‍යයන්ට ලියන ලද ලිපි මඟින් වේවා, සිංහල ජාතිවාදය හා බටහිර අභිලාෂයන් පිළිබඳව ඔහු විසින් කොළඹ ඉංගී‍්‍රසි මාධ්‍යයන්ට ලියන ලද ලිපි මඟින් වේවා, යුද්ධය පුපුරා යාමේ තර්ජනය පිළිබඳව බටහිර ධනවත් රාජ්‍යයන්හි දී ඔහු විසින් පවත්වන ලද කතා තුළින් වේවා සිවරාම් සතු මෙම බලය නිරායාසයයෙන් ‍ඒත්තු ගන්වනු ලැබුණි.

දෙමළ ජනයා සහ සිවරාම්

ආචාර්ය එස් සදානන්දන් පෙන්වා දී ඇති ආකාරයට ‘‘සිංහල ජාතිවාදය වඩාත් කුපිත කරවනු ලැබුවේ ලෙනින්ගේ වැදගත් සිද්ධාන්තයක් සිවරාම් අතිශය විනාශකාරී බලපෑමක් සහිතව භාවිතාවේ යෙදවීම විසිනි: සැබැවින්ම සිදුවෙමින් පවතින්නේ කුමක්ද යන්න පැහැදිලි කිරීමට සිවරාම් තමන්ගේ කාර්යය සීමා කරගත් අතර සිදුවිය හැක්ක ගැන, වඳ සමපේක්‍ෂණයන්ගේ පැටලීමට හෙතෙම උත්සුක නොවීය.’’

දෙමළ විමුක්ති කොටි සංවිධානය විසින් නායකත්වය සැපයූ දෙමළ ජනයාගේ අරගලයෙන් සිවරාම් වෙන් කොට දැක්වීමට තැත් දරන දයාන් ජයතිලක වැන්නන්ට යොමු කිරීමට ප්‍රශ්නයක් මට තිබේ. බුද්ධිමතෙකු වටා වන සමාජයේ හා ජනතාවන්ගේ අඛණ්ඩ සංවර්ධනයකින් තොරව ඔහුගේ පූර්ණ සංවර්ධනයක් සිදුවිය හැකිද? බේතෝෆන් ප‍්‍රකට කළාවූ දීප්තිමත්භාවය විසින් රදළ බලවේගයන්ට එරෙහිව නැගීගත් ජර්මානු ධනේශ්වරය තුළ වර්ධනය වන විශ්වාසය පරාවර්තනය නොකළේද? වෙනස් වකවානුවක වුව ද, සිවරාම්ගේ වර්ධනයන් සහ කාර්ය සාධකතාව වූ කලී එපරිද්දෙන්ම නැගී ගත් දෙමළ ජනයාගේ සාමූහික ආත්ම විශ්වාසයේ බුද්ධිමය ප‍්‍රකාශනයක් විය.

ජනතා විමුක්ති පෙරමුණ දයාන් ජයතිලකටත් වඩා පියවරක් ඉදිරියට ගොස් ඇති බව පෙනෙන්නට තිබේ. මැයි 03 වෙනිදා ශී‍්‍ර ලංකා රජයේ ‘ලක්හඬ’ ගුන් විදුලියේ සාකච්ඡාවකට එක්වෙමින් ජවිපෙ නොනිල ප‍්‍රකාශනය වූ ලංකා පුවත්පතේ කර්තෘ මාණ්ඩලිකයෙකු තදබල ලෙස තර්ක කරමින් කියා සිටියේ සිවරාම් මරාදමනු ලැබුවේ එල්.ටී.ටී.ඊ. සංවිධානය විසින් බව ය! සිවරාම් ඝාතනයට සතියකට හෝ දෙකකට පෙරාතුව ‘සිවරාම් යනු කොටියෙක්’ යැයි කියමින් විසකුරු ප‍්‍රචාරයක් ගෙනගිය ප‍්‍රකාශනයක් හා සංවිධානයක් විසින් මෙවැනි තර්කයක් ගොඩනැගීම බැලූ බැල්මට උත්ප‍්‍රාසජනක විය හැකි ය. නමුත් ඊට වැඩිමනත් දෙයක් ද තිබේ. ජවිපෙ තර්කය වී ඇත්තේ මරණයට මෑත දී, සිවරාම් ජවිපෙ හා සහානුභූතී වෙමින් ලියන ලද ලිපිය, එල්.ටී.ටී.ඊ.ය පිළිවෙත් පිළිබඳ ඔහුගේ විවේචනාත්මක ආස්ථානය හඟවන බවත්,  ඒ නිසා කොටින් විසින් සිවරාම් ඝාතනය කළ බවත් ය. ලාංකීය මාධ්‍යයන්ට යථාර්ථය කෙතරම් පහසුවෙන් විකෘති කළ හැකිද යන්න පිළිබඳ දැනුවත් අයෙකු වශයෙන් මෙම තර්කය සමඟ ගණුදෙනු බේරාගැනීමට මම බැඳී සිටිමි.

ජවිපෙ සහ අසීමිත ශුභවාදය

සිවරාම්ගේ චරිතයේ වූ සුවිශේෂි ලක්‍ෂණයක් වූයේ ඔහු සතුවූ විවෘතභාවයයි. ඕනෑම අයෙකුට ඔහුට ළඟාවිය හැකිව තිබූ අතර  ඕනෑම අයෙකුගේ අදහස්වලට ඔහු විවෘතව සිටියේය. ඔහු මුළුමණින්ම කට්ටිවාදයෙන් තොරවූවෙක් විය. ඔහු සීමාරහිත ශුභවාදියෙක් වූ අතර සිංහල සහ දෙමළ ජනයා එක්සත් කළ හැකි මාවත් පිළිබඳව සීමාරහිත ගවේෂකයෙකු විය. ඉන්දීය සාම සාධක හමුදාව උතුරු සහ නැගෙනහිර කඳවුරු බැඳ සිටි සමයේ දෙමළ ජාතික ව්‍යාපාරය හා ජවිපෙ එක්සත් කළ හැකි බවට සිවරාම් විශ්වාස කළ බව මම දනිමි. සිංහල සහ දෙමළ ජනයාගෙන් සැළකිය යුතු තරම් බහුතරයක් මෙන්ම ශී‍්‍ර ලංකා ආණ්ඩුවම පවා ඉන්දීය හමුදාවන් රැඳී සිටීමට විරෝධය දැක්වූ තත්ත්වයක් යටතේ මූලධාර්මික සමගියක් සඳහා පදනමක් එහි පැවතිණ. දීර්ඝකාලීනව මුල් ඇදුණු දෙමළ විරෝධී ජාතිවාදයේ රැහැන් බිඳ දැමීමට තරම් බලවත් ශක්‍යතාවක් ඒ තුළ පෙනෙන්නට තිබිණ. සිවරාම්ගෙන් මුළුමණින්ම ස්වාධීනව වුවද මම පවා පෞද්ගලිකව මෙය පිළිගත් අතර ජවිපෙ සාමාජිකයන් වශයෙන් කි‍්‍රයා කළ සිංහල පීඩිත ජනයා කෙරෙහි අව්‍යාජ කැපවීමක් සහිත සුවිශේෂී ශිෂ්‍ය නායකයන් කිහිප දෙනෙක් සමඟ සමීපව කටයුතු කිරීම විසින් මගේ විශ්වාසය වඩ වඩාත් ප්‍රත්‍යක්‍ෂ වුණි. රාජ්‍ය හමුදාවන් විසින් දස දස් සංඛ්‍යාත ස්වකීය සාමාජිකයන් සමූල ඝාතනය කරනු දැක දැකත් මෙකී ශිෂ්‍යයන් විසින් අඛණ්ඩව අරගලයේ නිරත වෙමින් පෙන්නුම් කළා වූ විරෝධාරත්වය සැබැවින්ම ආවේශී එකකි. තීව‍්‍ර වූ සන්නද්ධ අරගලයත්, තම ජීවිතවලට එල්ල වූ අවදානමත්, විප්ලවකාරී වටපිටාවත් මෙකී ජවිපෙ අනුගාමිකයින්ගේ මනස් විවෘත කරනු ලැබ තිබූ අතර දෙමළ ජනතාව සමඟ වන සම්බන්‍ධතාවයේ සිට සෙසු සියල්ල පිළිබඳ නව විප්ලවකාරී ආකාරයකින් සිතීමට බලකරන තත්ත්වයන් ඔවුන් හමුවේ නිර්මාණය වී තිබුණි. මිනීමරු හමුදාවන්ගෙන් සැඟවී එක්ව ගතකළ සමයේ මා සහ ඔවුන් අතර මේ පිළිබඳ ගැඹුරු සහ විනිවිදින සාකච්ඡා බොහෝ ඇති විය.

මගේ සමීපතම සහෝදරයා වූ මානව හිමිකම් සුරැකීමේ ශිෂ්‍ය සංවිධානයේ නායක ගැමුණු යසස් හෙවත් ගයාන්‍, රෝහණ විජේවීර විසින් ලියන ලද ලංකාවේ ජාතික ප‍්‍රශ්නය පිළිබඳ කෘතිය ඉංගී‍්‍රසි බසට පරිවර්තනය කිරීමට කටයුතු සැළසුම් කරමින් සිටි අතර මටත්, වෙනත් කිහිප දෙනෙකුටත් එහි අඩංගු තර්කයන්ට ප‍්‍රතිචාර දැක්වීමට අවකාශ සැළසීමද එහි එක් අරමුණක් විය. (ලැජ්ජාවට හේතුවන කරුණක් වුවද, දීර්ඝ කාලාන්තරයක් ලංකාවෙන් බැහැරව ජීවත්වීමේ ප‍්‍රතිඵලයක් වශයෙන් ඉහත කෘතියේ අඩංගු සංකීර්ණ තර්කනයන් සිංහල බසින් කියවා වටහා ගැනීමට අපොහොසත් වීමේ ගැටළුවෙන් මම පෙළුණි.) මෙකී කෘතියට ඉංගී‍්‍රසියෙන් කියවා විධිමත්ව ඊට පිළිතුරු දීමට සූදානම්ව සිටි තවත් අයෙකු වූයේ සිවරාම් බව මම දැන් දනිමි. දකුණේ අරගලයේ වැඩිවන අවදානම සහ අරගලකාරී උණුසුම තුළ ජනතා විමුක්ති පෙරමුණේ නායකත්වය පසුගාමී හා ප‍්‍රාදේශීයවාදී සිංහල ජාතිවාදී මාවතින් ගළවා ජාතීන්ගේ ප‍්‍රශ්නය පිළිබඳ ලෙනින්ගේ මූලධාර්මික ආස්ථානය මත පිහිටුවාලිය හැකිවනු ඇතැයි මම සැබැවින්ම විශ්වාස කළෙමි. සිවරාම් ද එකී සුබවාදී විශ්වාසයේ කොටස්කරුවෙක් වූ බව මට ඒකාන්ත වශයෙන්ම විශ්වාස ය. දෙමළ ජාතික විමුක්ති අරගලයට මවිසින් දක්වන ප‍්‍රතිපත්ති මූලික සහාය ජවිපෙ පිළිබඳ මා දැරූ එම ස්ථාවරය විසින් අංශුවකුදු වෙනස් නොකරන ලද අතර සිවරාම්ගේ තත්ත්වය ද එයම විය.

සිංහලයන් පිළිබඳ අපේක්‍ෂාව

සුනාමිය සමඟ බාහිර බලවේග සහ රාජ්‍ය නොවන සංවිධාන වේගයෙන් රට තුළ කාවදින තත්ත්වයක් හමුවේ ස්වෛරීභාවය ආරක්‍ෂා කරගැනීමට සමත් ශක්‍යතා සහිත බලවේගයන් සිංහල සමාජය තුළින් ද සොයාගැනීමේ උනන්දුවක් සිවරාම්ට තිබූ බව මම විශ්වාස කරමි. කවර හෝ ආකාරයක ‘බටහිර ආධාර’ පිටුපසින් වන පෙළඹුම් හේතු පිළිබඳ සිවරාම් හැමවිටම සැක කළේය. ජනවාරියේදී කොන්ඩොලීසා රයිස් විසින් ප‍්‍රකාශ කරන ලද්දේ ‘සුනාමිය වූ කලී අපහට විශේෂිත ප‍්‍රතිලාභ උපයා දුන් විශ්මයජනක අවස්ථාවක්’ බවයි. මෙකී ප‍්‍රකාශය බුෂ් පරිපාලනයේ කාලෝස් පැස්කුවල්ගේ ’’ජාතියක සමාජ වියමන වෙනස් කිරීමේ’’ පෙර සැළැස්ම සමඟ මනා ලෙස ගැලපේ. ඔවුන්ගේ සැළැස්ම වන්නේ පැරණි රාජ්‍යයන් යළි ගොඩනැංවීම නොව, ‘ප‍්‍රජාතාන්ති‍්‍රක සහ වෙළඳ පොළ කේන්‍ද්‍රීය රාජ්‍යයන්’ නිර්මාණය කිරීමයි. සුනාමී විනාශය හේතුවෙන් දැවැන්ත මානුෂික ප‍්‍රතිචාරයන් වේගයෙන් ලොව දස අතින් ළඟා වූ බව ඇත්තකි. නමුත් ප‍්‍රශ්නය වූයේ සුනාමියෙන් පහර කෑ ජනතාවන් හා ඔවුනට උපකාර කිරීමේ අවශ්‍යතාවෙන් පෙළුණු ප‍්‍රජාවන් වශයෙන් වන සරල බෙදීමකින් ඔබ්බට ගිය යථාර්ථයන් ඒ තුළ පැවතීමයි. මේ අතර මැද තවත් බොහෝ දේ තිබිණ. එහි ප‍්‍රතිඵලයක් වූයේ මෙකී සමස්ත මානුෂික ප‍්‍රතිචාරයන්ම කළමනාකරණය කරන්නා වූ මෙහෙයුම් පිටුපස වූ ගාමක බලය, බටහිර රාජ්‍යයන්ගේ අභිලාෂයන් වීමයි.

සිංහලයන් මෙකී සැළසුම්වලට එරෙහිව ස්වකීය ස්වෛරීභාවය වෙනුවෙන් සටන් කරනු දැකීම සිවරාම්ගේ අවශ්‍යතාව වූ බව නිසැක වූ අතර දශක කිහිපයකට පෙරාතුව කෙන්යානු ලේඛක න්ගුයෙන් වා තියෙන්ගෝ කී පරිදි ඔහුට අවශ්‍ය වූයේ ජනයා එක්සත්ව හඬ නගනු දැකීමයි. තියෙන්ගෝ මෙසේ ලීවේය:

‘‘ඔබගේ සියළුම ප‍්‍රයෝගයන් සඟවා ගත් සළුපිළි පිළිබඳ සියළු රහස් දැන් අපි දන්නෙමු. ඔබම ඝාතනයන් සිදුකොට, අනතුරුව ශෝකයේ සළු හැඳ එහි ගොස් අනාථයින්ගේ හා වැන්දඹුවන්ගේ නෙත කඳුළු පිසියි. මැදියමේදී ඔබ ජනයාගේ ආහාර ගබඩා බිඳ ආහාර කොල්ල කා, අරුණෝදයේ දී ඔබේ පුණ්‍යවන්තභාවයේ සළු හැඳ එම ජනයා අතරට ගොස් රාති‍්‍රයේදී කොල්ල කා ගත් ධාන්‍ය ලබු කැට පුරවා ඒ ජනයා අතරෙහිම බෙදයි. ඔබ හුදෙක් ඔබගේම  ආශා පිනවාගැනීම සඳහා කාමුකත්වයට අනුබල දී අනතුරුව ධාර්මිකභාවයේ සළු හැඳ ජනයා අතරට ගොස් පශ්චාත්තාප වන ලෙසත්, පාරිශුද්ධත්වයේ මාවත් පෙන්වා දීම සඳහා ඔබ පසුපස එන ලෙසත් දන්වයි. ඔබ මිනිසුන්ගේ ධනය පැහැරගෙන, අනතුරුව මිත‍්‍රත්වයේ ලෝගු හැඳ කොල්ලකෑමෙහි යෙදුණ දුෂ්ඨයන් ලූහුබැඳ යන මෙන් ජනයාට උපදෙස් සපයයි.’’

සිවරාම් සහ වෙනම රාජ්‍යය

ඉන්දීය හමුදා දිවයිනට පැමිණි ‘80 දශකයේ පසු භාගයේදී මෙන්ම, ඔහුගේ මරණයට පෙර ද සිවරාම් ජවිපෙ තුළ යම් යහපතක් දකින්නට වෑයම් කළේය. නමුත් සිවරාම් පිළිබඳ මතකයට ගර්හා කරන්නට ජවිපෙ විසින් යොදාගනු ලැබ ඇත්තේ ද සිවරාම් තුළ බලපැවැති මෙකී යහපත් සුබවාදී අපේක්‍ෂාවයි.

2003 ඔක්තෝබරයේදී හිරු කණ්ඩායම විසින් කොළඹ දී සංවිධානය කළ සිංහල – දෙමළ සංස්කෘතික සමුළුවේ කතා කළ සිවරාම්ගෙන් කෙනෙක් අසන ලද්දේ, ඔහුට එතරම් ජීවිත අනතුරක් ඇති කොළඹ නගරයේම ජීවත්වන්නේ මන්දැයි කියා ය. වෙඩි ප්‍රහාරයකට ලක්ව ඝාතනය වීමේ ඉරණමට ගොදුරු නොවී දෙමළ මාධ්‍යවේදියෙකුට කොළඹ සිට ක්‍රියා කළ නොහැකි නම්, දෙමළ ජනයාගේ වෙනම රාජ්‍යයක් සඳහා වූ අවසාන කොන්දේසිය ද සැපිරෙන බව සිවරාම් කීවේය.   ජීවිතය කෙරෙහි එල්ල වූ බරපතල අවදානම මැද පවා කොළඹ ජීවත්වීමට තරම් එඩිතරවීම ඔස්සේ සිවරාම් සිය  ජීවිතය තුළින් ප‍්‍රකාශයට පත් කිරීමට උත්සාහ කරන ලද්දේ සිංහල සහ දෙමළ ජනයා අතර සහයෝගීතාව සඳහා තවදුරටත් ඇති අවකාශයයි. ඔහුගේ ඝාතකයින් විසින් මෙය කළ නොහැක්කක් බවට පෙරළා ඇත්තේද?

මෙම ප‍්‍රශ්නයට පිළිතුරක් සපයා දෙනු ඇත්තේ අපගේ කි‍්‍රයාකාරීත්වයන් විසිනි. (2005.05.04)

විරාජ් මෙන්ඩිස්

© JDS

 

#Gota Go Home 2022 ජනඅරගලයට ජනමාධ්‍යවේදීන්ගේ සහාය! පාගමන අප්‍රේල් 20 පස්වරු 3.00 කොටුව දුම්රිය පොළ අසළින්.

# Gota Go Home, ජනඅරගලයට සහය පළකරමින් අරගලයට සම්බන්ධවීම පිණිස ජනමාධ්‍යවේදීන්   කොටුව දුම්රිය පොළ අසළින් පාගමනක් සංවිධානය කොට ඇත.
එම පාගමන අප්‍රේල් 20 පස්වරු 3.00 කොටුව දුම්රිය පොළ අසළින් පිටත්වීමට නියමිත අතර රටපුරා විසිරී සිටින මාධ්‍යවේදීන් මෙම පාගමනට සම්බන්ධවීමට නියමාත ය. පාගමන සම්බන්ධයෙන් මාධ්‍ය සේවක වෘත්තීය සමිති සම්මේලනය නිකුත් කළ මාධ්‍ය නිවේදනය සම්පූර්ණයෙන් පහත පළවේ.

 

මාධ්‍ය නිවේදනය

 2022 අප්‍රේල් 18

#Gota Go Home 2022 ජනඅරගලයට ජනමාධ්‍යවේදීන්ගේ සහාය!

පාගමන අප්‍රේල් 20 පස්වරු 3.00 කොටුව දුම්රිය පොළ අසළින්.

ගෝඨාභය රාජපක්ෂ ආණ්ඩුවේ ජනපීඩනය දරාගත නොහැකිව සවයංසිද්ධව ආරම්භ වූ ජනඅරගලයට දින 10 ඉක්මවමින් තිබේ. සකල විධ භේදයන්ගෙන් තොරව ආරම්භ වූ රජයට එරෙහි අරගලය, රටේ ජනතාවට බලය පවරන ලෙසට බලකරමින් රටපුරා විහිදුනු වර්‍ධනය වෙන ජනඅරගලයක් බවට පත්වෙමින් තිබේ.

මේ ජනඅරගලයට, ලංකාවේ සියළු ජනමාධ්‍යවේදීන් කිසිදු සංවිධානම ය, වෘත්තීම ය, භාෂාම ය භේදයකින් තොරව පූර්‍ණ සහය පලකිරිීමට තීරණයකර තිබේ. ඒ වෙනුවෙන් ලංකාව පුරා විසිරී සිටින ජනමාධ්‍යවේදීන් සංවිධානය කරනු සහයෝගිතා පාගමන අප්‍රේල් 20 වෙනි දින පස්වරු 3.00 කොටුව දුම්රිය පොළ අසලින් ආරම්භ වේ.

ගාළුමුවදොර ජනඅරගල විරෝධතාවට සහාය පළකෙරෙන මෙම පාගමනට සංවිධානමය හෝ වෘත්තීම ය, භාෂාම ය භේදයකින් තොරව සහභාගීවෙන ලෙස මාධ්‍ය සේවක වෘත්තීය සමිති සම්මේලනය දිවයින පුරා විසිරී සේවය කරන මාධ්‍යවේදීන්ගෙන් සහෝදරත්වයෙන් ඉල්ලා සිටී.

රටේ ම ජනතාව විසින් ජනපීඩාකාරී රජයට එරෙහිව සංවිධානයකර ඇති ජනඅරගල සහයෝගිතා පාගමනට සහභාගීවීමට මාධ්‍ය ආයතන ප්‍රධානීන්ට ද ගෞරවයෙන් ආරාධනයකර සිටී. එසේම සිය මාධ්‍ය ආයතන තුළ සේවය කරන සියළු මාධ්‍යවේදීන්, මාධ්‍යවේදිනියන්හට මේ පාගමන සඳහා සහභාගීවීමට අවසර ලබාදෙමින්, ඔවුන් එදින පස්වරුවේ සේවයෙන් මුදාහැරීමට කටයුතු කරන ලෙස ද මාධ්‍ය සේවක වෘත්තීය සමිති සම්මේලනය මාධ්‍ය ආයතන ප්‍රධානීන්ගෙන් කාරුණිකව ඉල්ලා සිටී.    

විශ්වාසී,

ධර්‍මසිරි ලංකාපේලි

ප්‍රධාන ලේකම්

 

ආණ්ඩුව හැර සෙසු පක්ෂවලට “තරුණ ජනමාධ්‍යවේදීන්ගෙන් ” කරුණු 10ක ලිපියක්

වර්තමානයේ ඇතිවී තිබෙන තත්ත්වය සම්බන්ධයෙන් ශ්‍රී ලංකා තරුණ ජනමාධ්‍යවේදීන්ගේ සංගමය පාර්ලිමේන්තුවේ කෙලින්ම ආණ්ඩුව නියෝජනය කරන පක්ෂ හැර සෙසු පක්ෂ නායකයන්ට සහ මන්ත්‍රීවරුන්ට ලිපියක් යොමු කර තිබේ.
එම සම්පූර්ණ ලිපිය පහත පළවේ.

සජිත් ප්‍රේමදාස මහතා, නායක, සමගි ජන බලවේගය.

ආර් සම්පන්දන් මහතා, නායක, ඉලංකෙයි තමිල් අරුසුකච්චි,

අනුර කුමාර දිසානායක මහතා, නායක, ජාතික ජන බලවේගය.

රිෂාඩ් බදියුදීන් මහතා, නායක, සමස්ත ලංකා මහජන කොංග්‍රසය.

රාහුෆ් හකීම් මහතා, නායක, ශ්‍රි ලංකා මුස්ලිම් කොංග්‍රසය.

ගජේන්ද්‍ර කුමාර් පොන්නම්බලම් මහතා, නායක, අකිල ඉලංකෙයි තමිල් කොංග්‍රස්

සී වී විග්නේෂ්වරන් මහතා, නායක, තමිල් මක්කල් තේසිය කූට්ටනි

සෙල්වම් අඩෛක්කලනාදන් මහතා, නායක, ටෙලෝ

ධර්මලිංගම් සිද්ධාර්තන් මහතා, නායක, ප්ලොට්

ඒ එල් එම් අතාවුල්ලා මහතා, නායක, ජාතික කොංග්‍රසය

මනෝ ගනේෂන් මහතා, නායක,ප්‍රජාතන්ත්‍රවාදී ජනතා පෙරමුණ

රනිල් වික්‍රමසිංහ මහතා, නායක, එක්සත් ජාතික පක්ෂය

මෛත්‍රිපාල සිරිසේන, සභාපති, ශ්‍රි ලංකා නිදහස් පක්ෂය

ආණ්ඩුව නියෝජනය නොකරන සියලුම පක්ෂ නායකවරුනි, මන්ත්රීවරුනි,

කඩිනමින් පාර්ලිමේන්තුව කැඳවීම සහ ගෝඨාභය රාජපක්ෂ මහතාට ජනාධිපති ධුරයෙන් ඉල්ලා අස්වන ලෙස බලපෑම් කිරීම සම්බන්ධවයි!

ගෝඨාභය රාජපක්ෂ මහතාට ජනාධිපති ධුරයෙන් ඉවත් වන ලෙස බලකරමින් සහ වර්තමාන ආණ්ඩුවට ඉවත්වන ලෙස බල කරමින් කෙරෙන ජනතා අරගලය අධෛර්යමත් කිරීම සඳහා ආණ්ඩුව විසින් විවිධ මර්දනකාරී ක්‍රියාකාරකම් සිදු කරන අයුරු පසුගිය සති දෙක තුළ දක්නට ලැබිණි.

එවැනි මර්දනාකාරී වටපිටාවක් රටේ ක්‍රියාත්මක වෙද්දී, මහජනතාව නියෝජනය කරමින් පාර්ලිමේන්තුවට තේරී පත්වූ දේශපාලන පක්ෂවල ක්‍රියාකාරිත්වය ගැන සතුටුදායක මට්ටමක් මහජනතාව තුළ මෙන්ම අප තුළද නැත. මහජන අරගලයේ ප්‍රධාන සටන් පාඨය ජනාධිපතිවරයාට ඉල්ලා අස්වන ලෙස බලකිරීම වන අතර ජනාධිපතිවරයාගේ මෙන්ම රාජපක්ෂවරුන්ගේ බලය ද පාර්ලිමේන්තුව තුළ අක්‍රීය කිරීමට ඔබ පක්ෂවලට හැකියාව තිබියදී ඒ සඳහා උද්යෝගයෙන් සහ සක්‍රීයව කටයුතු කරන බවක් පෙනෙන්නට නැත.

විශේෂයෙන් ජනාධිපතිවරයාට එරෙහිව දෝෂාභියෝගකට අත්සන් ගැනීමේ කාර්යය ඔබ ආරම්භ කළ යුතුව තිබුණේ ජන අරගලය ආරම්භ කළ දිනවලදීම වුවද පාර්ලිමේන්තුවේ පසුගිය සතියේ විවාද අවසන්වනතුරුත් ඔබට එය සිදු කිරීමට නොහැකි විය. ඇතැම් පක්ෂ නායකයන් දෝෂාභියෝගයකට සහාය නොදක්වන බව මේ වන විටත් ප්‍රකාශ කර තිබේ.

ලසන්ත වික්‍රමතුංග ඝාතනය, කීත් නොයාර් පැහැරගෙන යාම, එක්නැලිගොඩ අතුරුදන් කිරීම සහ පෝද්දල ජයන්තට පහරදීම ඇතුළු ජනමාධ්‍යවේදීන්ට සම්බන්ධ සිදුවීම් රැසකට ගෝඨාභය රාජපක්ෂ ඇතුළු රාජපක්ෂවරුන්ට චෝදනා එල්ල වූ බව ඔබ සියලු දෙනාම හොඳාකාරව දන්නවා ඇතැයි අපි සිතමු. ඒ හේතුව සහ වෙනත් හේතු ගණනාවක් නිසා ශ්‍රී ලංකා තරුණ ජනමාධ්‍යවේදීන්ගේ මංගමය ලෙස අපගේ ස්ථාවරය ද මේ මොහොතේ ජනාධිපතිවරයා ධුරයෙන් ඉල්ලා අස්විය යුතු බවයි. රාජපක්ෂවරුන් ද තනතුරුවලින් ඉවත් කළ යුතු බව අපගේ ස්ථාවරයයි. ඔවුන් බලයේ සිටියහොත් ජනමාධ්‍යවේදීන්ට එරෙහිව සිදුවූ අපරාධවලටද යුක්තියක් බලාපොරොත්තු විය නොහැකි අතර යුක්තිය ඉෂ්ඨ වීම නතර කිරීමට කුමන්ත්‍රණකාරී වැඩ සිදු කිරීමට බොහෝ දුරට ඉඩ ඇත. එවැනි කුමන්ත්‍රණකාරී වැඩ ගැන ලසන්ත වික්‍රමතුංග විමර්ශනවලදී මෙන්ම වසීම් තාජුදීන් ඝාතන විමර්ශනවලදී ද අනාවරණය විය.

රටේ සෑම ප්‍රදේශයකින්ම ගෝඨාභය රාජපක්ෂ ජනාධිපතිවරයාට ඉල්ලා අස්වන ලෙස බලපෑම් කරද්දී වෙනත් දේශපාලන පක්ෂවල කටයුතු ගැන ද මේ වන විට ජනතාව ප්‍රශ්න කරන තැනට තල්ලු වී තිබේ.

එසේ හෙයින් මේ මොහොතේ වහාම මැදිහත්වී පහත ක්‍රියාමාර්ග ගන්නා ලෙස කාරුණිකව ඉල්ලා සිටිමු.
  1. මිරිහානේ පැවැති විරෝධතාවයේ දී ව්‍යාජ චෝදනා මත අත්අඩංගුවට ගත් පිරිස් වහාම මුදා හැරීමට අවශ්‍ය බලපෑම් කිරීම සහ මිරිහානේ උද්ඝෝෂණයේදී ජනතාවට පහර දුන් පිරිස් වහාම අත්අඩංගුවට ගැනීමට බලපෑම් කිරීම,
  2. විරෝධතා මර්දනය කිරීමට ගන්නා උත්සාහයන් පරාජය කිරීමට අවශ්‍ය බලපෑම් කිරීම,
  3. අරගලකරුවන්ට සහාය දක්වමින් සහ ආණ්ඩුවේ මර්දනකාරී ක්‍රියාකාරිත්වයට විරෝධය පළකරමින් රට පුරා විරෝධතා නොනවතින මාලාවක් සියලුම පක්ෂවල එකමුතුවෙන් හෝ වෙන් වශයෙන් හෝ සිදු කිරීම,
  4. ජනාධිපතිවරයාට ඉල්ලා අස්වන ලෙස කෙරන උද්ඝෝෂණ මාලාව විශේෂ තත්ත්වයක් සේ සලකා වහාම හෙටම (14) පාර්ලිමේන්තුව කැඳවන ලෙස කතානායකවරයාගෙන් ඉල්ලීමක් කිරීම,
  5. පාර්ලිමේන්තුව ඇතුළේ අග්‍රාමාත්‍යවරයාට එරෙහිව විශ්වාස භංග යෝජනාවක් ගෙන ඒම සහ ජනාධිපතිවරයාට එරෙහිව දෝෂාභිගෝයක් ගෙන ඒම,
  6. 20 වැනි ආණ්ඩුක්‍රම ව්‍යවස්ථා සංශෝධනය අහෝසි කරමින් පාර්ලිමේන්තුවේ යෝජනාවක් සම්මත කර ගැනීම,
  7. කඩිනමින් විධායක ජනාධිපති ධුරය අහෝසි කරමින් හෝ විධායක ජනාධිපතිගේ අත්තනෝමතික බලතල අහෝසි කෙරෙන 21 වැනි ආණ්ඩුක්‍රම ව්‍යවස්ථා සංශෝධනයක් ඉදිරිපත් කර සම්මත කර ගැනීම,
  8. නිශ්චිත කාලයක් ඇතුළත අලුත් ආණ්ඩුක්‍රම ව්‍යවස්ථාවක් ගෙන ඒම,
  9. රාජපක්ෂවරුන් කළ අපරාධවලට නීතිය ක්‍රියාත්මක කරන ලෙස බලපෑම් කිරීම,
  10. ජනතාව ස්වාධීනව කරන අරගලයේ හිමිකාරිත්වය කිසිම පක්ෂයකින් නොගැනීම,

මෙම යෝජනා ශ්‍රී ලංකා පොදුජන පෙරමුණ හැර සියලුම දේශපාලන පක්ෂවලට ඉදිරිපත් කරන අතර මේවා කඩිනමින් ක්‍රියාත්මක කරන ලෙස බල කර සිටිමු. මෙය ශ්‍රී ලංකා පොදුජන පෙරමුණට ඉදිරිපත් නොකරන්නේ එම පක්ෂයේ ප්‍රධානීන් දිගින් දිගටම අරගලය මර්දනය කිරීමට සහාය දක්වන බැවින් සහ රාජපක්ෂවරුන් ආරක්ෂා කිරීමට මැදිහත්වන බැවිනි.

ස්තුතියි.

මෙයට,

විශ්වාසී,

“ශ්‍රී ලංකා තරුණ ජනමාධ්‍යවේදීන්ගේ සංගමය”

 

මිරිහාන සාමකාමී උද්ඝෝෂණයට හා වාර්‍තා කළ මාධ්‍යවේදීන්ට එල්ල කළ ම්ලේච්ච ප්‍රහාරයේ වගකීම රජය භාරගත යුතුයි. – FMETU

තමන් මිරිකෙමිිින් සිටින ජීවනබර අඩුකර සහන සළසන ලෙස ඉල්ලා, නුගේගොඩ, මිරිහාන ප්‍රදේශයේ පැවති සාමකාමී උද්ඝෙෂණයට පොලීසිය හා ආරක්ෂා හමුදා විසින් එල්ල කළ මිලේච්ඡ ප්‍රහාරය හෙළා දකිමින් මාධ්‍ය සේවක වෘත්තීය සමිති සම්මේලනය ප්‍රවෘත්ති නිවේදනයක් නිකුත්කර තිබේ.

එම මාධ්‍ය නිවේදනය සමිපූර්ණයෙන් පහත පළවේ.               

මාධ්‍ය නිවේදනය, 2022 අප්‍රේල් 02

මිරිහාන සාමකාමී උද්ඝෝෂණයට හා වාර්‍තා කළ මාධ්‍යවේදීන්ට එල්ල කළ ම්ලේච්ච ප්‍රහාරයේ වගකීම රජය භාරගත යුතුයි.

තමන් වෙත එල්ලවෙමින් තිබෙන දැරිය නොහැකි ආර් ථික පීඩනය  හමුවේ සහන ඉල්ලා රජයට බලපෑම් කරමින්, නිහඞ විරෝධතාවයක නියැලුනු, නුගේගොඩ, මිරිහාන ජනතාව වෙත හා උද්ඝෝෂණය වාර්‍තා කිරීමට ගිය මාධ්‍යවේදීන් පිරිසකට පොලීසිය හා ආරක්ෂක හමුදා විසින් එල්ල කරනු ලැබූ ම්ලේච්ච, නිවට, බියගුලු ප්‍රහාරය මාධ්‍ය සේවක වෘත්තී‍ය සමිති සම්මේලනය, ජනමාධ්‍යවේදීන්ගේ ජාත්‍යන්තර සම්මේලනය සමග එකතුවෙමින් දැඩිව හෙළා දකී. ජනමාධ්‍යවේදීන්ගේ ජාත්‍යන්තර සම්මේලනය රටවල් 146 ක, මාධ්‍ය සංවිධාන 167න් සමන්විත, ලක්ෂ හයකට අධික ජනමාධ්‍යවේදීන් පිරිසක්  සාමාජිකත්වය උසුලන ලෝකයේ ප්‍රබල ම මාධ්‍ය සංවිධානය වේ.

මේ අතර මේ අතර ජනාධිපති මාධ්‍ය අංශයේ යැයි කියාගත් පිරිසක් ජනමාධ්‍යවේදීන්ට වහාම වාර්‍තාකරණයෙන් ඉවත්වෙන ලෙසට තර්‍ජනයකර ඇති අතර “අප උඹ ගැන පස්සේ බලාන්නම්” යනුවෙන් මාධ්‍යවේදී තරිඳු ජයවර්ධන ජ්‍යෙෂ්ඨ මාධ්‍යවේදියා බියගන්වා තිබේ. ඔහු මේ පිළිබඳව මිරිහාන පොලීසිය වෙත පැමිණිල්ලක් ද සිදුකර තිබේ.

පොලීසියේ හා ආරක්ෂක හමුදා පිරිස්, පහරදී වධහිංසාවන්ට ලක් කිරීම් සිදු කරමින් අත්අඩංගුවට ගනු ලැබූ මාධ්‍යවේදීන් අතර, සිදුවීම මුළුමණින්ම සජීවීව වාර්‍තා කළ සිරස මාධ්‍යවේදී අවංක කුමාර, චතුර දේශාන්, දෙරණ මාධ්‍ය ආයතනය නියෝජනය කළ සුමේධ සංජීව ගාල්ලගේ, ප්‍රදීප් වික්‍රමසිංහ, නිශ්සංක වේරපිටිය හා ලංකාදීප මාධ්‍යවේදී වරුණ වන්නිආරච්චි ද විය. බරපතල ලෙස තුවාල ලැබූ මාධ්‍යවේදීන්ට අවශ්‍ය මූලික ප්‍රතිකාර සඳහා නිසි ලෙස රෝහල්ගත කිරීමක් හෝ සිදුකිරීමට පොලීසිය කාරුණික නොවීය.

රජයේ ප්‍රවෘත්ති අධ්‍යක්ෂකවරයා විසින් නිකුත් කරන මාධ්‍ය හැඳුනුම්පත ඉදිරිපත් කළ ද, ඒ පිළිබඳව නොසළකා හරිමින් එල්ල කළ මෙම  බියගුලු ප්‍රහාරය ජනමාධ්‍යවේදීන්ගේ මාධ්‍ය වාර්‍තාකරණය වළක්වාලීමේ අරමුණින් යුතුව සිදුකළ මිලේච්ඡ ක්‍රියාවක් බවට සැකයක් නැත. මෙවැනි ප්‍රහාරයක් එල්ල කිරීම පිළිඳව රජය සම්පූර්‍ණයෙන් වගකීම භාරගතයතු බව  මාධ්‍ය සේවක වෘත්තීය සමිති සම්මේලනය අවධාරණයකර සිටී.

එබැවින් මෙම ප්‍රහාරය පිළිබඳව පුළුල් කඩිනම් පරීක්ෂණයක් සිදුකර, මාධ්‍යවේදීන්ට හා සාමකාමී ජනතාවට එල්ල කළ ප්‍රහාරය පිළිබඳව නිසි පරීක්ෂණයක් පවත්වා ජනතාව වෙත තොරතුරු ලබාදීමට මාධ්‍යවේදීන්ට ඇති ශුද්ධ අයිතිය ආරක්ෂා කරන ලෙසත් ජනාතාවගේ අදහස් ප්‍රකාශ කිරීමේ අයිතියට බාධා නොකරන ලෙසත්   මාධ්‍ය සේවක වෘත්තීය සමිති සම්මේලනය රජය ප්‍රමුඛ බලධරයන්ගේන් දැඩිව ඉල්ලා සිටී.        

විශ්වාසී

                                       

ධර්‍මසිරි ලංකාපේලි, ප්‍රධාන ලේකම්, 077 364  1111

ජනමාධ්‍යවේදීන්ගේ වෘත්තීය ආරක්ෂාව හා වෘත්තීය ගරුත්වය සඳහා කඩිනම් මැදිහත්වීම

2022 මාර්තු 17

ඩලස් අලහප්පෙරුම මැතිතුමා,
ජනමාධ්‍ය ඇමති,
ජනමාධ්‍ය අමාත්‍යාංශය.

ගරු ඇමතිතුමනි,

ජනමාධ්‍යවේදීන්ගේ වෘත්තීය ආරක්ෂාව හා වෘත්තීය ගරුත්වය සඳහා කඩිනම් මැදිහත්වීම

ජනමාධ්‍යවේදීන්ගේ වෘත්තීය ආරක්ෂාවට හා වෘත්තීය ගරුත්වයට හානි කෙරෙන සිදුවීම් දිනෙන් දින වර්ධනයවීම කණගාටුවට කරුණකි. එවැනි ක‍්‍රියා වැළැක්වීම වෙනුවෙන් ඔබගේ කඩිනම් මැදිහත්වීම අපේක්ෂාවෙන් මෙම ලිපිය ඔබතුමා වෙත ඉදිරිපත් කරමු.

ඔබ අමාත්‍යාංශයේ සෘජු පාලනය යටතේ පවතින ශ‍්‍රී ලංකා රූපවාහිනී සංස්ථාවේ නිදහස් මාධ්‍යවේදිනී නිලේප්ති රණසිංහ මහත්මියගේ සේවය පාලනාධිකාරියේ උපදෙස් මත වහාම ක‍්‍රියාත්මකවන පරිදි අත්හිටුවා ඇත. සේවය අවසන් කිරීමට හේතුව වශයෙන් ඇයට පාලනාධිකාරිය විසින් දැනුම් දී ඇත්තේ ඇයගේ ෆේස්බුක් පිටුවේ ජනාධිපතිවරයා සම්බන්ධයෙන් තැබූ සටහනක් බව ය.

එසේම මාධ්‍යවේදී රාහුල් සමන්ත මහතාගේ ප‍්‍රවෘත්ති වාර්තාකරණයක් පිළිබඳව භාරත ලක්ෂ්මන් මහතාගේ ඝාතනයට අධිකරණයෙන් වරදකරුවෙකුවී සිර දඞුවම් විඳිමින් සිටි, පසුව ජනාධිපති සමාව ලැබූ, වර්තමානයේ නිවාස සංවර්ධන අධිකාරියේ සභාපතිවරයා ලෙස කටයුතු කරන දුමින්ද සිල්වා නමැති අය විසින් දුරකථනයෙන් තර්ජනාත්මකව කරුණු විමසා තිබේ.

මේ සිදුවීම් දෙක ම පිළබඳව ඔබතුමා වෙත වාර්තාවී ඇති බව දැන ගන්නට තිබේ. වෘත්තීය මාධ්‍යවේදියෙකු ලෙස ද අත්දැකීම් සහිත ඔබ මේ සිදුවීම් දෙකම අනුමත නොකරන බව අප සම්මේලනය විශ්වාස කරනු ලබයි.

රටවල් 160ක, ලක්‍ෂ හයක් ඉක්මවූ වූ සාමාජික මාධ්‍යවේදීන් නියෝජනය කරන ’ජනමාධ්‍යවේදීන්ගේ ජාත්‍යන්තර සම්මේලනයේ :(International Federation of Journalists-IFJ) පූර්ණ සාමාජිකත්වය දරණ මාධ්‍ය සේවක වෘත්තීය සමිති සම්මේලනය මේ ක‍්‍රියාවන් දෙක ම දැඩිලෙස හෙළා දකී. එසේම මෙම සිදුවීම් දෙක පිළිබඳව කඩිනම් විමර්ශනයක් පවත්වා ඔවුනට යුක්තිය ඉටු කිරීමට මැදිහත්වෙන ලෙසත්, භාෂණයේ හා ප‍්‍රකාශනයේ නිදහස ආරක්ෂා කරමින් මාධ්‍යවේදීන්ගේ වෘත්තීය ආරක්ෂාව හා ගරුත්වය ආරක්ෂා කිරීමට මැදිහත්වෙන ලෙසත් අප සම්මේලනය ඔබතුමාගෙන් දැඩිව ඉල්ලා සිටී.

මෙයට, විශවාසී,


ධර්මසිරි ලංකාපේලි
ප‍්‍ර‍්‍රධාන ලේකම්
077 364 1111

fmetu123@gmail.com

මාධ්‍යවේදී චමුදිත සමරවික‍්‍රමට එල්ල කළ තිරශ්චීන මැර ප‍්‍රහාරය හෙළාදකිමු.

මාධ්‍ය නිවේදනය

2022 පෙබරවාරි 15

මාධ්‍යවේදී චමුදිත සමරවික‍්‍රමට එල්ල කළ තිරශ්චීන මැර ප‍්‍රහාරය හෙළාදකිමු.

මාධ්‍යවේදී චමුදිත සමරවික‍්‍රම මහතාගේ නිවසට එල්ල කරනු ලැබූ මිලේච්ඡ, නිවට, බියගුළු ප‍්‍රහාරය මාධ්‍ය සේවක වෘත්තීය සමිති සම්මේලනය, ජනමාධ්‍යවේදීන්ගේ ජාත්‍යන්තර සම්මේලනය සමග එකතුවෙමින් දැඩිව හෙළා දකී.

ජනමාධ්‍යවේදීන්ගේ ජාත්‍යන්තර සම්මේලනය රටවල් 146 ක, මාධ්‍ය සංවිධාන 167 න් සමන්විත, ලක්ෂ හයකට අධික ජනමාධ්‍යවේදීන් පිරිසක් සාමාජිකත්වය උසුලන ප‍්‍රබලම මාධ්‍ය සංවිධානයකි.

චමුදිත සමරවික‍්‍රම, දිර්ඝ කාලයක් තිස්සේ ශ‍්‍රී ලංකාවේ මාධ්‍ය ක්ෂේත‍්‍රය තුළ දේශපාලකයන්ගේ සහ සමාජ විරෝධී පිරිස් විසින් සිදුකරනු ලබන ක‍්‍රියාවන් දැඩිලෙස විවේචනයට බඳුන්කරනු ලබන ප‍්‍රකට මාධ්‍යවේදියෙකි. ප‍්‍රහාරයට ලක්වෙන අවස්ථාව වෙනවිට ”හිරු” රෑපවාහිණී නාලිකාවේ ”පත්තරේ” සහ ””සළකුණ” වැඩ සටහන් තුළින් ප‍්‍රබල ලෙස මාධ්‍යවේදීයෙකුගේ භූමිකාව මැනවින් ඉටුකරමින් සිටි මාධ්‍යවේදීයෙකි.

මෙම බියගුලූ ප‍්‍රහාරය ඔහුගේ මාධ්‍ය භාවිතය වළක්වාලීමේ අරමුණින් යුතුව සිදුකළ මිලේච්ඡ ක‍්‍රියාවක් බවට සැකයක් නැත. ආයුධ සන්නද්ධව, ආරක්ෂිතව පැමිණ මෙවැනි ප‍්‍රහාරයක් එල්ල කිරීම පිටුපස පුබල හස්තයක් සහිත මෙහෙයවීමක් පවතින බව අනුමාන කළහැකිය. දශක ගණනාවක් පුරාවට සිදුවූ, ජනමාධ්‍යවේදීන් මරාදැමීම්, අතුරුදහන් කිරීම්, පහරදීම්, ජනමාධ්‍ය ආයතන ප‍්‍රහාරයට ලක්කිරීම් වැනි, තවමත් විධිමත් විමර්ශනයන්ට භාජනය නොවුනු සිදුවීම් රැසක් තිබෙන බව රටට රහසක් නොවේ. ඒ සියළු සිදුවීම් සියල්ල පිටුපස ප‍්‍රබල දේශපාලන හස්තයන් පැවති බව ජනතාවට ද රහසක් නොවේ. මාධ්‍යවේදී චමුදිත සමරවික‍්‍රමට එල්ල කළ ප‍්‍රහාරය ද එවැනිම ක‍්‍රියාවක් බවට සැක කළ හැකිය.

මෙවැනි සන්නද්ධ මැර ප‍්‍රහාරයන් පිළිබඳව කඩිනමින් සොයාබලා මැරයන් එරෙහිව තදින් නීතිය ක‍්‍රියාත්මක විය යුතු බව අප සම්මේලනය අවධාරනය කර සිටී. එවැනි ක‍්‍රියාමාර්ගයකින් මිස මෙවැනි සිදුවීම් පිළිබඳව රාජ්‍ය හෝ දේශපාලන මැදිහත්වීම් පිළිබඳව ජනතාව තුළ පවතින සැකය බැහැර කළ නොහැක.

එබැවින් මෙම ප‍්‍රහාරය පිළිබඳව පුළුල් කඩිනම් පරීක්ෂණයක් සිදුකර, චමුදිතට එල්ල කළ ප‍්‍රහාරය පිටුපස සිටින සැබෑ මැරයන් කවුදැයි රටට හෙළිකරන ලෙස මාධ්‍ය සේවක වෘත්තීය සමිති සම්මේලනය රජය ප‍්‍රමුඛ බලධරයන්ගෙන් දැඩිව ඉල්ලා සිටී.

විශ්වාසී,


ධර්මසිරි ලංකාපේලි
ප‍්‍රධාන ලේකම්

ජනවාරිය තවම කළුයි! ඝාතකයන්, චුදිතයන් නිදැල්ලේ! ජනමාධ්‍යවේදීන්ට එරෙහි අපරාධයන්ට යුක්තිය කෝ?

ජනවාරිය තවම කළුයි!
ඝාතකයන්, චුදිතයන් නිදැල්ලේ!
ජනමාධ්‍යවේදීන්ට එරෙහි අපරාධයන්ට යුක්තිය කෝ?

වෘත්තීය ජනමාධ්‍යවේදීන්ගේ සංගමයේ දුමින්ද සම්පත් හා නිදහස් මාධ්‍ය ව්‍යාපාරයේ ලසන්ත සිල්වා සොහොයුරන්ගේ ඉල්ලීම මත  ”කළු ජනවාරිය” සමරන්නට යොදා ගන්නට මවිසින් ලියූ සටහන සංවර්ධනය කර ලියන්නට හිතුවේ සිදුවීම් පිළිබඳව බැඳුණු සටහන් ගනනාවක් මුහුණු පොතේ සංසරණය වෙමින් පවතින නිසාම ය. උවිඳුගේ සටහන ඒ අතරිනන් ප්‍රමුඛ වේ.

මාධ්‍ය ක්‍රියාකාරීන්ට අනුව ජනවාරි මාසය යනු ”කළු” මාසයකි. ජනවාරිය යනු ”කළු ජනවාරියකි”. එ් මාධ්‍යවේදීන්ට එරෙහිව සිදු වූ අපරාධ සම්බන්ධයෙන් යුක්තිය ඉටු කරන ලෙස ඉල්ලා වගකිවයුත්තන්ට බලපෑම් කිරීමේ මාසය ලෙස ජනවාරි මාසය යොදා ගන්නට සිදුව තිබීම නිසාය.

ජනවාරි මාසය තෝරා ගෙන ඇත්තේ අනෙක් මාසවල අපරාධ සිදු නොවූ නිසා ම නොවේ. ජනමාධ්‍යවේදීන්ට, ජනමාධ්‍ය ආයතනවලට එරෙහිව බහුතරයක් සිදුවීම් ජනවාරි මාසය තුළ සිදුව ඇති නිසා ය.

ඒ මෙහෙමයි!

සුබ්‍රමනියම් සුගීර්දරාජන් ඝාතනය කළේ 2006 ජනවාරි 24. රෑපවාහිණියේ ලාල් හේමන්ත මාවලගේට ප්‍රහාරයක් එල්ල කළේ 2008 ජනවාරි 23. සිරස මැදිරි සංකීර්ණය ක්ලේමෝ බෝම්බ ගසා ගිනි තැබුවේ 2009 ජනවාරි 06. සන්ඩේ ලීඩර් කර්‍තෘ ලසන්ත වික්‍රමතුංග ඝාතනය  කළේ 2009 ජනවාරි 08. රිවිර කර්‍තෘ උපාලි තෙන්නකෝන්ට එල්ල කළ ම්ලේච්ඡ ප්‍රහාරය සිදුවුනේ 2009 ජනවාරි 23. ප්‍රගීත් එක්නැලිගොඩ අතුරුදහන් කිරීම සිදුවුනේ 2010 ජනවාරි 24. ලංකා ඊ නිවුස් කාර්‍ය්‍යාලය ගිනි තිබ්බේ 2011 ජනවාරි 30.

 

මේ අයුරින් පසුගිය පාලනයන් සමයන්හිදී ජනමාධ්‍යවේදීන්ට, මාධ්‍ය ආයතනයන්ට එරෙහිව සිදුකළ බිහිසුනු, මිලේච්ඡ ප්‍රහාරයන් ගණනාවක් නිසා ජනවාරි මාසය අපට “කළු” මාසයකි.

2000 – 2015 කාලපරාසය තුළ, ශිෂ්ඨ සමාජයක් නොඉවසන, ජනමාධ්‍යයට එරෙහි ඒ අපරාධම ය, බිහිසුනු සිදුවීම් ලැයිස්තුවෙන් කොටසක් මෙසේ සටහන් කළ හැක.

ඝාතන
  1. මයිල්වාහනම් නිමලරාජන් ඝාතනය 2000.10.19
  2. අයියාතුරෙයි ජී නඩේෂන් ඝාතනය 2004.05.01
  3. කන්දසාමි අයියර් බාලනඩරාජ් ඝාතනය 2004.08.16
  4. ධර්මරත්නම් සිවරාම් ඝාතනය 2005.04.28
  5. රේලන්ගී සෙල්වරාජා ඝාතනය 2005.08.12
  6. සුබ්‍රමනියම් සුගීර්දරාජන් ඝාතනය 2006.01.24
  7. සම්පත් ලක්මාල් ද සිල්වා ඝාතනය 2006.07.01
  8. සුභාෂ් චන්ද්‍රබෝස්           ඝාතනය 2007.04.16
  9. සෙල්වරාසා රජිව්වර්මන් ඝාතනය 2007.04.29
  10. සහදේවන් නිලක්‍ෂන් ඝාතනය 2007.08.01
  11. පරණිරූපසිංහම් දේවකුමාර් ඝාතනය 2008.05.28
  12. ලසන්ත වික්‍රමතුංග ඝාතනය 2009.01.08
අතුරුදහන් කිරීම්
  1. සුබ්‍රමනියම් රාමචන්ද්‍රන් අතුරුදහන් කිරීම 2007.02.15
  2. ප්‍රගීත් එක්නැලිගොඩ අතුරුදහන් කිරීම 2010.01.24
ප්‍රහාරයන්ට ලක්වූවන්
  1. ටී.එම්.ජී. චන්ද්‍රසේකර පහරදීම 2007.12.27
  2. ලාල් හේමන්ත මාවලගේ පහරදීම 2008.01.25
  3. කීත් නොයාර් පැහැරගෙන යෑම/පහරදීම 2008.05.22
  4. නාමල් පෙරේරා පහරදීම 2008.06.30
  5. රදිකා දේවකුමාර් වෙඩි තැබීම 2008.09.08
  6. උපාලි තෙන්නකෝන් පහරදීම 2009.01.23
  7. එන්. විද්‍යාදරන් පැහැරගෙනයාම/ පහරදීම 2009.02.26
  8. පෝද්දල ජයන්ත පැහැරගෙනයාම/ පහරදීම 2009.06.01
  9. ඥාණසුන්දරම් කුගනාදන් පහරදීම 2011.07.29
  10. මන්දනා ඉස්මයිල් තර්ජනය කිරීම 2013.08.23
මාධ්‍ය ආයතනවලට ප්‍රහාර

1 සුඩරෝලි පුවත්පත් ආයතනය -බෝම්බ ප්‍රහාරය 2005.08.29

2 උදයන් පුවත්පත් ආයතනය ගිනි තැබීම/වෙඩි තැබීම් 2006.6.2/2013.04.13

3 සිරස රූපවාහිනිය මැදිරි විනාශ කිරීම 2009.01.06

4සියත ආයතනය           පහරදීම 2010.07.30

5 ලංකා ඊනිවුස් ආයතනය ගිනි තැබීම 2011.01.30

මේ ලැයිස්තුවට අමතරව අදාල කාල වකවානුව තුළ, අදහස් ප්‍රකාශ කිරීම වැළැක්වීම අරමුණු කරගත් සෘජු ප්‍රහාර නිසා මාධ්‍ය සේවකයින්, පුවත්පත් නියෝජිතයන්, බෙදාහරින්නන් සහ මුද්‍රණාල සේවකයින් 12 දෙනෙක් ඝාතනය කර ඇති බව වාර්‍තාවේ.

(මේ ප්‍රහාරයන්ගේ දින වකවානු සහිත තොරතුරු සිතා රංජනී ගේ සටහනකින් උපුටා ගැනින.)

මේ සෑම සිදුවීමකට ම පාහේ යුක්තිය ඉටු කිරීම වෙනුවෙන් අවශ්‍ය මූලික පැමිණිලි සියල්ල ගොනුකර තිබේ. ඉහත දැක්වෙන ලැයිස්තුවේ බහුතරය දෙමළ මාධ්‍යවේදීන් වූවා සේම, ඝාතනය වූ මාධ්‍ය සේවකයින් 12 දෙනාම දෙමළ ජාතිකයන් වේ.

ලසන්ත වික්‍රමතුංග ඝාතනය සහ ප්‍රගීත් එක්නැලිගොඩ අතුරුදහන් කිරීම සම්බන්ධ පරීක්ෂණවලින් සැක කරුවන් ද හඳුනා ගෙන තිබියදී ඒවා අතර මඟ නතර වී ඇත.

ලසන්ත ඝාතනය සම්බන්ධයෙන් 2010 පෙබරවාරි 26 දින පොලිස් ත‍්‍රස්ත විමර්ශන අංශය ජේසුදාසන් නමැත්තෙකු අත්අඩංගුවට ගත්තේය. අත්අඩංගුවේ පසුවූ සැකකරු පී. ජේසුදාසන් හදිසියේ බන්ධනාගාරය තුළදි මිය ගියේය

ලසන්තගේ වැඩිමහල් සොහොයුරා ලාල් වික‍්‍රමතුංග වරක් කිව්වේ ”ජෙනරාල් ෆොන්සේකා තමයි ලසන්තව මැරුවේ” කියා ජනාධිපති මහින්ද රාජපක්ෂ, තමාට තුන් වරක් ප‍්‍රකාශ කළ බවකි. 2015 බලයට පත්වූ යහපාලන ආණ්ඩුව ලසන්ත ඝාතන පරීක්ෂණ ත‍්‍රස්ත විමර්ශන කොට්ඨාශයෙන් ඉවත්කර අපරාධ පරීක්ෂණ දෙපාර්තමේන්තුවට බාර දුන්නා. ඒ පරික්ෂණත් මන්දගාමි වුනා

2016 ජුලි 16 දින ලසන්ත වික‍්‍රමතුංග ඝාතනය සම්බන්ධයෙන් යුද හමුදා බුද්ධි අංශ සැරයන්වරයෙකු සැක පිට අත්අඩංගුවට ගත් බව පොලිසිය නිවේදනය කළා. 2016 ජුලි 27 දින අත්අඩංගුවට පත් යුද හමුදා බුද්ධි අංශ සැරයන්වරයා, ලසන්ත වික‍්‍රමතුංගගේ රියදුරා උසාවියේ පැවති හඳුනාගැනීමේ පෙරට්ටුවකදී හඳුනා ගත්තා. උපාලි තෙන්නකෝන්ට පහරදීමේ සිද්ධිය සම්බන්ධයෙන් ද මෙම සෙබකා චෝදනා ලබා ඇති බව පොලිසිය උසාවියට කිව්වා. 2016 සැප්තැම්බර් 27 දින නව මරණ පරීක්ෂණයට ලසන්තගේ දේහය ගොඩ ගත්තා. අදාල පරික්ෂණත් යම් සීමාවකදි ඇන හිටිය.

හේග් නුවර ජනතා අධිකරණයේදී ජනවාරි 12, සහ 13 යන දිනවල සාක්ෂි විමසීමට නියමිතව තිබී කොවිඩ් නිසා අප්‍රේල් මස දක්වා කල් තබා ඇති, ලසන්ත වික්‍රමතුංග ඝාතන නඩුව ජාත්‍යන්තර අධිකරණයක් වෙත රැගෙන යන්නට සිදුව ඇත්තේ යුක්තිය උදෙසාම ය.

ලසන්තගේ වගේම සිවරාම් ඝාතනය, එක්ණැළිගොඩ අතුරුදන් කිරීම,  මේ සෑම ඝාතනයක්, පහරදීමක්,  සිදුවීමක් සම්බන්ධයෙන් වැදගත් සාක්ෂි ප්‍රමාණයක් සොයාගන්නට පොලීසිය සමත්වී තිබේ.

උතුරේදී අතුරුදහන් වූ සුබ්‍රමනියම් රාමචන්ද්‍රන් හමුදා මුර පොළකදී අත්අඩංගුවට ගත්තේ මිතුරකු සමඟ යමින් සිටියදීය. අවසන්වරට අසවල්  හමුදා කඳවුරේ සිටින බව දන්වා ඔහුගේ නිවසට දුරකතන ඇමතුමක් දී ඉක්මනින් එන්න ලැබේයැයි ඔහු ප්‍රකාශ කළත් ආපසු ආවේ නැත.

රෑපවාහිණියේ ටීඑම්ජීට හා රෑපවාහිණී සේවකයන්ට පහර දුන්නේ රූපවාහිනියට කඩා වැදුණු එකල ඇමැතිවරයෙක් වූ මර් වින් සිල්වා ය.

හමුදා බුද්ධි අංශ සමඟ සම්බන්ධකම් පවත්වමින් වැරැදි මාධ්‍ය භාවිතාවක යෙදුණු බවට පසුව අනාවරණය වූ සම්පත් ලක්මාල් අවසන් වරට නිවසින් පිට වී තිබුණේ ඔහු නිතර සම්බන්ධතා පැවැත්වූ මිතුරු හමුදා බුද්ධි අංශ නිලධාරියා සමඟ බව ඔහුගේ මව ප්‍රකාශ කර තිබුණි.

මේ හමුදා නිළධාරියාගේ නම ප්‍රගීත් එක්නැලිගොඩ අතුරුදහන් කිරීමේ සිද්ධියේදී ද කරළියට ආවේය. මන්දනා ස්මයිල් මාධ්‍යවේදිනියගේ නිවසට කඩා වැදුණු ආයුධ සන්නද්ධ කණ්ඩායමට සිය අවශ්‍යතාව ඉටු කර ගැනීමට හෝ ඇයට විපතක් කිරීමට හෝ හැකි වූයේ නැත.

2000 වසරේදී ඝාතනය වූ නිමලරාජන් සම්බන්ධ නඩුව දිගු කලක් බහා තබා තිබූ අතර එම නඩුව නීතිපති නියෝග මත අවසන් කරන ලද්දේ සැකකරුවන් ලෙස ඇප පිට සිටි හය දෙනා නිදොස් කොට නිදහස් කිරීමෙනි. නිමලරාජන් මරා දැමූ කෙනෙක් නැත.

මේ ආකාරයටම ධර්මරත්නම් සිවරාම් ඝාතන නඩුව ද බහා තබා ඇති එකකි. එය අවසන් කරන්නේ කෙසේද, කවදාද නොදනිමු.

පසුගිය යහපාලන සමයේ, ප්‍රගීත් එක්නැලිගොඩ, ලසන්ත වික්‍රමතුංග වැනි පරීක්ෂණ ආරම්භ වූ සිදුවීම් කිහිපයේදී අත්අඩංගුවට ගත් සැකකරුවන් නිදහස් කොට ඔවුන්ට රැකියා ද ලබා දීමට කටයුතු කළේ වත්මන් ආණ්ඩුව ය.

මාධ්‍යවේදීන්ට එරෙහි අපරාධ සම්බන්ධයෙන් ඇසට පෙනෙන, සහ ඔප්පු කළ හැකි සාක්ෂි තිබුණත් අපරාධකරුවන්ට නිදැල්ලේ සිටීමට, ආරක්ෂාව සපයන්නේ කවුද ?

ශ්‍රී ලංකාවේ මාධ්‍යවේදීන්ට එරෙහි අපරාධ සම්බන්ධයෙන් අඛණ්ඩව ක්‍රියාත්මක වන දණ්ඩ මුක්තිය සම්බන්ධයෙන් ලෝක අවධානය දිනා ගන්නට මැදිහත්විය යුතුව ඇත. මාධ්‍යවේදීන්ට එරෙහි අපරාධ සම්බන්ධයෙන් යුක්තිය ඉටුකරවා ගන්නට නම් ඒ සඳහා ම වූ දේශපාලන අධිෂ්ඨානයක් ද අවශ්‍යය. මාධ්‍යවේදීන්ට ඒ සඳහා දිගටම බලපෑම් කිරීමට සිදුවෙනු ඇත.

මේ ඝාතන, අතුරුදහන්  කිරීම්, ප්‍රහාරයන් හා සිදුවීම් හා බැඳුණු තවත් ඛෙදනීය සිදුවීම් රැසක් මතකයෙන් බැහැර කළ නොහැක.

ඒ අතර ම එදා මාධ්‍ය සංවිධාන ක්‍රියාකාරිත්වයේ ප්‍රමුඛයන් රැසකට මරණයෙන් බේරී තමන්ගේ ජීවිතය බේරාගන්නට රටෙන් පිටවෙන්නට සිදුවිය.

https://www.facebook.com/uvindu.kurukulasuriya/posts/10158666353649818 20021 උවිඳු “මාරන්තික පහරදීම් වලට ලක්වුන​ පෝද්දලටවත් උපාලිටවත්, කීත්ටවත්, මරාදාපු කාටවත් දැන්ම යුක්තිය ඉටුවෙන එකක් නැහැ” කියල අවසන් කරපු සටහන නැවත ඇස ගැටුන නිසා උවිඳුගේ සටහන පූර්‍ණ කරන්න හිතුන.

ඇත්ටම මහින්ද ආණ්ඩුවට එදා මාධ්‍ය සංවිධාන ක්‍රියාකාරිත්වය හරිම හිසරදයක් වුනා. සිදුවීමක් උන සැණින් මාධ්‍ය සංවිධාන පහ (නිදහස් මාධ්‍ය ව්‍යාපාරය, වෘත්තීය ජනමාධ්‍යවේදීන්ගේ සංගමය, දෙමළ මාධ්‍ය සංසදය, මුස්ලිම් මාධ්‍ය සංසදය සහ මාධ්‍ය සේවක වෘත්තීය සමිති සම්මේලනය) ක්ෂණිකව ක්‍රියාත්මකවී හැම සිදුවීමකට ම ප්‍රතිචාරය දැක්වූවා.

ජනමාධ්‍යවේදීන්ට එරෙහි ආණ්ඩුවේ මර්‍ධනය එන්න එන්න ම දරුණු වෙන්ට වූ නිසා ජීවිත බේරාගන්න මේ නායකයන්ට රටින් පිටවෙන්නට අවශ්‍ය මග පෙන්වීම කළේ ජනමාධ්‍යවේදීන්ගේ ජාත්‍යන්තර සම්මේලනය(IFJ). උවිඳු කියන, ලංකාවෙන් පිටව ගිය මේ පිරිස සමග කළින් දවසෙ රාත්‍රිය මමත්, අජිත් සෙනවිරත්නත් නිදාගෙන හිටියෙ එකට මල් පාරේ, විකල්ප ප්‍රතිපත්ති කේනද්‍රය ලබාදුන් ආරක්ෂිත නිවස්නයේ. (Safety House) ඒ දවස්වල නායකයො හැමදෙනාම පාහේ ඒ දිනවල රාත්‍රිය ගත කළේ මේ නිවස්නයේ. මේ කියන අයගේ පිටත්වීම ගැන මම හෝ අජිය දැනගෙන හිටියෙ නෑ. උදේ නැගිටල බලන කොට අපි දෙන්න විතරයි. අනෙක් අය නෑ. විපරම් කිරීමෙන් පසුව තමයි මේ පිළිබඳව දැනගන්න හැකියාව ලැබුුනෙ.

මේ අයගේ පිටත්ව යෑමෙන් පසුව ජනමාධ්‍යවේදීන්ගේ ජාත්‍යන්තර සම්මේලනය (IFJ) මේ ලියුම්කරුට ද රටින් බැහැවන්ට උපදෙස් දෙන්න වුනා.

මේ ඒ මැදිහත්වීම

නමුත් මවිසින් ඇමෙරිකානු නිළධාරියා, Jeff Anderson හමුවී  මේ මැදිහත්වීම කාරුණිකව ප්‍රතික්ෂේප කළා. මේ හමුව සඳහා Sunday Obsover පුවත්පතේ රොෂෑන් සහ පෝද්දල සහභාගි වුනා. ඇත්තට ම පොද්දල ඒ සාකච්ඡාවට සම්බන්ධකර ගැනීමට මට විශාල වෙහෙසක් දරන්නට වුනා. ඒ බව පෝද්දල හොඳින් දනී.

උවිඳු පොද්දල ගැන තබා ඇති කරුණු සියල්ල සත්‍ය මත පදනම්ව තැබූ සටහනකි. ඒ පිළිබඳව මා හා පෝද්දල හොඳින් දන්නා තවත් කරුණු කිහිපයක් එකතු කරන්නේ ඌන පූරණයක් ලෙසිනි.

පෝද්දල පහරකෑමට ලක්වූ දින සවස සේවය අවසන්කර යන අතරතුර “ලේක්හවුස් සේවක සංගම්” කාර්‍ය්‍යාලයේ දොරකඩට පැමිණ “මචං” කියා විනඩියකට නැවතී මා ඇමතුවා. ” උඹ මහින්ද රාජපක්ෂ කැඳවල තියෙන් මාධ්‍ය සංවිධාන සාකච්ඡාවට යන්නෙ නැද්ද? ” නෑ මචං, අතුල අයියා (විකටර් අයිවන්) කිව්වා මම දැක්කොත් මහින්දට තරහ යයි කියල වෙන කෙනෙක් යවන්න කියල.” පොද්දල කිව්ව.

“මචං උඹ ගියා නම් හරි! උඹේ අනතුර පහව යන්නත් ඉඩ තියෙනව. උඹ දැක්ක ගමන් මහින්ද අහයි, හා කොහොමද පෝද්දල කියල” මම කිවිව. පොද්දල වචනයක් දුන්නෙ නෑ. පිටවෙලා ගියා. ඔහුගේ මුහුණේ පැවති තැතිගත් ස්වභාවය මට අදටත් මැවිල පේනව.

මම පෝද්දලට කිවවෙ මගේ අත්දැකීම. ඒ සාකච්ඡාවට ගියා නම් පොද්දල සමහරවිට තවමත් ලංකාවේ කියල මට හිතෙන්නේ මහින්ද රාජපක්ෂ ගැන මට කියැවීමක් තියෙන නිසා. මේ මාධ්‍ය සංවිධාන සාකච්ඡාව කැඳෙව්වෙ ම ඒ වනවිටත් ආණ්ඩුවට එරෙහිව ජාතික හා ජාත්‍යන්තර වශයෙන් ගොඩනැඟුනු අපකීර් තිය පොද්දල හරහා සමනය කරගන්නට කියලයි මම හිතන්නෙ. ඒ නිසා පෝද්දල ඒ සාකච්ඡාවට ගියා නම් එදා සිදුවුනු ප්‍රහාරය වලකින්නට තිබුණා කියන අදහසේ අදත් මම ඉන්නවා.

ඇමරිකන් තානාපති කාර්‍ය්‍යාලයෙන් මට ලැබුනු ආරාධනය සමග පෝද්දල මම රැගෙන ගියේ මේ අනතුර පිළිබඳව මට ඉවක් තිබුන නිසා. මම මොනතරම් පැහැදිළි කරන්නට උත්සාහ කළත් Jeff Anderson ඒ පිළිබඳව සැළකිල්ලක් දැක්වූයේ ම නෑ.

පෝද්දලට එල්ල වූ ප්‍රහාරයත් සමග Jeff Anderson ගේ අවධානය පෝද්දල වෙත තදින් යොමුවුනා.

ඔහු සහ IFJ Asia Pasipic නායකයන් සමග ඇතිවූ ඊමේල් සංවාද සටහන් එකතු කරන්නේ ලිපිය කියවන අයගේ අවබෝධය පිණිසම ය.

ලිපිය දීර්‍ඝ වුනා. කරුණුමය වශයෙන් සනාථ කිරීමටත්, ඉතිහාසය හැදෑරීම ඉදිරි ගමනට දායකවන නිසාත් මේ කරුණු එකතු කළා. ඒ නිසා ම ලිපිය දීර්ඝ වුනා. එහෙත් ඒ වෙනුවෙන් කරන්නන් වාලේ යමක් කරනවාට, ලියනවාට වඩා මාධ්‍ය සංවිධාන, මාධ්‍යවේදීන් අයෝමය බැඳීමකින් යුතුව යුක්තිය වෙනුවෙන් නොනවතින අරගලයක නිරත විය යුතු කාලය එළඹ තිබේ.

එක්සත්කම වඩාත් වඩාත් තහවුරු කළයතු අවධියක “තරුණ ජනමාධ්‍යවේදීන්ගේ සංගමය” මාධ්‍ය සංවිධාන එකතුවෙන් හේතු නොවිමසා ම  ඉවත්කර ඇති බව වාර්‍තා වේ. වර්‍තමානයේ ජනමාධ්‍යවේදීන්ට පමණක් නොව සකල දේශවාසී හැමදෙනාටම මාස දෙළහ ම කළු වෙමින් තිබෙන වටපිටාවක එය හෙළාදැකිය යුතු ක්‍රියාවකි.

කෙසේ වෙතත් මාධ්‍යවේදීන්ට “කළු “ජනවාරියක් වූ ජනවාරිය සුදු කරගන්නට රටේ පලල් ජනතාවත් එකතු කරගෙන යායුතු දුර අරගලයකට  කාලය පැමිණ ඇති බව  අවසන් වශයෙන් සටහන් කරමි.

ධර්‍මසිරි ලංකාපේලි 

ප්‍රධාන ලේකම්,

මාධ්‍ය සේවක වෘත්තීය සමිති සම්මේලනය.

මිනිසුන්ට අසීමිතව ආදරය කළ මිනිසෙක්.., මාධ්‍යවේදී රිචඩ් ද සොයිසා

ජනවාරිය, ගතව ගිය දශක කිහිපය තුළ මාධ්‍ය නිදහස, භාෂණයේ නිදහස සහ ප‍්‍රජාතන්ත‍්‍රවාදය  උදෙසා මෙන්ම දූෂණය සහ භීෂණයට එරෙහිව හඬ නැගූ මාධ්‍ය සගයන් ඝාතනයට, පැහැර ගැනීමට සහ වධ බන්ධනවලට ලක් වූ මාසයයි. එම හේතුවෙන් ”කළු ජනවාරිය” ලෙස නම් කරමින් ඝාතනයට හා පැහැරගැනීමට ලක්වූ මාධ්‍යවේදින්ට යුක්තිය ඉල්ලා හඬ නැගීමට සියළු මාධ්‍ය සගයන් මේ දිනවල කටයුතු කරනු ලබයි.

එහෙත් කාලයත් සමඟ එසේ ඝාතනයට ලක්වු මාධ්‍යවේදින් පිළිබඳ මතකයන් අපට තිබේද? ඔවුන්ට යුක්තිය ඉල්ලා අඛණ්ඩව අප හඬ නැඟුවේද? පිළිතුර, නැත යන්නයි. කාලයත් සමඟම සමහරුන් අපට අමතකව යන අතර ඒ හේතුව නිසාම, එක් කළෙක ඝාතකයා, තවත් විටෙක යුක්තිය ඉල්ලා හඩා වැටෙන්නෙකු බවට පත්වෙන වන අතර යුක්තිය ඉල්ලා කෑමොර දෙමින් බලයට පත්වෙන්නා, ඊලග අවස්ථාවේදී ඝාතකයෙකු බවට පත්වේ. එයට හොඳම උදාහරණය මාධ්‍යවේදී රිචඩ් ද සොයියා ඝාතනයයි.

එම ඝාතනය සිදුවන අවස්ථාවේදි යුක්තිය ඉල්ලා කෑමොර දෙමින් බලයට පත්වූ අය තවත් විටෙකදි ඝාතකයන් බවට පත්වූ ආකාරය අපට මතකය. එදා රිචඩ් ද සොයියා ඝාතනය කරන අවස්ථාවේදි බලයේ සිටියවුන්,ඉන් පසු කලෙක වෙනත් පාලනයකදි ඝාතනයට හා පැහැර ගැනීමට ලක්වූ මාධ්‍යවේදීන් වෙනුවෙන් කිඹුල් කඳුලූ හෙළමින්, යුක්තිය ඉටු කරන බවට පොරොන්දු දෙමින් බලයට පැමිණි ආකාරය අමතක නැත. සිදුවීම් සිදුවන්නේ කොක් හඩලා සීනාසීමටත්, හඬා වැළපීමටත් නොව එයින් පාඩම් ඉගෙන ගැනීමටයි. අද අපට අමතකව ගිය මාධ්‍යවේදි රිචඩ් ද සොයියා පිළිබඳව මතකයන් සොයා යා යුත්තේ, ඒ පිළිබඳව හැදෑරීම උදෙසාය.

මිනිසුන් ලොකයේ කොතෙකුත් වාසය කරන අතර ඒ අතරින් අනෙකා කෙරෙහි අසීමිත ආදරයක්, සමාජය කෙරෙහි දැඩි ඇල්මකින් යුත් ශ්‍රේෂ්ඨ මිනිසුන් බිහි වන්නේ සියවස්
ගණනාවකට වරක්ය. නූතන වකවානුවේ අපිට හමුවූ එවන් මිනිසෙකු වූයේ මාධ්‍යවේදී රිචඩ් ද සොයිසා යි. මුහුණ පුරාවට වැවෙන රැවුලකට උරුමකම් කියන ලද ඔහු බොහෝ
වෙලාවට පරණ හමගිය ඩෙනිම් කලිසමත්, නිල් පාට කොලරය සහිත කමිසයත් ඇද සිටිනු දකින්නට ලැබුණි.

ඔහු නළුවෙකු ලෙස කටයුතු කළ මුත් ඉතා ලැජ්ජාශිලි පුද්ගලයෙකුවූ අතර ඒ නිසාම වැඩියෙන් කතා කිරිමට පෙළඹුණේද නැත. ඒ නිසාවෙන් ඇතැමෙකු ඔහු ආඩම්බර චරිතයක් ලෙස සිතුවද සත්‍යය එය නොවේ. ඇත්තටම ඔහු සරල පුද්ගලයෙකි. නිර්ව්‍යාජ ලෙස සමාජය ඇසුරු කළ මනුස්සයෙකි. ඔහු මාධ්‍යවේදියෙකි, ලේඛකයෙකි, කවියෙකි, වේදිකා නළුවෙකි, චිත‍්‍රපට නළුවෙකි, ගුවන් විදුලි නිවේදකයෙකි, රුපවාහිනි වැඩසටහන් නිෂ්පාදකයෙකි, මානව හිමිකම් ක‍්‍රියාදරයෙකි, දේශපාලන විචාරකයෙකුද වේ. සියල්ලටම වඩා මනුස්සකම් සපිරි මානවවාදියෙකි.

ඉහළ මධ්‍යම පාංතික සම්භවයකට අයත් රිචඩ්, ඉතා චතුර ලෙස ඉංග‍්‍රිසි භාෂාව හසුරවන ලදි. රිචඩ් විප්ලවවාදි දේශපාලනය හෝ අරගලකාරි මාතවාදයක් කර පින්නා ගැනිමට සමාජ වටපිටාවක් හෝ පවුල් පසුබිමක් පැවති පුද්ගලයෙකු නොවීය. පවතින සමාජය තුළ උපතින්ම ලද තම පංතියේ වරප‍්‍රසාද භුක්ති විදිමින් ඉහළින්ම වැජඹෙන්නට ඔහුට හැකියාව පැවතිණි. එහෙත් තමාට උපතින්ම ලැබුණ වරප‍්‍රසාද වෙනුවට අසාධාරණයට පත්වු ජනතාවගේ පිල තොරා ගැනිම සහ ජිවත්වූ ටික කාලය අවසානයේ ඒ වෙනුවෙන් තම ජිවිතයද කැප කිරිම ඔහුගේ ශ්‍රේෂ්ඨත්වයයි.

සාමාන්‍ය පුද්ගලයන් තමා ජිවත්වන පංති ආවකාශයෙන් අඩියක් උඩට නැඟීමට ලතවෙන අතරම ඉහළ මහලට නැඟගත් තප්පරයේ පටන් පහළ මහල අමතක කර ඉන් නොනැවතී අවමන්ද කරයි. එවැනි තරඟකාරි සමාජයක පහළ මහලේ අසාධාරණයට ලක්වු මිනිසුන්ව රිචඩ් නොපැකිලිව සිප වැලඳ ගත්හ.

1958 මාර්තු 18 උපත ලද රිචඩ් ද සොයිසාගේ පියා, ලූශන් ද සොයිසා වන අතර මව ආචාර්ය වෛද්‍ය සිවරම් සරවනමුත්තුය. ඔහුට සහෝදරයෙක් හා සහෝදරියක්ද විය. අධ්‍යාපනය ලැබූවේ ශන්ත තෝමස් විද්‍යලයේය. එහිදි ඞී. එස්. ජයසේකර මහතා ඔහුගේ සිංහල නාට්‍ය රංගනය හඳුනාගත් අතර 1972 අන්තර් පාසල් ශෙක්ස්පියර් ඉංගි‍්‍රසි නාට්‍යයේ හොදම නළුවා බවට පත්විය. ඔහු පාසලේ වාද විවාද කණ්ඩායමේ නායකයා ලෙසද කටයුතු කළේය.

මාර්ටින් වික‍්‍රමසිංහ මහතාගේ නව කතාවක් පාදක කරගෙන ලෙස්ටර් ජේම්ස් පිරිස් මහතා නිර්මාණය කළ යුගාන්තය විත‍්‍රපටයට, 1983 දී රංගනයෙන් දායකවු රිචඩ්, රඟපෑ සමාජවාදි අදහස් සහිත මාලන්ගේ චරිතය ඔහුගේ සැබෑ ජිවිතයේම පැතිකඩකි. රිචඩ් සත්‍යග‍්‍රහණය චිත‍්‍රපටයටද රංගනයෙන් දායක විය. යශෝරාවය ටෙලි නාට්‍යයේ රින්ස්ලිගේ චරිතය රඟපෑ ඔහු එවකට අතිශය ජනප‍්‍රිය විය.

රිචඩ් ද සොයිසා ජනතාවාදි මධ්‍යවේදියෙකු ලෙස සිදුකරන ලද සේවයද විශිෂ්ටය. ඔහු ගවේෂණාත්මක ජනමාධ්‍යවේදියෙකු ලෙස භාෂණයේ නිදහස වෙනුවෙන් පෙනි සිටීම, මානව හිමිකම් ක‍්‍රියාධරයෙකුසේ කටයුතු කිරිම. අදහස් ප‍්‍රකාශ කිරිමේ අයිතිය වෙනුවෙන් පෙනි සිටීම. අත්අඩංගුවට ගැනිම්, අතුරුදහම් කිරීම්, හා ඝාතනය කිරිම් වලට එරෙහිව කටයුතු කිරිම කැපි පෙනෙන ලක්ෂණයක් විය.

මේ සියල්ල ඉවසීමට නොහැකිවූ පිරිසක්ද අප රට තුළ සිටි බව නොරහසකි. එක් භීම සමයක, 1990 පෙබරවාරි 18 දින රාත‍්‍රියේ නිවසට පැමිණි පිරිසක් විසින් ඔහු පැහැර ගන්නා ලදි. පොලිසියෙන් බව හඳුන්වා, කොළ පැහැති ජිප් රථයක නග්ගවාගෙන රැගෙන ගිය අතර, ඔහුගේ මවට ඒ මොහොතේ කළ හැකි කිසිදෙයක් නොවීය.

මව විසින් පාන්දර 4.30 ට කොල්ලූපිටිය පොලිසියට පැමිණිල්ලක් සිදු කරන ලදි. අළුයම උදාවුවේ හදවත් කම්පා කරන පුවතකිනි. මොරටුව කොරළවැල්ල දුම්රියපොළ අසළ වෙරළට කඩවසම් තරුණයෙක්ගේ මළ සිරුරක් ගොඩගසා තිබුණි. ඒ කාගෙවත් නොව සුවහසක් ජන හදවත් දිනා ගත් කලා කරුවෙකු සහ මධ්‍යවේදියෙකුවු රිචඩ් සොයිසාගේ මෘත ශරිරයයි. මෘත ශරිරය සොයා ගන්නා විට අධික ලෙස ඉදිමි පැවතුණි. හිසේ පිටුපස සහ උගුරේ වෙඩි පහරවල් පැවති අතර පසුදින කළුබෝවිල රෝහලේදි රිචඞ්ගේ මව මෘත ශරිරය හඳුනා ගත්හ.

දසමසක් ඇකයේ හොවා මෙලොවට බිහි කළ දරුවා මහ රැක තමා ඉදිරියේදිම පැහැරගෙන ගොස් මරා දැමීම මවකට දරා ගැනිමට හැකි දෙයක් නොවීය. වෛද්‍ය සිවරම් සරවනමුත්තු මහත්මිය පසුකාලීනව පුවත්පතකට මෙලෙස කියා ඇත. ”දුර ඈතක සිට රිචඩ් මා දෙස බලා සිටිනවා. මගේ පුතා බොහෝ විට මා හා කතා කරනවා. ඔහු ඔහුගේ දේශයට එදා මෙන්ම ආදරෙයි. ඔහුගේ ජනතාවට එදා මෙන්ම ආදරෙයි. මියගිය බොහෝ දරුවන් ඔහු වගේම යැයි මා හිතනවා. සත්තකින්ම මා දන්නවා දිනයක් ඒවි. නිසැකවම දිනයක් ඒවි. එදිනට අප නොදන්නා යම් තැනක හිඳ ඔවුන් සියල්ලන් මේ දේශයට ඒවි. රිචඩ් මෙන්ම මරා දැමුණු බොහෝ අහිංසක දරුවන් ඔවුන් ආදරය කළ මේ දේශයට ඒවි. ඔවුන් මේ දේශයට ආදරෙයි. ඔවුන් මේ ජනතාවට ආදරෙයි. අම්මා.. අපි ඔබලාට නිදහස හා ආදරය ගෙන ආවා කියන ඔවුන්ගේ කටහඬ අපිට ඇසේවි. රිචඩ් පුතුගේ කටහඬ මට ඇසේවි. ඉතින් ඒ දිනය එනතුරාවට මම සටන් කරනවා”.

සිවරම් සරවනමුත්තු මව මෙන්ම තවත් දහසක් මව්වරු එලෙස තම දරුවන් යළිත් පැමිණෙයි කියා සිතුවද, ඔවුන් පැමිණියේ නැත. රිචඩ්ගේ මව තමාගේ පුතුගේ මරණය පිළිබඳව අධික ලෙස සංවේගයට පත්වු අතර පුතු මෙන්ම එකල පැහැරගත්, අතුරුදහන්වු, ඝාතනයට ලක්වු තරුණයන් කෙරෙහි පෙනි සිටිමට පෙරට ආහ. එහෙත් රිචඩ්ගේ මරණය වෙනුවෙන් යුක්තිය ඉටුනොවීම ඛේදවාචකයකි. ඇසින් දුටු සාක්ෂිකරුවන් හත්දෙනෙක් ඉදිරිපත්වු අතර ප‍්‍රධාන සාක්ෂිකරුවන්ට තර්ජනද එල්ල විය.

1990 දී මැයි 1 දා රාත‍්‍රි ජාතික රුපවාහිනිය නරඹද්දි තමන්ගේ පුතාව පැහැර ගත්, පොලිස් පරික්ෂක ලාල් ක‍්‍රිෂන්ත ධර්මසිරි රංචාගොඩව හදුනා ගත්හ. මේ පිළිබඳව ඇය පැමිණිලි කළ අතර මහේස්ත‍්‍රාත් රෝහිණි පෙරේරා විසින් ඔහුව අත්ඩංගුවට ගන්නා ලෙස නියෝග කළද ආරක්ෂක අමාත්‍ය රන්ජන් විජේරත්නගේ මැදිහත්වීම තුළ එය වැළකී ගියහ.

රිචඩ් ද සොයිසාව ආයුධ සන්නද්ධ කණ්ඩායමක් ලෙසින් පැමිණ පැහැරගෙන ඝාතනය කොට ඇත්තේ ජ්‍යෙෂ්ඨ පොලිස් අධිකාරි රොනී ගුණසිංහ නායකත්වය දුන් පොලිස් කණ්ඩායමක් විසින් බව පසු කලක අනාවරණය විය. මෙම ඝාතනයට පොලිස් පරික්ෂක ලාල් ක‍්‍රිෂාන්ත ධර්මසිරි රංචාගොඩ, පොලිස් පරික්ෂක එම්. ජී. ජී. දේවසුරේන්ද්‍ර, පොලිස් සැරයන් වෙඩික්කාරගේ සරත්චන්ද්‍ර යන අය සම්බන්ධ වූ බව අනාවරණය විය. රිචඩ් ද සොයිසාව ඝාතනය කළ අයට එරෙහිව මොරටුව මහෙස්ත‍්‍රාත් අධිකරණයේ නඩු ගොනු කළේය.

පසුව එය කොළඹ අලූත්කඬේ මහාධිකරණයේ විභාගයට ගැනුණි. 2005 ඔක්තෝම්බර් මස 9 වෙනි දින විත්තිකරුවන් සියළු නඩු වලින් නිදහස් විය. සක්ෂිකරුවන් ලබා දුන් සාක්ෂි පරස්පර විරෝධි බව පැවසු අතර විත්තිකරුවන්ට එරෙහි චෝදනා ඔප්පු වි නොමැති බව ප‍්‍රකාශ කළහ

රිචඩ් ද සොයිසාගේ මරණය සම්බන්ධව 1990 අප‍්‍රියෙල් 23 වන දින ටයිම්ස් සගරාවේ ලිපියක් පළවු අතර එහි අන්තර්ගතය වුයේ ශ‍්‍රී ලංකා රජය විසින් මෙහෙයවන ඝාතන කණ්ඩායම් සහ ශ‍්‍රී ලංකාවේ සිදුවන බරපතල මට්ටමේ මානව හිමිකම් උල්ලංගනයන් පිළිබඳව ලොව දැනුවත් කිරීම නිසාවෙන් ඔහු ශ‍්‍රී ලංකා රජයට බලවත් තර්ජනයක් වූ බැවින්, රජයේ මෙහෙයවීමෙන් මෙම ඝාතනය සිදුකොට ඇති බවයි. මෙම ලිපිය ශ‍්‍රී ලංකා රජය විසින් බෙදා හැරිම සහ විකිණීම තහනම් කරන ලදී.

රිචඩ් ද සොයිසා ඝාතනය වීමෙන් පසුව ඉන්ටර්ප්‍රෙස් මාධ්‍ය ආයතනය විසින් 1990 දී විශිෂ්ඨතම ඇගයීමේ සම්මානය ඔහු වෙනුවෙන් පිරිනමන ලදී. 2008 වර්ෂයේ දෙසැම්බර් මාසයේදී බි‍්‍රතාන්‍යයේ බි. බි. සී මාධ්‍ය ජාලය විසින් විනාඩි 60 ක ගුවන් විදුලි නාට්‍යයක් නිර්මාණය කොට විසුරුවා හැරුණි. එම ගුවන් විදුලි නාට්‍යය නිෂ්පාදනය කොට තිබුනේ රිචඩ් ද සොයිසා නම්වූ මාධ්‍යවේදියාගේ ජීවිතය සහ මරණය යන සිද්ධීන් පාදක කොටගෙනය.

රිචඩ් සහාසික ලෙස ඝාතනය කොට දශක තුනකටත් වැඩිය. එම වරදෙහි බිහිසුනුම කරුණ නම් ඔහු මිය යාමෙන් අනතුරුවද තවත් මාධ්‍යවේදීන් ගණනාවක් ඝාතනය වීමයි. රිචඩ්ලා දෑසට පෙනෙන මනසට හසුවන, කන් වලට ඇසෙන සත්‍යය, ඒ අයුරින්ම ඉදිරිපත් කළ මිනිසුන්ය. අසත්‍ය සමග ඔවුනට කිසිදු සංහිඳියාවක් නොපැවතුණි. රිචඩ් ඝාතනය කිරිමට පෙර පෘතුගාලයේ ඉන්ටර්ප්‍රෙස් ආයතනය සමග ගිවිසුමක් අත්සන් කළහ. එමඟින් මෙරට සිදුවන මානව හිමිකම් කඩකිරීම් පිළිබඳව හඬක් නැගෙයි යන්න රජය බියවිය. මිනිසුන්ව සත්‍යයෙන් ඇත් කරන සුරංගනා ලෝකවල අතරමං කරන මාධ්‍යකරුවන්, නරුම දේශපාලකයන් ගෙන් ආරක්ෂිතය. රිචඩ්ලා ඝාතනය කළේ පිඩිත පංතියේ මිනිසුන් වෙනුවෙන් තම පංතිය පවා අමතක කොට පෙනි සිටීම නිසාය.

සමහර විට මරණය ඔහු වෙත වේලාසනින් පැමිණෙන බව දැන සිටින්නට ඇත. මන්දයත් එකල සත්‍යය පැවසිම පවා මරණයට නැකම් කියන්නට හේතුවක් වූ අවධියකි. කෙසේ හෝ ඔහු වසර 32 ක පමණ ඉතා කෙටි කාලයක් ජීවත්වු පුද්ගලයෙකි. එහෙත් ජිවත්වූ ටික කාලය තුළ ඔහු සමාජයට කළ ප‍්‍රගතිශීලී බලපෑම අතිමහත්ය. සමාජයේ කොතෙකුත් මිනිසුන් ඉපිදේ. මිනිසුන් පුද්ගලික සුගතිය උදෙසාම ජිවත්වේ. මමත්වය වෙනුවෙන් අනෙකාවද විනාශ කරයි. එවැනි මිනිසුන් අතර රිචඩ් යනු උඩු ගම් බලා පිහිනුවෙකි. සීමිත හෝ මනුෂ්‍යත්වයක් සොයා ගැනිමට නොහැකි සමාජයක් තුළ අසීමිතව මිනිස් වර්ගයාට පේ‍්‍රම කළ රිචඩ් ඔබ සදා අමරණීය වේ.

 

 

සටහන – සම්පත් ජයලාල්. විධායක කමිටු සාමාජික, මාධ්‍ය සේවක වෘත්තිය සමිති සම්මේලනය.

ඔබට ගැටළු තිබේද?
අපව අමතන්න,
නැත්නම් පැමිණෙන්න.

+[94] 773 641 111

අංක 30,
අමරසේකර මාවත,
කොළඹ 05.
ශ්‍රී ලංකාව.

info@fmetu.org

Newsletter

Get latest news & update

© 2021 – FMETU. All rights reserved.

Carefully crafted by Cyber Ceylon