ශ්‍රී ලංකාවේ වෘත්තීය මාධ්‍යවේදීන්ගේ වෘත්තීමය ඉරණම හෙළිදරව් කෙරේ!

මාධ්‍ය සේවක වෘත්තීය සමිති සම්මේලනයේ ප්‍රධාන ලේකම් ධර්මසිරි ලංකාපේලි මහතා සහ නියෝජ්‍ය ප්‍රධාන ලේකම් ඉන්දිරා නවගමුව මහත්මිය කම්කරු හා විදේශ රැකියා අමාත්‍ය මනූෂ නානායක්කාර මහතා සමඟ 2022 නොවැම්බර් 22 වැනි දින එම අමාත්‍යාංශයේදී සාකච්ඡාවක් පවත්වමින්, ශ්‍රී ලංකාවේ වෘත්තීය මාධ්‍යවේදීන්ගේ දුක්ඛිත සේවා කොන්දේසි පිළිබඳව දීර්‍ඝ හෙළිදරව් කිරීමක් සිදු කරන ලදී.

ශ්‍රී ලංකාවේ බහුතර වෘත්තීය මාධ්‍යවේදීන්ට හිමිවිය යුතු මූලික වෘත්තීය අයිතිවාසිකම් කිසිවක් හිමිව නොමැති බවත්, ශ්‍රී ලංකාවේ මූලික හිමිකම් පවා අහිමි එකම වෘත්තිය ජනමාධ්‍යවේදය බව මාධ්‍ය සේවක සංගම් සම්මේලනය මෙම සාකච්ඡාවේදී ඇමතිවරයා වෙත පැහැදිලි කරනු ලැබීය.

මාධ්‍ය සේවක වෘත්තීය සමිති සම්මේලනය  විසින් මාධ්‍යවේදීන්ගේ වෘත්තීය තත්ත්වය සහ මාධ්‍ය ක්ෂේත්‍රය මුහුණ දෙන අභියෝග පිළිබඳව සිදුකළ සුවිශේෂී ගවේෂණයක් අනුසාරයෙන් සම්පාදනය කරන ලද වාර්‍තාවක් මගින් අමාත්‍යවරයා වෙත මෙම කරුණු පැහැදිලි කිරීම සිදු කරන ලදී.

ජාත්‍යන්තර මාධ්‍යවේදීන්ගේ සම්මේලනයේ (IFJ) මගපෙන්වීම සහ සහාය ඇතිව IFJ-Union to Union (UTU) Global Union 2022 මාධ්‍ය වෘත්තීය සමිති දිරිගැන්වීම යටතේ මෙම වැඩසටහන සංවිධානය කරන ලදී.

ජනමාධ්‍යවේදීන් මුහුණ දෙන වෘත්තීමය ගැටළු හා මාධ්‍ය කර්‍මාන්තය මුහුණදෙන අභියෝග පිළිබඳව පුළුල් සාකච්ඡාවක් දෙසැම්බර් 13 වෙනි දින ජනමාධ්‍යවේදීන්ගේ පුළුල් නියෝජනයක් සමග පැවත්වීමට ද මෙහිදී කම්කරු ඇමතිවරයා එකඟතාවය පළකරනු ලැබීය.

කඳුළු ගෑස් ගැන තොරතුරු ලබාදන්නැයි RTI කොමිෂම පොලීසියට නියෝග කරයි!

සමාජය සහ සාමයික කේන්ද්‍රය හා පුරවැසි අයිතිවාසිකම් වෙනුවෙන් ජනමාධ්‍යවේදී තරිඳු ජයවර්ධන විසින් ගොනුකළ පැමිණිල්ලක් විභාග කළ තොරතුරු දැන ගැනීමේ අයිතිය පිළිබඳ කොමිෂන් සභාව පැමිණිලිකරුවන් විසින් කඳුළු ගෑස් මිලදි ගැනීමට අදාල ලේඛන, තාක්ෂණික ඇගයුම් කමිටු වාර්‍තා, උද්ඝෝෂණවලට කඳුළු ගෑස් එල්ලකළ ප්‍රමාණයන් සහ කල් ඉකුත් වූ කඳුළු ගෑස් එල්ල කිරීම සම්බන්ධයෙන් ඉල්ලා ඇති තොරතුරු ලබාදීමට පියවර ගන්නා ලෙස නියෝගකර තිබේ.

ශ්‍රී ලංකා පොලීසිය වෙත නියෝගය කළේ සමාජය සහ සාමයික කේන්ද්‍රය හා පුරවැසි අයිතිවාසිකම් වෙනුවෙන් ජනමාධ්‍යවේදී තරිඳු ජයවර්ධන යොමු කළ තොරතුරු දැන ගැනීමේ ඉල්ලීමකට අදාල අභියාචනයක් විභාග කර තීන්දුව ලබා දෙමිනි.

මේ සියළු තොරතුරු මහජන වැදගත්කමක් සහිත තොරතුරු බව තීන්දු කළ තොරතුරු දැන ගැනීමේ අයිතිය පිළිබඳ කොමිෂන් සභාව එම තොරතුරු නොවැම්බර් 14 වැනිදාට පෙර මුදා හරින ලෙස ද වැඩිදුරටත් ශ්‍රී ලංකා පොලිසියට නියෝගකර තිබේ.‍

නොවැම්බර් 14 වැනිදාට පෙර අදාල තොරතුරු පෙත්සම්කරුවන් වෙත මුදා හැරීම්ට ශ්‍රී ලංකා පොලිසිය අපහොසත් වන්නේ නම් ශ්‍රී ලංකා පොලිසියට සහ එහි අදාල නිලධාරීන්ට එරෙහිව තොරතුරු පනතේ 39 වැනි වගන්තිය යටතේ මහේස්ත්‍රාත් අධිකරණයේ නඩු පැවරීමට ද කොමිසම තීන්දුකර තිබේ.

මෙම තොරතුරු ලබාගැනීම  පිළිබඳ ඉල්ලීම ජීවිතයට සහ පෞද්ගලික නිදහසට අදාල තොරතුරු පනතේ ප්‍රතිපාදන යටතේ ඉදිරිපත් කළ ඉල්ලීම පිළිබඳව ශ්‍රී ලංකා පොලිසිය ප්‍රමාණවත් අවධානයක් යොමු කර නොමැති බව හා ඉල්ලා ඇති තොරතුරු සමාජයේ වඩාත් සංවාදයකට ලක්වූ තොරතුරු බැවින් තොරතුරු නිලධාරීන් ද පනතේ ප්‍රතිපාදන පිළිබඳව මීට වඩා උනන්දුවක් දැක්විය යුතුබව ද කොමිෂන් සභාව සිය තීන්දුව මගින් අවධාරණය කර තිබේ.

මාස දෙකකට ආසන්න කාලයක් පුරා තොරතුරු දැන ගැනීමේ කොමිෂන් සභාව මෙම අභියාචනය විභාග කළ අතර එම විභාගය සඳහා තරුණ ජනමාධ්‍යවේදීන්ගේ සංගමයේ සභාපති, මාධ්‍යවේදී තරිඳු ජයවර්ධන වෙනුවෙන් නීතිඥ මනුෂිකා කුරේ සමඟ නීතිඥ සුරේන් ඩී පෙරේරා මහතා පෙනී සිට ඇත.

මෙම තීන්දුව ප්‍රකාශයට පත්කර ඇත්තේ තොරතුරු දැන ගැනීමේ කොමිෂන් සභාවේ සභාපති විශ්‍රාමික විනිසුරු උපාලි අබේරත්න, අභියාචනාධිකරණයේ හිටපු සභාපති විනිසුරු රෝහිණී වල්ගම, ජ්‍යෙෂ්ඨ නීතිඥවරුන් වන කිෂාලි පින්ටෝ ජයවර්ධන, ජගත් ලියන ආරච්චි සහ මොහොමඩ් නහියා යන කොමසාරිස්රුන්ගේ අත්සන සහිතව ය.

 

 

 

 

බීබීසී (BBC) යට වසර 100 ………. මාධ්‍යවේදීන් ලෙස ඔබට සේවය කළ අපි, අද අසරණයි!

ලියන්නේ කන්තලේ ආර් ජී ධර්‍මදාස

ත්‍රිකුණාමල ලංකාදීප මාධ්‍යවේදිනියක්ව සිටි විශාකා ජයසේකර නංගී වසර විසිතුනකට පමණ පෙරදී එක්තරා දවසක මට හමුවූ අවස්ථාවක මෙසේ පැවසුවාය.

“අයියේ! බී බී සී සංදේශයට ත්‍රිකුණාමල දිසිත්‍රික්කයෙන් වාර්‍තාකරුවෙකු සොයනවා. ඉතාම අපහසුකම් මැද්දේ වාර්‍තාකරණයෙහි යෙදෙන කෙනෙක් තමයි එයාලා හොයන්නේ. මට මේ කථාව කිව්වේ එල්මෝ අයියා. මම ඔයා ගැන කිව්වා. මොකද කියන්නේ කැමතිද?”

විශාකාගේ මෙම යෝජනාවට “එකපයින් ම හා හොඳයි“ කියන්නට තරම් කැමත්තක් මට නොවීය. මන්ද ඇය ඒ වනවිටත් සංදේශයට ප්‍රවෘත්ති ලබාදෙමින් සිටි බැවිනි.

“නංගී එතකොට ඔයා”?

මා ඇසුවේ ඒ නිසය. ඇගේ පිළිතුර වූයේ දෙන්නම එක්ව වැඩකරමු කියා  ය.මම යෝජනාවට කැමත්ත පළ කළෙමි. මා බී බී සී සංදේශයට සම්බන්ධවූයේ එපරිද්දෙනි. එහෙත් සිදුවූයේ එතන්සිට මගෙන් පමණක් ප්‍රවෘත්ති ලබාගනීමය. මා සංදේශයට සම්බන්ධවූයේ විශාකා නංගී නිසා බව මම අදටත් ඉතා නිහතමානීව පවසමි. ඇය දැන් කොහේ සිටී දැයි මම නොදනිමි.

බී බී සී සංදේශයට එක්වීම නිසා මා දැඩිසේ ආදරය කළ ලක්බිම පුවත්පතෙන් සමුගැනීමට මම හිත හදාගත්තෙමි. ලංකාවේ පත්තරයකට ලියනවාට වඩා ජාත්‍යන්තර මාධ්‍ය ආයතනයක් වූ බී බී සී සංදේශයට පුවත් සැපයිම අසීරු කාරියකි. ඒ බව මට වැටහුනේ වැඩකරගෙන යනවිටය.

විශේෂයෙන්ම යුධ බිමක සිට යුද්ධය වාර්‍තා කිරීම ලෙහෙසි පහසු කටයුත්තක් නොවේ. බී බී සි ය කොටි සංවිධානයට පක්ෂව ප්‍රචාරණයක යෙදෙන මාධ්‍ය ආයතනයක් බවට චෝදනා එල්ල වූ පසුබිමක තත්වය වඩාත් භයානක විය. අවි දැරූ සියළු පාර්‍ශවයන්ගෙන් ප්‍රවේශම් වීමට අපට සිදු විය.

කෙසේ හෝ අපි අභියෝගවලට මුහුණ දෙමින් ලොවට සත්‍යය අනාවරණය කළෙමු. යුද්ධය පමණක් නොව විවිධ රසවත් විශේෂංග ද අපේ මාතෘකා අතර විය. අපේ මාධ්‍ය සගයන් වූයේ වව්නියාවේ දිනසේන රතුගමගේ, අම්පාරේ වසන්ත චන්ද්‍රපාල, පොළොන්රුවේ තක්ෂිලා දිල්රුක්ෂී ජයසේන,මඩකළපුවේ ශාන්ති සෙල්වදොරේ, රත්නපුරේ අජිත් ශාන්තලාල් උදය, කොළඹ කේ එස් උදයකුමාර,  හලාවත ප්‍රශාද් පූර්ණමාල් ජයමහ, කොළඹ ඥණසිරි කොත්තිගොඩ ය. මේ අතර බී බී සී තමිල් ඕසේ මාධ්‍යවේදීන් ද අපගේ ගජ මිතුරෝ වූහ. ඔවුන්ගේ නම් මතකයට නඟා ගැනීම අසීරුය. සමාවෙන්න. පසුව තොළඹ බී බී සී වාර්‍තාකරු අසාම් අමින් ද අප අතරට එක්විය. එල්මෝ ප්‍රනාන්දු මහතා අප සියළු දෙනාගේම නියමුවා විය. ඇත්ටම ඔහු නැතිනම් සංදේශයක් නැති තරමිය.

ලන්ඩන් නුවර සිට විකාශය වූ බී බී සී සිංහල අංශයේ ප්‍රධානියාව සිටියේ අප කවුරුත් ආදරය කරන ප්‍රියාත් ලියනගේ මහතාය. දක්ෂ මාධ්වේදීන් වන චන්දන කීර් ති බණ්ඩාර, උපාලි ගජනායක, විමලසේන හේවගේ, ඉන්දිරා රාමනායක, එම් ජේ ආර් ඩේවිඩ්, ඇතුළු තවත් කීපදෙනෙකු ප්‍රියාත් මහතාගේ කාර්‍ය්‍යමණ්ඩලයට අයත් වූහ. එම වකවානුවේ ලොවපුරා ලක්ෂ විසිඑකක ජනතාවක් බී බී සී සිංහල සංදේශයට සවන් දුන්හ.

බී බී සී ලෝක සේවය තම සියවස් පූරණය පසුගිය දා සමරනු ලැබීය. අසන්නට දකින්ට ලැබුන උදානයන් බොහෝය. එහිදී බී බී සි යට පණ දුන් ප්‍රියාත් ලියනගේ, සහ එල්මෝ ප්‍රනාන්දු යන මහත්වරුන් දෙදෙනා ගැන එක වචනයක් අසන්නට දකින්නට නොලැබුනි. හැබයි සුද්දන් පිළිබඳ පුරවරුණාවේ නම් අඩුවක් නොවීය.

ඉතින් ලංකාවේ අප වැනි දුගී තීරුවේ අය ගැන කවර කථා ද? අපට ආවඩන්නැයි අපි කිසිසිවෙකුටත් කිසිසේත් ම නොකියමු. බී බී සී ලෝක සේවයේ ශ්‍රී ලංකාවේ වාර්‍තාකරුවන්ට සිදුකළ අසාධාරණය පමණක් ඉතා සැකවින් කියමු.

බී බී සී ලෝක සේවය යනු මුළු ලොව පුරා ග්‍රාහකයන් විශාල පිරිසක් සිටින අති දැවන්ත සහ පිළිගැනීම අතින් අංක එකේ මාධ්‍ය ආයතනයක් බව අවිවාදිතය. මෙය පවත්වගෙන යන්නේ මහා බ්‍රිතාන්‍යයයි. එම ආයතනය හා සම්බන්ධ මාධ්‍යකරුවන් පුහුණු කිරීම සඳහා වැයකරන ධනස්කන්ධය ද අසීමිත ය. ලංකාවේ අපට ලබාදුනනේ ද එම පුහුණුවම ය.

බී බී සී ආයතනයෙන් විශේෂ හැඳුනුම් පතක් සහ ශ්‍රී ලංකාවේ ප්‍රවෘත්ති දෙපාර්‍තමේන්තුවෙන් විදේශීය මාධ්‍යවේදීන් සඳහා ලබාදෙන හැඳුනුම් පතක් අපට ද නිකුත්කර තිබුනි. මේ අතර වසරක් පාසා අළුත් කෙරෙන ගිවිසුමක් ද අප අතර විය. මේවා බ්‍රිතාන්‍ය රජය දන්නවාද නැද්ද යන්න අපි නොදනිමු. එහෙත් එකක් දනිමු. එනම්, වසර විස්සක්, විසි පහක් ජීවිත පරදුවට තබා බී බී සී සංදේශයට සේවය කළ ශ්‍රී ලංකාවේ මාධ්‍යවේදීන් තඹ දොයිතුවක්වත් නොදී ඉවත්කර ඇති බව බ්‍රිතාන්‍ය ආණ්ඩුව නොදන්නා බව නම් අපි ඉඳුරාම දනිමු.

දෙවන ලෝක යුද්ධය පැවති සමයේ ලංකාව පාලනය කළේ බ්‍රිතාන්‍ය අධිරාජ්‍යයයි. එහිදි බ්‍රිතාන්‍යය රාජකීය හමුදාවේ සේවය සඳහා ශ්‍රී ලාංකිකිකයන් දස දහස් ගණනින් බඳවා ගැනුනි. යුද්ධය අවසන් වූ වහාම ඔවුන් සියළු දෙනා විශ්‍රාම ගැන්වූයේ මියෙන තුරා ලැබෙන විශ්‍රාම වැටුපක් ද සමඟය. සිය රටේ වැදගත් මාධ්‍ය ආයතනයක සේවය කළ ශ්‍රී ලාංකික මාධ්‍යවේදින් පිරිසක් නිකම්ම නිකම් දොට්ට දමා ඇති බවක් බ්‍රිතාන්‍ය රජය තවමත් නොදන්නා බව අපි සපථකර කියා සිටිමු.

මා ඉතාමත්ම වගකීමෙන් යුතුව ප්‍රකාශකරන්නේ අපට මෙම වින්නැහිය කළේ ප්‍රියාත් මහතාගෙන් පසුව බී බී සී සිංහල අංශයේ ප්‍රධානියා බවට පත්වූ සංගීත් කළුබෝවිල නැමත්තා බවයි. ඔහු ප්‍රවෘත්ති සහ ප්‍රවෘත්ති විශේෂංග ලෙස දුටුවේ ගැණුන්ගේ යට ඇඳුම්, යෝනි සාර, මාස් සුද්ධිය වැනි ජරා ගොඩවල්ය. එයින් පිටස්තර පුවත් ලෝකයක් ඔහුට නොවීය. අපේ ගැටළු මේ උම්මත්කයාට ගැහැණුන්ගේ යටි බඩවල් තරම් වැගත් නොවීය.

අවසන් වශයෙන් සඳහන් කරන්නට ඇත්තේ බී බී සී ලෝක සේවයට වසර සියයි. එහි සේවය කළ ශ්‍රී ලංකාවේ මාධ්‍යවේදීන් වන අපට ප්‍රශ්ණ කෝටියයි යන්න ය

ධර්‍මදාස කියන ඉහළ කථාවත් අහන්න

තවත් විස්තර දැනගැනීම සඳහා……

 

 

 

 

 

තරුණ හා ජ්‍යෙෂ්ඨ මාධ්‍යවේදීන් සවිබල ගන්වමින්, ඔවුන්ගේ මූලික වෘත්තීය අයිතිවාසිකම් තහවුරු කිරීම!

තරුණ මාධ්‍යවේදීන්, ස්ත්‍රී පුරුෂ 21 දෙනෙකුගෙන් සමන්විත නියෝජිත කණ්ඩායමක්, සියලුම දිස්ත්‍රික්ක සහ සිංහල, දෙමළ, මුස්ලිම් ප්‍රජාවන් නියෝජනය කරමින් 2022 සැප්තැම්බර් 3 වන දින දවසපුරා ඩිජිටල් මාධ්‍යකරණය පිළිබඳ උසස් වැඩසටහනක් හා සම්බන්ධ විය.

මෙම වැඩසටහන මාධ්‍ය සේවක වෘත්තීය සමිති සම්මේලනය (FMETU) විසින් ජාත්‍යන්තර ජනමාධ්‍යවේදීන්ගේ ජාත්‍යන්තර සම්මේලනය වාර්ෂිකව මෙහෙයවන IFJ – UTU ව්‍යාපෘතිය මගින් සංවිධානය කරන ලදී. ඩිජිටල් ආර්ථිකය තුළ ඵලදායී ලෙස ජනමාධ්‍යකරණයේ නියැලීමට හා ජනමාධ්‍ය වෘත්තීකයන්ගේ මූලික වෘත්තීය අයිතිවාසිකම් තහවුරු කිරීම සඳහා තරුණ මාධ්‍යවේදීන් හා ජ්‍යෙෂ්ඨ මාධ්‍යවේදීන් හා සම්බන්ධ කරමින්, සවිබල ගැන්වීම මෙම වැඩසටහනේ ප්‍රධාන අරමුණ විය.

සම්පූර්ණ වැඩසටහන ජංගම මාධ්‍යවේදය (Mojo Journalism) පිළිබඳ අන්තර්ර්ක්‍රියාකාරී ප්‍රායෝගික පුහුණුවකින් සමන්විත පුහුණු වැඩ සටහනක් විය. වැඩසටහනේ ප්‍රධාන පුහුණුකරු වූයේ ඩිජිටල් මාධ්‍යකරණය පිළිබඳ විශේෂඥ, ආචාර්ය සමීර තිලකවර්ධනය. ඔහු විවෘත විශ්ව විද්‍යාලයේ විෂය පිළිබඳ ජ්‍යෙෂ්ඨ කථිකාචාර්යයවරයෙකි. වැඩසටහනට සම්බන්ධ වූ තරුණ මාධ්‍යවේදීන් විෂයානුබද්ධ බොහෝ කරුණු ඉගෙන ගත් අතර ඔවුන් කණ්ඩායම්වලට බෙදී කෙටි වීඩියෝ පට කිහියක් නිෂ්පාදනය කරමින් බොහෝ විනෝදජනක අත්දැකීමක් ලැබීය.

පුහුණුව ලැබූ මාධ්‍යවේදීන්, තමන්ගේ වෘත්තීය අයිකිවාසිකම් සහ මාධ්‍ය කර්මාන්තයට අදාළ ගැටළු ඉස්මතු කරන වීඩියෝපට ඉදිරිපත්කර ඒ සියළුම වීඩියෝපඨ fmetu.org වෙබ් අඩවිය හරහා ජනගත කිරීමට බලාපොරොත්තු වේ.

ජාත්‍යන්තර මාධ්‍යවේදීන්ගේ සම්මේලනයේ (IFJ) මග පෙන්වීම හා සම්පත් දායකත්වයටත්, ආචාර්ය සමීර තිලකවර්ධන මහතාට සහ රේන්බෝ සන්නිවේදන ආයතනයටත් මෙම වැඩසටහන ඉතාමත් සාර්ථක ලෙස නිමකර ගැනීමට ලබාදුන් සියලු සහයෝගයන් පිළිබඳව ඔවුනට මාධ්‍ය සේවක වෘත්තීය සමිති සම්මේලනය සිය කෘතඥතාව පළකර සිටී.

වැඩසටහනේ තවත් පින්තූර රාමු කිහිපයක් පහත පළවේ.

තොරතුරු දැන ගැනීමේ අයිතිය වෙනුවෙන් දඟගෙට යන ජූලියන් ඇසේන්ජ්..

ලොව පුරා ප්‍රජාතන්ත්‍රවාදය සහ මානව අයිතිවාසිකම් පිළිබඳ මුර බල්ලෙකු යැයි හඳුන්වා ගන්නා එක්සත් ජනපදය විකිලීක්ස් නිර්මාතෘ ජූලියන් ඇසේන්ජ් දඩයම් කිරීම අත් හැරීමට සූදානම් නැත. පසුගිය දා එක්සත් රාජධානියේ ස්වදේශ කටයුතු පිළිබඳ ලේකම් ප්‍රීති පතේල්, අධිකරණ තීන්දුව පදනම්ව එක්සත් ජනපදය ඉල්ලා සිටින ආකාරයට ජූලියන් එම රටට භාරදීමට අනුමැතිය ලබා දුන්නාය. එම තීරණය ගැන අභියාචනයක් ඉදිරිපත් කිරීමට තවත් අවස්ථාවක් පවතින නමුත් පතේල් ගේ තීරණය වෙනස්වනු ඇතැයි සිතිය නොහැකිය.

එක්සත් ජනපදය විසින් ජූලියන් ඇසේන්ජ් දඩයම් කිරීම ආරම්භ වූයේ ඔහු 2010 සහ 2011 වසරවල එක්සත් ජනපදය විසින් ඉරාකයේ සහ ඇෆ්ගනිස්ථානයේ සිදු කරන ලද, පැහැදිලිව ම යුද අපරාධ වශයෙන් හැඳින්විය හැකි සිද්ධීන් ගණනාවක් සහ ඉරාකයෙන් සහ ඇෆ්ගනිස්ථානයෙන් අත් අඩංගුවට ගත් පුද්ගලයන් ගුවන්තනමෝ කඳවුරේ දී වධ හිංසාවට ලක් කළ ආකාරය දැක්වෙන වාර්තා එළි දැක්වීම නිසාය. එක්සත් ජනපද හමුදාව විසින්ම රූ ගත කරන ලද වීඩියෝ පටි අනුව බැග්ඩෑඞ් නගරයේ සාමාන්‍ය වැසියන් මෙන්ම රොයිටර් පුවත් සේවයේ වාර්තාකරුවෙකු හෙලිකොප්ටරයකින් එලල කරන ලද ප‍්‍රහාරවලින් මරා දැමෙන ආකාරය නිරූපනය වී තිබිණ. මෙම සිද්ධීන් පිළිබඳව විධිමත් පරීක්ෂණ කිසිවක් සිදුව නැත. ඒ සියල්ල යටපත් කර තිබිණ.

ගුවන්තනමෝ කඳවුරේ දී ඉරාක සහ ඇෆ්ගනිස්තානු සිරකරුවන්ට අමානුෂික ආකාරයෙන් වධ හිංසා පැමිණවීමට අමතරව ගැටුම්වලට කිසිසේත් සම්බන්ධයක් නැති අහිංසක පුද්ගලයන් ද රඳවා තිබිණ. ඒ අතර ඩිමෙන්ෂියා වැනි මානසික රෝගි තත්වයෙන් පසුවන 89 හැවිරිදි මහල්ලෙකු සහ 14 හැවිරිදි ළමයෙකු ද සිටින බව විකිලීක්ස් මගින් පළ කළ වාර්තාවල සඳහන් විය. මීට අමතරව ලෝකයේ බොහෝ රටවල එක්සත් ජනපද තානාපති කාර්යාල මගින් කරන ලද ඔත්තු බැලීම් පිළිබඳ රාජ්‍ය තාන්ත්‍රික වාර්තා 250,000ට අධික සංඛ්‍යාවක් ප්‍රකාශයට පත් කෙරිණ. මෙම තොරතුරු හෙළිවීම නිසා මානව අයිතිවාසිකම් සහ ප්‍රජාතන්ත්‍රවාදය වෙනුවෙන් පෙනී සිටින එක්සත් ජනපදයේ නිරුවත් භාවය හෙළි කෙරිණ. වෙනත් රටවල සිදුවන මෙවැනි අපරාධ අන්තර්ජාතික අපරාධ අධිකරණයට ඉදිරිපත් කිරීමටත් තවත් රටවල් සම්බන්ධයෙන් සම්බාධක පැනවීමටත් කිසි විටෙක පසුබට නොවන එක්සත් ජනපදයේ ව්‍යාජ හැසිරීම ලෝකය ඉදිරියේ හෙළි විය.

ජර්මනියේ හිට්ලර් පාලනය යටතේ සිදු වූ සහ කුරිරු ඒකාධිපති පාලනයක් යටතේ පමණක් සිදුවිය හැකි මෙවැනි අපරාධ හෙළිදරවු වූ විට මානව අයිතිවාසිකම් සහ ප්‍රජාතන්ත්‍රවාදය වෙනුවෙන් අව්‍යාජ ව පෙනී සිටින රටක් වශයෙන් කළ යුතුව තිබුණේ ප‍්‍රමාද වී හෝ අපරාධ කරුවන් නීතිය ඉදිරියට පමුණුවා දඬුවම් කිරීම ය. එක්සත් ජනපදය අනෙක් රටවල්වලින් ඉල්ලා සිටින්නේ ද එයයි. එහෙත් විකිලීක්ස් හෙළිදරව්ව සම්බන්ධයෙන් ‘ප්‍රජාතන්ත්‍රවාදයේ සහ පුවත් පත් නිදහසේ’ මුරදේවාතාවුන් වශයෙන් පෙනී සිටින එක්සත් ජනපදය ක්‍රියාත්මක වූයේ අපරාධය හෙළි කළ අය දඩයම් කිරීම ය. ඒ අනුව විකිලීක්ස් නිර්මාතෘ ජූලියන් ඇසේන්ජ් අත් අඩංගුවට ගැනීමට සූදානම් විය. ඇමරිකානු රජයේ අත් අඩංගුවට පත්වීම ජීවිතයට අනතුරක් බව දුටු ජූලියන් ඉන් මිදීමට ලන්ඩන් නගරයේ ඉක්වැදෝර් තානාපති කාර්යාලයේ දේශපාලන රැකවරණය ලබා ගත්තේය. තානාපති කාර්යාලයට හිමි රාජ්‍ය තාන්ත්‍රික වරප‍්‍රසාද නිසා බ්‍රිතාන්‍ය පොලීසිය එහි ඇතුළු නොවු නමුත් තානාපති කාර්යාලයෙන් පිට වූ වහාම අත් අඩංගුවට ගැනීමට එම කාර්යාලය වටලා ගත්හ. 2012 සිට 2019 දක්වා වසර හතකට අධික කාලයක් ජූලියන් තානාපති කාර්යාලයේ කාමරයතට සීමාව සිටියේය.

2022June30[1]julian_assange
ජූලියන් ඇසේන්ජ් [Julian Assange] ගිනිකොනදිග ලන්ඩන් බෙල්මාර්ෂ් [Belmarsh] බන්ධනාගාරදී.. 2020 අගෝස්තු

ඉක්වැදෝරයේ එක්සත් ජනපදයට හිතවත් පාලනයක් ඇතිවීම නිසා ජූලියන්ගේ දේශපාලන රැකවරණය ඉවත්කිරීමත් සමග බ්‍රිතාන්‍ය පොලීසිය ඔහු බලහත්කාරයෙන්ම රැගෙනවිත් බ්‍රිතාන්‍යයේ දරුණුතම සිර ගෙයක් වන බෙල්මාර්ෂ් හි හුදකලා කොට රඳවා ගෙන සිටී. කලින් අධිකරණයකින් ඔහු නිදහස් කළ ද බ්‍රිතාන්‍ය පොලීසිය විසින් ඇමරිකානු රජයේ බලපෑම මත ඔහු දිගටම සිරගත කර ගෙන සිටියි.

ජූලියන් ඇසේන්ජ්ට විරුද්ධව එක්සත් ජනපදය චෝදනා කරන්නේ ඔත්තු බැලීමේ පනතක් යටතේය. එම පනත යටතේ චෝදනා 18ක් ඉදිරිපත් කර ඇති අතර ඒවා ඔප්පු වුවහොත් ඔහුට වසර 175ක සිර දඬුවමක් නියම වනු ඇත. මෙවැනි චෝදනා පිළිබඳ ව එක්සත් ජනපද අධිකරණය අතීතයේ ක්‍රියාකර ඇති ආකාරය සැලකිල්ලට ගන්නා නීතිවේදීන්ගේ අදහස ජූලියන් ට එරෙහිව නගා ඇති සියලු චෝදනාවලින් වැරදිකරු කිරීමට බෙහෙවින් ඉඩ ඇති බව යි. එමනිසා එය බොහෝ දුරට තොරතුරු දැන ගැනීමේ අයිතිය වෙනුවෙන් පෙනී සිටින ජූලියන් ගේ අවසානය විය හැකිය.

එක්සත් ජනපදයට ජූලියන් අවශ්‍ය වන්නේ ඔහු කරන ලද හෙළිදරව් නිසාය. පැහැදිලිව ම යුද අපරාධ වශයෙන් හැඳින්විය හැති එම සිද්ධීන් ඔත්තු බැලීමේ පනත යටතේ දඬුවම් ලැබිය හැකි වරදක් වන්නේ අත්තනෝමතික පාලනයක් යටතේ පමණි. ඔහු කරන ලද හෙළිදරවු එක්සත් ජනපදයේ ආරක්ෂාවට තර්ජනයක් යැයි හැඳින්වුවත් සැබැවින් ම ඉන් සිදුව ඇත්තේ එක්සත් ජනපදයේ හමුදා මෙහෙයුම් සිවිල් වැසියන්ගේ ආරක්ෂාවට තර්ජනයක් බව හෙළි විමය. මෙම හෙළිදරවු කිරීම් නොවුයේ නම් ඇෆ්ගනිස්ථානයේ විවාහ උත්සවයක් පැවැත්වූ ස්ථානයකට ඇමරිකානු ගුවන් ප්‍රහාර එල්ල වූ ආකාරයත් ඇප්ගනිස්ථානයේම රෝහල් ඇමරිකානු භටයන්ගේ ඉලක්ක වූ ආකාරයත් සෙසු ලෝකයා පමණක් නොව ඇමරිකානු ජනතාව පවා දන්නේ නැත. මෙම තොරතුරු ජනතාව අතට පත් කිරීම එක්සත් ජනපද ආණ්ඩුක්‍රම ව්‍යවස්ථාවෙන් ද තොරතුරු දැන ගැනීමේ අයිතියෙන් ද තහවුරු කර ඇති නීතිමය ප‍්‍රතිපාදනයන් ය.

එහෙත් පුදුමයට කාරණයක් වන්නේ රුසියාව විසින් යුක්‍රේනයේ සිදු කරන්නේයැයි කියන යුද අපරාධ සම්බන්ධයෙන් මහත් හඬ නගන ප්‍රධාන ප්‍රවාහයේ ජනමාධ්‍ය පවා ජූලියන්ගේ අයිතිවාසිකම් වෙනුවෙන් මුනිවත රැකීම ය. එය සැබැවින් ම අපරාධය සිදු කළ අය වෙනුවෙන් පෙනී සිටීමකි.

කෙසේ වුවත් තොරතුරු දැන ගැනීමේ අයිතිය වෙනුවෙන් පෙනී සිටින සමහර ආයතන එක්සත් ජනපදයේ සහ එක්සත් රාජධානියේ මෙම පියවර විවේචනයට ලක් කර ඇත. මාධ්‍ය නිදහස ගැන එක්සත් ජාතීන්ගේ විශේෂ වාර්තාකරු නිල්ස් මෙල්ස්නර් ජූලියන් හුදකලාව සිරගත කොට තැබීම හැඳින් වූයේ වධ හිංසා පැමිණවීමක් සේය. ඒ පිළිබඳව එක්සත් ජනපදය සහ එක්සත් රාජධානිය යන රටවල් දෙකම වගකිව යුතුයැයි ඔහු හැඳින් වූයේය.

ජූලියන් එක්සත් ජනපදයට භාර දීමේ තීන්දුව ප්‍රකාශයට පත් කිරීමෙන් පසුව මාධ්‍ය සාකච්ඡාවක් පැවැත් වූ ජනමාධ්‍යවේදීන්ගේ අන්තර්ජාතික පෙඩරේෂණයේ සභාපති ඩොමිනික්, ජූලියන් මරණ දඬුවමට ලක්වීමේ අවධානමක් ඇති ජනමාධ්‍යවේදියෙකු මෙන්ම දේශපාලන සිරකරුවෙකු වශයෙන් හැඳින් වූයේය. ජනමාධ්‍ය නිදහස අගය කරන සියලු දෙනාම මෙම හිතුවක්කාර තීරණයට විරුද්ධ විය යුතු යැයි ඔහු අවධාරණය කෙළේය.

2022June30[1]_stellamorischildren
ස්ටෙලා මොරිස් සහ පුතුන්, ගේබ්රියෙල් (දකුණේ) සහ මැක්ස් (වමේ) බෙල්මාර්ෂ් බන්ධනාගාරය අසල [2020 අගොස්තු]

වෙනත් සාකච්ඡාවක දී කරුණු දැක් වූ ජූලියන් ගේ බිරිඳ ස්ටෙලා මොරිස් ස්වදේශ කටයුතු පිළිබඳ ලේකම් ප‍්‍රීති පතේල් ගේ තීරණයෙන් පසුව වෙනත් සිර මැදිරියකට ගෙන යන ලද ඔහුට අමුත්තන් මුණ ගැසීමට අවස්ථාවක් පවා ලබා නොදුන් බවත් ඔහු නිරුවත් කොට දවසක් ම රඳවා තැබීමෙන් වධ හිංසාවන්ට ලක් කර ඇති බවත් පැවසුවා ය.

එක්සත් ජනපදය ජූලියන් දඩයම් කරන්නේ ඔහුගේ සංස්කාරත්වයෙන් පළ කළ විකිලීක්ස් හෙළදරවු නිසා විදේශවල සේවය කරන ඇමරිකානු ආරක්ෂක අංශවල සාමාජිකයන්ගේ ආරක්ෂාවට තර්ජනයකි යන චෝදනාවයි. එහෙත් එවැනි චෝදනාවක් නිසා ජනතාවගේ තොරතුරු දැන ගැනීමේ අයිතියට තහංචි පැනවීමත් තොරතුරු හෙළි කළ අයට දඬුවම් දීමත් සාධාරණය කළ නොහැකිය. ප්‍රජාතන්ත්‍රවාදය සහ මානව අයිතිවාසිකම් වෙනුවෙන් පෙනී සිටින්නේයැයි යන කඩතුරාව නිසා යුද්ධයේ දී පිළිපැදිය යුතු ජිනීවා සම්මුතීන් කඩ කිරීමට අවස්ථාවක් ලැබෙන්නේ නැත. යුද්ධයක් පවතින අවස්ථාවක දී වුවද සිවිල් ජනතාවගේ ආරක්ෂාව තහවුරු කිරීමට ගැටුම්වලට සම්බන්ධ සියලු පාර්ශ්වයන් බැඳී සිටී. එම අයිතිය හමුදාවේ ආරක්ෂාව යන දුහුල් පටකින් වසා දැමිය නොහැකිය.

ජූලියන් ඇසෙන්ජ් දඩයම් කිරීමෙන් එක්සත් ජනපදය සහ එහි මිතුරු රටවල් නැවත වරක් තහවුරු කරන්නේ මානව අයිතිවාසිකම් සහ මූලික නිදහස යන සංකල්ප ඔවුන්ට කැමති ආකාරයට නිර්වචනය කළ හැකි හිස් වදන් බවය. තොරතුරු දැන ගැනීමේ අයිතිය පිළිබඳ එක්සත් ජාතීන්ගේ විශේෂ වාර්තාකරු නිල්ස් මෙල්ස්නර් නැවත නැවතත් අවධාරණය කර ඇති ආකාරයට එක්සත් ජනපදය සහ එක්සත් රාජධානිය ජූලියන් වධ හිංසාවන්ට ලක් කර තිබුණ ද ඒ පිළිබඳ එම රටවල් තැකීමක් කර නැත. මෙක්සිකෝ ජනාධිපති ලොපෙස් ඔබ්‍රඩොර් පුවත් පත් සාකච්ඡාවක දී ඇමරිකානු හමුදා භටයන් බැග්බෑඞ් නගරයේ දී ගුවනින් සාමාන්‍ය වැසියන්ට වෙඩි තබා ඝාතනය කිරීමේ සිද්ධිය දැක්වෙන වීඩියෝ පටිය ප‍්‍රදර්ශනය කරමින් එය පැහැදිලිව ම යුද අපරාධයක් නිසා එම වැරදිකරුවන්ට දඬුවම් ලබා දිය යුතු බවත්, තමා ඉදිරි දිනක ඇමරිකානු ජනාධිපති හමුවන විට මෙම කරුණු මත කරන බවත්  පැවසුවේය.

දුර්වල මානසික තත්වයක පසුවන ජූලියන් හුදකලාව සිර ගත කර සිටීමෙන් ඔහුගේ ජීවිතයට හානියක් විය හැකි බව වෛද්‍ය විශේෂඥයන් කණ්ඩායමක් ප්‍රමුඛ කීර්තිමත් පුද්ගලයන් ද කරුණු ඉදිරිපත් කර තිබිය දී ඒ ගැන කිසිදු සැලකිල්ලක් නොදැක්වීමෙන් එක්සත් ජනපදය සහ බටහිර රටවල් මෙන්ම ඔවුන්ගේ අනුගාමිකයන් මානව අයිතිවාසිකම් තම දේශපාලන වුවමනාවන්ට යටපත් කරන බව නැවත වරක් සනාථ කර ඇත. කෙසේ වුවත් ජූලියන් ඇසේන්ජ් තොරතුරු දැන ගැනීමේ ශුද්ධ වූ අයිතිය වෙනුවෙන් ජීවිතය කැප කළ වීරයෙකු වශයෙන් ජනතා සිත් සතන් තුළ සදා ජීවත් වනු ඇත.

Mahinda Hattaka
Thanks To

ධර්මරත්නම් සිවරාම්: සන්සුන් චින්තකයෙකුගේ නික්ම යාම

LAST UPDATED ON 30 APRIL 2015

දෙමළ මාධ්‍යවේදී ධර්මරත්නම් සිවරාම් නාඳුනන පුද්ගලයින් සිව් දෙනෙකු විසින් පැහැරගනු ලැබූ බව අපේ‍්‍රල් 28 වෙනිදා බ‍්‍රහස්පතින්දාවේ මා දැනගත්තේ ජර්මනියේ වේලාවෙන් රාතී‍්‍ර 7.30ට පමණ ය. එතැන් සිට එළඹුණු පැය අට හමාරකට ආසන්න කාලය පුරා තවත් බොහෝ අයවළුන් සමඟ වියරුවෙන් මෙන් සිවරාම්ගේ ජීවිතය ගළවා ගැනීමට අපි කි‍්‍රයාත්මක වීමු. නමුත් සිකුරාදාවේ ජර්මනියේ වේලාවෙන් අළුයම 4.00ට පමණ සිවරාම්ගේ ප‍්‍රාණය නිරුද්ධ සිරුර හමුවූ වගට ඒ ශෝකී පණිවුඩය කොළඹින් මා වෙත ලැබිණ. ඒ පණිවුඩය කියාගත නොහැකිව සිය දුරකථන ඔස්සේ වාවාගත නොහැකි වේදනාවෙන් ඉකිබිඳින දෙමළ, සිංහල සහ යුරෝපීය හිතවතුන්ගේ සාමූහික වියෝදුක දරාගත නොහැකි තරම් එකක් විණ. ඒ, අප වටකොටගත් අපේක්‍ෂා විරහිතභාවයේ පොදු හැඟීමෙනි. සිවරාම්ගේ ජීවිතය බේරාගැනීමට ඒ හෝරා කිහිපයේ අසීමිත ලෙස වෙරගත් දෙමළ, සිංහල සහ සෙසු ජාතීන්ට අයත් කි‍්‍රයාකාරීන් සියල්ල මරණය පිළිබඳවත්, අපගේ ජීවිතවලට මෙන්ම අරගලයට විශේෂ වූ සහෘදයින්ගේ හදිසි වියෝගයන් පිළිබඳවත් අතීත අත්දැකීම්  ඕනෑ තරම් විඳ තිබිණ. නමුත් සිවරාම්ගේ මරණය මුල් කොට ඇවිළ ගිය අපගේ ශෝකයේ වෙනස්කමක් තිබිණ. ඒ වනාහී සිවරාම්ගේ මරණය විසින් නියෝජනය කළා වූ යථාර්ථයන්ට අදාළ වූවකි.

‘මහා මාධ්‍ය’ විසින් පාලනය කරනු ලබන ලෝකයක දෙමළ ජාතික අරගලය පිළිබඳ යථාර්ථයන් ලෝකයට අනාවරණය කිරීමේදී සිවරාම් හැම අතින්ම සාර්ථක වූයේය. පීඩිතයින්ගේ හඬ අවශේෂ ලෝකයට ඇසීම වළක්වනු පිණිස කි‍්‍රයාත්මක මාධ්‍ය ප‍්‍රබන්ධන් විසින් පාලනය වන ලෝකයක සිවරාම්ගේ සාර්ථකත්වය වූ කලී අතිශයින් උද්වේගජනක ජයග‍්‍රහණයකි. සිවරාම්ගේ මරණය විශේෂිත සංවේගයක් දනවනුයේ ඔහුගේ මරණය සිදුවන විට හෙතෙම සිය ශක්තීන් කූටප‍්‍රාප්තියට මෙහයවා සිය කාර්යයන් සියළු පැතිමානයන් ඔස්සේ පෙරට විහිදුවමින් තිබූ නිසාය. විශ්ලේෂණාත්මක කුසලතාවත්, සුපැහැදිලි රචනා ශෛලියත්, මාධ්‍ය පිළිබඳ තියුණු අවබෝධයත්, ඔහු විසින් ප‍්‍රතිරාව කළ හඬ හිමි පීඩිත දෙමළ ජනයාගේ සංස්කෘතික පදනම් පිළිබඳ වූ ගැඹුරු වැටහීමත්, ලෝක පරිමාණව කි‍්‍රයාත්මක ආර්ථික, දේශපාලන හා මිලිටරි බලවේගයන් පිළිබඳ වූ තේරුම්ගැනීමත් එක්තැන් කළ අසාමාන්‍ය පෞරුෂයක් සහිත සිවරාම් අන්තර් ජාලය වැනි නූතන මාධ්‍ය විසින් සම්පාදනය කොට ඇති තාක්‍ෂණික ඉඩ ප‍්‍රස්ථා පිළිබඳ සමීප ඥාණයක් හිමි අයෙකු විය. ලොව පීඩිත සියලු ජනයාට මූලාදර්ශයක් කොට සැළකිය හැකි ‘ටැමිල් නෙට්’ වෙබ් අඩවියේ සාර්ථකත්වය සඳහා ඔහු විසින් ඉටුකළ කාර්‍යභාරය ගිණිය නොහැකි තරම් ය.

ක්‍ෂුද්‍ර සම්භාව්‍ය රචනා

ඔහු ඉටුකළ වැඩකොටස බහුවිධ මානයන් සහිත එකකි. ශී‍්‍ර ලාංකීය ප‍්‍රධාන ධාරාවේ පුවත් පතක් වූ ‘ඩේලි මිරර්’ පුවත්පතට ඔහු විසින් සති පතා ලියන ලද ලිපිය, එම පුවත්පතේ කර්තෘවරයා විසින්ම ප‍්‍රකාශ කළ ආකාරයට ‘සුවිශාල අනුගාමිකත්වයක්’ සහිත විය. එහි අන්තර්ජාල සංස්කරණය කියවීම සඳහා සෑම බදාදාවකම ලොව පුරා ශී‍්‍ර ලංකාව පිළිබඳ උනන්දුවක් දැක් වූ බොහෝවුන් නොඉවසිල්ලෙන් සිටියහ. ඔහු අවිවාදයෙන්ම ලොව විශිෂ්ඨතම යුද විශ්ලේෂකයෙකු වශයෙන් පිළිගැණින. ඔහු විසින් ලියන ලද බොහෝ කෙටි ලිපි වූකලී ක්‍ෂුද්‍ර මට්ටමේ සම්භාව්‍ය රචනා සේ සැළකිණ. ඒවා ගැඹුරින්ම විද්‍යාත්මක වූ අතර සරල හා සුගම ශෛලියෙන් ලියැවී තිබිණ. ඔහුගේ දේශපාලන ලිපි තුළ කෙතරම් තියුණු සහ දෝෂ රහිත තර්කනයක් අන්තර්ගත වීද යත්, ඔහුගේ අදහස්වලට එරෙහිවූවන් පවා එකී ලිපි කියවීමට මෙන්ම ඒවා වින්දනයටත් රුචි කළහ. නමුත් ඔහු ඒ පිළිබඳ අහංකාරයකින් නොපෙලුණේය. වරක්, ජාත්‍යන්තර සමුළුවකට සහභාගී වූ දෙමළ දේව ධර්මවේදියෙකු වන මහාචාර්ය එස් ජේ එම්මෑනුවෙල් පියනම සිවරාම්ගේ ගැඹුරු ආලෝචනාවන් පිළිබඳ ප්‍රසාද මුඛයෙන් කතා කළේය. ‘ෆාදර්, මම පරිඝනකයක් ළඟ ඉඳගෙන හොයා ගන්න තොරතුරු ටික එකට ගොණු කරන සාමාන්‍ය මනුස්සයෙක්’ යැයි සිවරාම් කීවේ ඔහුට ආවේණික නිහතමානී බවින් ඒ කෙරෙහි සිනාසෙමිනි.

‘‘විද්‍යාව පිළිබඳ ගැටළුවලදී ලක්‍ෂ සංඛ්‍යාතවුන්ගේ අධිකාරය හා බලයට වඩා එක් මිනිසෙකුගේ සන්සුන් තර්කනය වටිනා බව’’ ගැලීලියෝ කීවේය. සිය සමකාලීන ලෝකයේ අධිගෘහිත අදහස් හා සංස්ථාපිත තත්ත්වයන් සමඟ සටන් කිරීම සඳහා ගෙවිය යුතු මිල පිළිබඳ ගැලීලියෝ මනාව දැන සිටියේය. ගැලීලියෝගේ උපන්‍යාසය නිවැරදි බව සිවරාම් සිය භාවිතයෙන්ම සනාථ කළේය.

කරුණාගේ බිඳීම

මරණයට වසරකට පමණ පෙරාතුව සිවරාම් ජර්මනියට පැමිණියේය. බලපෑම් සහගත පුද්ගලයින් කිහිප දෙනෙකු මුණගැසීම සඳහා සූදානම් කර තිබූ රැස්වීම් වාර කිහිපයකටම මම ඔහු කැටුව ගියෙමි. ති‍්‍රකුණාමල වරාය හා අත්‍යන්තයෙන්ම ගැටගැසී පවතින එක්සත් ජනපද හා බි‍්‍රතාන්‍ය අභිලාෂයන් විසින් සාම කි‍්‍රයාදාමය අස්ථාවර කරන ආකාරයත්, මැද පෙරදිග කලාපය තුළ එක්සත් ජනපද යුද කි‍්‍රයාමාර්ගයන්ගේ අවශ්‍යතා හා පීඩනයන් විසින් සාම කි‍්‍රයාදාමය විනාශ කිරීමට පෙර ජර්මානු ජනයා සාම කි‍්‍රයාදාමයට සහාය දැක්වීම සම්බන්‍ධයෙන් කි‍්‍රයාකාරී භූමිකාවකට මැදිහත්විය යුතු ආකාරයත් පිළිබඳ ඔහු විසින් කළ සෘජු හා ඒත්තු ගන්වන සුළු දීප්තිමත් විශ්ලේෂණයෙන් මම සැබැවින්ම විස්මයට පත්වීමි. ඇත්ත වශයෙන්ම සිවරාම් මියයන මොහොත වන විට ඔහු ප‍්‍රධාන කථිකයෙකු වශයෙන් සහභාගී වන රැස්වීම් ගණනාවක් මැයි මාසයේ අග දී ජර්මනියේ සංවිධානය කිරීමට අවශ්‍ය පියවර අපි ගනිමින් සිටියෙමු.

සිවරාම් හුදෙක් බටහිර පරිභෝජනයට ගැළපෙන පරිදි තොරතුරු සංගෘහිත කිරීමට සමත් වූ ඵලදායී ප‍්‍රචාරකයෙකු පමණක් නොවීය. ඔහු තමන් පැවත එන්නා වූ දෙමළ සමාජයේ දේශපාලනය තුළ මුල් බැසගත් අයෙක් විය. දෙමළ සමාජයේ අභ්‍යන්තර දේශපාලනය සමඟ ඔහුට පැවතියා වූ සම්බන්ධයේ ගැඹුර බාහිර ලෝකයට විදාරණය කොට පෙන්නුම් කළා වූ නිදසුන් අවස්ථාවක් වන්නේ ‘කරුණා පිළිබඳ ප‍්‍රශ්නය’ හමුවේ ඔහු විසින් සිදුකළ ආකර්ෂණීය මැදිහත්වීමයි. දෙමළ ඊළාම් විමුක්ති කොටි සංවිධානය හැර ගිය සෙන්පතියෙක් වූ කරුණා, දෙමළ ජාතික ව්‍යාපාරය හා දෙමළ සමාජය කෙරෙහි සුවිශාල බාධකයක් බවට පත්වීමේ තර්ජනය මතු කරන ලදී. සිවරාම් මෙන්ම දිවයිනේ නැගෙනහිර පළාතෙන් ආ අයෙකු වූ කරුණා, සිවරාම් හොඳින් දැන හඳුනන අයෙකු විය. යුද සමයේ දක්‍ෂ හා දීප්තිමත් මිලිටරි නායකයෙකු වූ කරුණා නැගෙනහිර දෙමළ ජනයා අතර ඉමහත් ගෞරවාදරයට පාත‍්‍රවූවෙකි. ප‍්‍රචාරක සංග‍්‍රාමය ආරම්භ වීමත් සමඟම පාර්ශ්වික යුද්ධයක් මතුවනු ඇතැයි යන භීතිය හා ව්‍යාකූලත්වය නොවැළැක්විය හැකි ලෙස දෙමළ ප්‍රජාව තුළ නැගී ආයේය. නමුත් දෙමළ සමාජය තුළ සිවරාම් විසින් කරන ලද දේශපාලනික මැදිහත්වීම අර්බුදයේ තීව‍්‍රතාව අවම කිරීම අරභයා අතිමහත් ලෙස දායක විය. සැබැවින්ම අනතුරට පත්ව ඇත්තේ කුමක්ද යන්න පිළිබඳව සිවරාම් විසින් සෘජු හා දෝෂ විරහිත ශෛලියෙන් දෙමළ සමාජයට කරුණු කියා පෑවේය. අව්‍යාජ තර්කයන් හා අවස්ථාවාදී තර්කයන් අතර සුපැහැදිලි බෙදුම් රේඛාව ඔහු විසින් ඇඳ පෙන්වන ලදී. මෙම පාර්ශ්වික ගැටුම ප‍්‍රමුඛත්වයට පැමිණියහොත් ඉන් වාසි ලබනු ඇත්තේ කවුරුන්ද යන වග හෙතෙම ඉතා මැනවින් පෙන්වා දුන්නේය. සමාජයේ සංසක්තභාවය ආරක්‍ෂා කරගැනීමේ ඇති වැදගත්කමත්, දුෂ්කරතා මධ්‍යයේ දිනාගත් ජනතා පරමාධිපත්‍යය රඳවා ගැනීමේ ඇති අවශ්‍යතාවත් ඔහු විසින් තීක්‍ෂණ ලෙස පැහැදිලි කරදෙන ලදී.

කොංගෝව ගැන

ලෝකයේ බොහෝ පැතිවල සිදු වූ සමාජ බිඳවැටීම්වල ප්‍රතිවිපාක පිළිබඳ සිවරාම් සතු වූ අත්දැකීම් සම්භාරය අති විශාල විය. ඔහු ජර්මනියේ බ්‍රේමන් නගරයේ සාකච්ඡාවන්ට සහභාගී වූ දිනවල කොංගෝවේ සුවිශාල සමූල ඝාතන හා විනාශයන් මගින් බටහිර මහා පරිමාණ වෙළඳ ව්‍යාපාර ලාභ ලබන ආකාරය දීර්ඝ හා විස්තීරණ ආකාරයෙන් අප හමුවේ විග‍්‍රහ කරනු ලැබීය. ක්‍ෂුද්‍ර පරිපථයන්ට හා ජංගම දුරකථනයන්ට අත්‍යාවශ්‍ය වන අතිශයින් මිල අධික කොලම්බයිට් ටැන්ටලයිට් හෙවත් ‘කොල්ටන්’ ඛනිජය ඉතා අඩු මිලට ගැනීමට අවකාශ සළසා දීම වෙනුවෙන් බටහිර නිශ්චිත මහා සමාගම් ගණනාවක් විසින් වෙනස් බල ප‍්‍රදේශ සහිත යුද්ධාධිපතින්ට වාසි සහගත ලෙස කටයුතු කරන ආකාරය ගැන හෙතෙම අතිශයින් වැදගත් විශ්ලේෂණයක් සිදුකරන ලදී. සමාජයේ අභ්‍යන්තරික කඩා වැටීමක් තිබියදී, කොල්ටන් හා වෙනත් ඛනිජ ද්‍රව්‍ය විකිණීම සඳහා යුද්ධාධිපතීන් එකිනෙකා තරඟවැදීම විසින් අදාළ ඛනිජ මිල වේගයෙන් පහළ දමනු ලැබීම වැළැක්විය නොහැකි ය. මේ අනුව කොංගෝවේ ලක්‍ෂ සංඛ්‍යාත ජනයා මිය යාම අනිවාර්ය වන නමුත් ජංගම දුරකථන සඳහා කොල්ටන් ලාභදායී ලෙස සැපයුම බාධා විරහිතව පැවතීම ද අනිවාර්ය විය. කරුණා පිළිබඳ අර්බුදයේදී සිවරාම්ගේ මැදිහත්වීම හුදෙක් දෙමළ සමාජයේ ගැඹුරට පමණක් සීමා වූවක් නොව, ඔහුගේ ස්ථාවරයන් හා විශ්ලේෂණයන් ඉන් පරිබාහිර ලෝකයට ද පරාවර්තනය විය. සිංහලයෙකු වශයෙන් කරුණාගේ ප‍්‍රශ්නය පිළිබඳ සුවිශාල ආලෝචනාවන් මා වෙත සම්පාදනය කරගනු ලැබුවේ සිවරාම් විසින් ඉංගීසි බසින් ලියන ලද ලිපි මගිනි. එබැවින් ඔහුගේ සිතුම් සහ කි‍්‍රයාකාරීත්වයන් අතර ඒකාබද්ධතාව දෙමළ සමාජය අභ්‍යන්තරයෙන් මෙන්ම බාහිරින් ද එක සේ පැවතිණ. ඔහු යථාර්ථය හැමවිටම එහි සමස්තය තුළ තබා විග‍්‍රහ කළේය. ස්වකීය බුද්ධිමය ස්වෛරීභාවය සිවරාම් වැදගත්කොට සළකා ආරක්‍ෂා කරගන්නා ලද්දේ දෙමළ ජනයාගේ ස්වෛරීභාවය ආරක්‍ෂා කරගැනීමේදී දැක්වූ දෘඪතාවෙන්ම යුතුවය. මේ අර්ථයෙන් සැළකූ විට සිවරාම් හුදු ප‍්‍රචාරකයෙකු නොව, සත්‍ය ගවේෂකයෙකු හා සත්‍ය වෙනුවෙන් සටන් කරන්නෙකු ද විය.

සිවරාම් ඝාතනය ලක්වන විට, ඔහු කළ කාර්යයන්ගේ එකිනෙකට වෙනස් පැතිමානයන් රමණීය ලෙස සංයෝග වෙමින් තිබුණි. නමුත් ඔහු කළ වැඩ කොටසෙහි බහුවිධ මානයන්ගේ අරුත ඔහුට බොහෝ සතුරන් සිටි බව ය. ඔහුගේ මරණයට වගකිව යුත්තේ කවුරුන්ද? ඔහුගේ ඝාතනයන් සොයා ගනු ඇතිද?

බහුවිධ සතුරන්

පසුගිය වසරේ සිවරාම් ජර්මනියේ සිටින සමයේ ඔහුගේ මිතුරෙකු වූ නඩේසන් මරා දැමිණ. ශ්‍රී ලංකා රජය මේ දක්වා කිසිදු වගඋත්තරකරුවෙකු සොයාගෙන නොමැත. ඔහුගේ තවත් සගයෙකු වූ බි‍්‍රතාන්‍ය ගුවන් විදුලියේ සේවය කළ නිමලරාජන් ඊට පෙර මරා දැමිණ. රජයට අනුව ඔහුගේ ඝාතකයන් කවුරුන්දැයි තවමත් නොදනියි. දැන් සිවරාම් ද මරා දමා තිබේ. ඔහු මරා දැම්මේ කවුරුන් විසින්ද? මා සිතන ආකාරයට එය අගතා කි‍්‍රස්ටි විසින් ලියන ලද අභිරහස් නවකතාවක් වන The Murder on the Orient Express වැන්නකි. ඊට අනුව සෑම සැකකරුවෙකුම ඝාතනයට සම්බන්‍ධ බව පෙනී යයි. සිවරාම් විසින් හෙළිදරව් කරන ලද සියලුම පුද්ගලයින්ට ඔහුගේ මරණය දැකීමේ අභිප්‍රාය තිබිණ. සූරාකෑමේ නියැළුණවුන්ටද, ජනතාව අතර බෙදීම් ඇතිකොට ශක්තිමත් කළවුන්ට ද, ජාතිවාදය ප‍්‍රවර්ධනය කළවුන්ටද, දිවයිනේ ඇතැම් ප‍්‍රදේශයන්හී ආධිපත්‍යධාරී බලයක් අපේක්‍ෂා කළ බාහිර බලවේගයන්ට ද යන සියල්ලන්ට ඔහුගේ මරණය ප‍්‍රාර්ථනා කරන්නට හේතු සමුදායක් තිබුණි. සිවරාම් මරා දමන්නට මින් කවර බලවේගයන් සන්ධානගත වීද යන්න තවමත් අනාවරණය කර නොගත් අභිරහසකි. නමුත් ඔහුගේ මරණයෙන් මේ සියල්ලන්ට ප්‍රතිලාභ අත් වූ බව නම් පැහැදිලි ය.

ඔහු කායිකව ඝාතනය කිරීමෙන් ඔහුගේ සතුරන් සෑහීමකට පත් නොවේ. ඔහු සටන් කොට සුරැකි අදහස් අවමානයට පාත්‍ර කිරීමට ද ඔවුන්ට අවශ්‍යව තිබේ. ඔහුගේ අදහස් හා ඉටුකළ කාර්යය විකෘත කිරීමේ අටියෙන් ස්වකීය අභිමථාර්ථයන්ට අනුකූල ලෙස සිවරාම්ගේ ප‍්‍රතිරූපය යළි ගොඩනැංවීමට උනන්දුවක් දක්වන්නවුන් එමට ය. නිදසුනක් ලෙස දයාන් ජයතිලක වැනි සිංහල ප‍්‍රකාශකයින් සිවරාම්ගේ තර්කනයේ රූපකාරය එහි අන්තර්ගතයෙන් වෙන්කිරීමට උත්සාහ කරනු දැකිය හැක. ස්වකීය ජනයා සහ ඔවුන්ගේ අරගලය සමඟ සිවරාම්ට පැවැති සම්බන්‍ධය විසන්‍ධි කිරීමට ඔවුන්ට අවශ්‍යව තිබේ. ඔහු දිවිහිමියෙන් පෙනී සිටි දෙය විනාශ කිරීම පිණිස ඔවුහු සිවරාම්ට ප‍්‍රශංසා කරති. නමුත් සත්‍යය වන්නේ සිවරාම් ස්වකීය දිවි පරදුවට තබා ප‍්‍රකාශනයක් ලබාදෙන ලද්දේ පිබිද එන ජනතාවකට ය. දෙමළ ජනයාගේ අරගලය සිවරාම්ගේ දීප්තිමත්භාවයෙන් කඩා වෙන් කළ නොහැකිය. යුදවන් වකවානුව වූ කලී අඳුරු කුරුබිලියක් තුළ ගමන් කිරීමක් හා සමාන බවත්, සාම කි‍්‍රයාදාමය එකී කුරුබිලියෙන් බැහැරට ඒමට ඇති මාවත බව ද වේලූපිල්ලේ ප‍්‍රභාකරන් වරක් ප්‍රකාශ කොට තිබුණි. යුද වකවානුවකදී අත්‍යවශ්‍යයෙන්ම පටු ආකාරයක් ගන්නා ප්‍රජාතාන්ත්‍රික ක්‍රියාදාමයන් සාමකාමී වකවානුවක් තුළ වේගයෙන් වෙනස් කළ යුතු බවත්, සජීවී විවාදයන්ට ප්‍රකාශ වීමට අවාකශ සැළසෙන පරිදි සකළ විධ සීමාවන් පුළුල් විය යුතු බවත් ඔහු ඉන් අදහස් කළේය. සිවරාම්ගේ ශක්‍යතාවන් පෝෂණය වූයේ මෙම කොන්දේසි යටතේය. අරගලය ආයුධවලින් වචනවලට මාරුවන සැණින් සුපිරිතර රණකාමියා සිවරාම් විය. ඔහුගේ අරමුණ සත්‍යවාදී වූ අතර එය පැන නැගුණේ තුවක්කු බටයෙන් නොව, පෑන් බටයෙනි. දෙමළ සමාජය තුළ පංති අරගලය පෙරට තල්ලූ කිරීම සම්බන්‍ධයෙන් හෝ සාම උගුලේ අනතුරු පිළිබඳව හෝ ඔහු විසින් දෙමළ මාධ්‍යයන්ට ලියන ලද ලිපි මඟින් වේවා, සිංහල ජාතිවාදය හා බටහිර අභිලාෂයන් පිළිබඳව ඔහු විසින් කොළඹ ඉංගී‍්‍රසි මාධ්‍යයන්ට ලියන ලද ලිපි මඟින් වේවා, යුද්ධය පුපුරා යාමේ තර්ජනය පිළිබඳව බටහිර ධනවත් රාජ්‍යයන්හි දී ඔහු විසින් පවත්වන ලද කතා තුළින් වේවා සිවරාම් සතු මෙම බලය නිරායාසයයෙන් ‍ඒත්තු ගන්වනු ලැබුණි.

දෙමළ ජනයා සහ සිවරාම්

ආචාර්ය එස් සදානන්දන් පෙන්වා දී ඇති ආකාරයට ‘‘සිංහල ජාතිවාදය වඩාත් කුපිත කරවනු ලැබුවේ ලෙනින්ගේ වැදගත් සිද්ධාන්තයක් සිවරාම් අතිශය විනාශකාරී බලපෑමක් සහිතව භාවිතාවේ යෙදවීම විසිනි: සැබැවින්ම සිදුවෙමින් පවතින්නේ කුමක්ද යන්න පැහැදිලි කිරීමට සිවරාම් තමන්ගේ කාර්යය සීමා කරගත් අතර සිදුවිය හැක්ක ගැන, වඳ සමපේක්‍ෂණයන්ගේ පැටලීමට හෙතෙම උත්සුක නොවීය.’’

දෙමළ විමුක්ති කොටි සංවිධානය විසින් නායකත්වය සැපයූ දෙමළ ජනයාගේ අරගලයෙන් සිවරාම් වෙන් කොට දැක්වීමට තැත් දරන දයාන් ජයතිලක වැන්නන්ට යොමු කිරීමට ප්‍රශ්නයක් මට තිබේ. බුද්ධිමතෙකු වටා වන සමාජයේ හා ජනතාවන්ගේ අඛණ්ඩ සංවර්ධනයකින් තොරව ඔහුගේ පූර්ණ සංවර්ධනයක් සිදුවිය හැකිද? බේතෝෆන් ප‍්‍රකට කළාවූ දීප්තිමත්භාවය විසින් රදළ බලවේගයන්ට එරෙහිව නැගීගත් ජර්මානු ධනේශ්වරය තුළ වර්ධනය වන විශ්වාසය පරාවර්තනය නොකළේද? වෙනස් වකවානුවක වුව ද, සිවරාම්ගේ වර්ධනයන් සහ කාර්ය සාධකතාව වූ කලී එපරිද්දෙන්ම නැගී ගත් දෙමළ ජනයාගේ සාමූහික ආත්ම විශ්වාසයේ බුද්ධිමය ප‍්‍රකාශනයක් විය.

ජනතා විමුක්ති පෙරමුණ දයාන් ජයතිලකටත් වඩා පියවරක් ඉදිරියට ගොස් ඇති බව පෙනෙන්නට තිබේ. මැයි 03 වෙනිදා ශී‍්‍ර ලංකා රජයේ ‘ලක්හඬ’ ගුන් විදුලියේ සාකච්ඡාවකට එක්වෙමින් ජවිපෙ නොනිල ප‍්‍රකාශනය වූ ලංකා පුවත්පතේ කර්තෘ මාණ්ඩලිකයෙකු තදබල ලෙස තර්ක කරමින් කියා සිටියේ සිවරාම් මරාදමනු ලැබුවේ එල්.ටී.ටී.ඊ. සංවිධානය විසින් බව ය! සිවරාම් ඝාතනයට සතියකට හෝ දෙකකට පෙරාතුව ‘සිවරාම් යනු කොටියෙක්’ යැයි කියමින් විසකුරු ප‍්‍රචාරයක් ගෙනගිය ප‍්‍රකාශනයක් හා සංවිධානයක් විසින් මෙවැනි තර්කයක් ගොඩනැගීම බැලූ බැල්මට උත්ප‍්‍රාසජනක විය හැකි ය. නමුත් ඊට වැඩිමනත් දෙයක් ද තිබේ. ජවිපෙ තර්කය වී ඇත්තේ මරණයට මෑත දී, සිවරාම් ජවිපෙ හා සහානුභූතී වෙමින් ලියන ලද ලිපිය, එල්.ටී.ටී.ඊ.ය පිළිවෙත් පිළිබඳ ඔහුගේ විවේචනාත්මක ආස්ථානය හඟවන බවත්,  ඒ නිසා කොටින් විසින් සිවරාම් ඝාතනය කළ බවත් ය. ලාංකීය මාධ්‍යයන්ට යථාර්ථය කෙතරම් පහසුවෙන් විකෘති කළ හැකිද යන්න පිළිබඳ දැනුවත් අයෙකු වශයෙන් මෙම තර්කය සමඟ ගණුදෙනු බේරාගැනීමට මම බැඳී සිටිමි.

ජවිපෙ සහ අසීමිත ශුභවාදය

සිවරාම්ගේ චරිතයේ වූ සුවිශේෂි ලක්‍ෂණයක් වූයේ ඔහු සතුවූ විවෘතභාවයයි. ඕනෑම අයෙකුට ඔහුට ළඟාවිය හැකිව තිබූ අතර  ඕනෑම අයෙකුගේ අදහස්වලට ඔහු විවෘතව සිටියේය. ඔහු මුළුමණින්ම කට්ටිවාදයෙන් තොරවූවෙක් විය. ඔහු සීමාරහිත ශුභවාදියෙක් වූ අතර සිංහල සහ දෙමළ ජනයා එක්සත් කළ හැකි මාවත් පිළිබඳව සීමාරහිත ගවේෂකයෙකු විය. ඉන්දීය සාම සාධක හමුදාව උතුරු සහ නැගෙනහිර කඳවුරු බැඳ සිටි සමයේ දෙමළ ජාතික ව්‍යාපාරය හා ජවිපෙ එක්සත් කළ හැකි බවට සිවරාම් විශ්වාස කළ බව මම දනිමි. සිංහල සහ දෙමළ ජනයාගෙන් සැළකිය යුතු තරම් බහුතරයක් මෙන්ම ශී‍්‍ර ලංකා ආණ්ඩුවම පවා ඉන්දීය හමුදාවන් රැඳී සිටීමට විරෝධය දැක්වූ තත්ත්වයක් යටතේ මූලධාර්මික සමගියක් සඳහා පදනමක් එහි පැවතිණ. දීර්ඝකාලීනව මුල් ඇදුණු දෙමළ විරෝධී ජාතිවාදයේ රැහැන් බිඳ දැමීමට තරම් බලවත් ශක්‍යතාවක් ඒ තුළ පෙනෙන්නට තිබිණ. සිවරාම්ගෙන් මුළුමණින්ම ස්වාධීනව වුවද මම පවා පෞද්ගලිකව මෙය පිළිගත් අතර ජවිපෙ සාමාජිකයන් වශයෙන් කි‍්‍රයා කළ සිංහල පීඩිත ජනයා කෙරෙහි අව්‍යාජ කැපවීමක් සහිත සුවිශේෂී ශිෂ්‍ය නායකයන් කිහිප දෙනෙක් සමඟ සමීපව කටයුතු කිරීම විසින් මගේ විශ්වාසය වඩ වඩාත් ප්‍රත්‍යක්‍ෂ වුණි. රාජ්‍ය හමුදාවන් විසින් දස දස් සංඛ්‍යාත ස්වකීය සාමාජිකයන් සමූල ඝාතනය කරනු දැක දැකත් මෙකී ශිෂ්‍යයන් විසින් අඛණ්ඩව අරගලයේ නිරත වෙමින් පෙන්නුම් කළා වූ විරෝධාරත්වය සැබැවින්ම ආවේශී එකකි. තීව‍්‍ර වූ සන්නද්ධ අරගලයත්, තම ජීවිතවලට එල්ල වූ අවදානමත්, විප්ලවකාරී වටපිටාවත් මෙකී ජවිපෙ අනුගාමිකයින්ගේ මනස් විවෘත කරනු ලැබ තිබූ අතර දෙමළ ජනතාව සමඟ වන සම්බන්‍ධතාවයේ සිට සෙසු සියල්ල පිළිබඳ නව විප්ලවකාරී ආකාරයකින් සිතීමට බලකරන තත්ත්වයන් ඔවුන් හමුවේ නිර්මාණය වී තිබුණි. මිනීමරු හමුදාවන්ගෙන් සැඟවී එක්ව ගතකළ සමයේ මා සහ ඔවුන් අතර මේ පිළිබඳ ගැඹුරු සහ විනිවිදින සාකච්ඡා බොහෝ ඇති විය.

මගේ සමීපතම සහෝදරයා වූ මානව හිමිකම් සුරැකීමේ ශිෂ්‍ය සංවිධානයේ නායක ගැමුණු යසස් හෙවත් ගයාන්‍, රෝහණ විජේවීර විසින් ලියන ලද ලංකාවේ ජාතික ප‍්‍රශ්නය පිළිබඳ කෘතිය ඉංගී‍්‍රසි බසට පරිවර්තනය කිරීමට කටයුතු සැළසුම් කරමින් සිටි අතර මටත්, වෙනත් කිහිප දෙනෙකුටත් එහි අඩංගු තර්කයන්ට ප‍්‍රතිචාර දැක්වීමට අවකාශ සැළසීමද එහි එක් අරමුණක් විය. (ලැජ්ජාවට හේතුවන කරුණක් වුවද, දීර්ඝ කාලාන්තරයක් ලංකාවෙන් බැහැරව ජීවත්වීමේ ප‍්‍රතිඵලයක් වශයෙන් ඉහත කෘතියේ අඩංගු සංකීර්ණ තර්කනයන් සිංහල බසින් කියවා වටහා ගැනීමට අපොහොසත් වීමේ ගැටළුවෙන් මම පෙළුණි.) මෙකී කෘතියට ඉංගී‍්‍රසියෙන් කියවා විධිමත්ව ඊට පිළිතුරු දීමට සූදානම්ව සිටි තවත් අයෙකු වූයේ සිවරාම් බව මම දැන් දනිමි. දකුණේ අරගලයේ වැඩිවන අවදානම සහ අරගලකාරී උණුසුම තුළ ජනතා විමුක්ති පෙරමුණේ නායකත්වය පසුගාමී හා ප‍්‍රාදේශීයවාදී සිංහල ජාතිවාදී මාවතින් ගළවා ජාතීන්ගේ ප‍්‍රශ්නය පිළිබඳ ලෙනින්ගේ මූලධාර්මික ආස්ථානය මත පිහිටුවාලිය හැකිවනු ඇතැයි මම සැබැවින්ම විශ්වාස කළෙමි. සිවරාම් ද එකී සුබවාදී විශ්වාසයේ කොටස්කරුවෙක් වූ බව මට ඒකාන්ත වශයෙන්ම විශ්වාස ය. දෙමළ ජාතික විමුක්ති අරගලයට මවිසින් දක්වන ප‍්‍රතිපත්ති මූලික සහාය ජවිපෙ පිළිබඳ මා දැරූ එම ස්ථාවරය විසින් අංශුවකුදු වෙනස් නොකරන ලද අතර සිවරාම්ගේ තත්ත්වය ද එයම විය.

සිංහලයන් පිළිබඳ අපේක්‍ෂාව

සුනාමිය සමඟ බාහිර බලවේග සහ රාජ්‍ය නොවන සංවිධාන වේගයෙන් රට තුළ කාවදින තත්ත්වයක් හමුවේ ස්වෛරීභාවය ආරක්‍ෂා කරගැනීමට සමත් ශක්‍යතා සහිත බලවේගයන් සිංහල සමාජය තුළින් ද සොයාගැනීමේ උනන්දුවක් සිවරාම්ට තිබූ බව මම විශ්වාස කරමි. කවර හෝ ආකාරයක ‘බටහිර ආධාර’ පිටුපසින් වන පෙළඹුම් හේතු පිළිබඳ සිවරාම් හැමවිටම සැක කළේය. ජනවාරියේදී කොන්ඩොලීසා රයිස් විසින් ප‍්‍රකාශ කරන ලද්දේ ‘සුනාමිය වූ කලී අපහට විශේෂිත ප‍්‍රතිලාභ උපයා දුන් විශ්මයජනක අවස්ථාවක්’ බවයි. මෙකී ප‍්‍රකාශය බුෂ් පරිපාලනයේ කාලෝස් පැස්කුවල්ගේ ’’ජාතියක සමාජ වියමන වෙනස් කිරීමේ’’ පෙර සැළැස්ම සමඟ මනා ලෙස ගැලපේ. ඔවුන්ගේ සැළැස්ම වන්නේ පැරණි රාජ්‍යයන් යළි ගොඩනැංවීම නොව, ‘ප‍්‍රජාතාන්ති‍්‍රක සහ වෙළඳ පොළ කේන්‍ද්‍රීය රාජ්‍යයන්’ නිර්මාණය කිරීමයි. සුනාමී විනාශය හේතුවෙන් දැවැන්ත මානුෂික ප‍්‍රතිචාරයන් වේගයෙන් ලොව දස අතින් ළඟා වූ බව ඇත්තකි. නමුත් ප‍්‍රශ්නය වූයේ සුනාමියෙන් පහර කෑ ජනතාවන් හා ඔවුනට උපකාර කිරීමේ අවශ්‍යතාවෙන් පෙළුණු ප‍්‍රජාවන් වශයෙන් වන සරල බෙදීමකින් ඔබ්බට ගිය යථාර්ථයන් ඒ තුළ පැවතීමයි. මේ අතර මැද තවත් බොහෝ දේ තිබිණ. එහි ප‍්‍රතිඵලයක් වූයේ මෙකී සමස්ත මානුෂික ප‍්‍රතිචාරයන්ම කළමනාකරණය කරන්නා වූ මෙහෙයුම් පිටුපස වූ ගාමක බලය, බටහිර රාජ්‍යයන්ගේ අභිලාෂයන් වීමයි.

සිංහලයන් මෙකී සැළසුම්වලට එරෙහිව ස්වකීය ස්වෛරීභාවය වෙනුවෙන් සටන් කරනු දැකීම සිවරාම්ගේ අවශ්‍යතාව වූ බව නිසැක වූ අතර දශක කිහිපයකට පෙරාතුව කෙන්යානු ලේඛක න්ගුයෙන් වා තියෙන්ගෝ කී පරිදි ඔහුට අවශ්‍ය වූයේ ජනයා එක්සත්ව හඬ නගනු දැකීමයි. තියෙන්ගෝ මෙසේ ලීවේය:

‘‘ඔබගේ සියළුම ප‍්‍රයෝගයන් සඟවා ගත් සළුපිළි පිළිබඳ සියළු රහස් දැන් අපි දන්නෙමු. ඔබම ඝාතනයන් සිදුකොට, අනතුරුව ශෝකයේ සළු හැඳ එහි ගොස් අනාථයින්ගේ හා වැන්දඹුවන්ගේ නෙත කඳුළු පිසියි. මැදියමේදී ඔබ ජනයාගේ ආහාර ගබඩා බිඳ ආහාර කොල්ල කා, අරුණෝදයේ දී ඔබේ පුණ්‍යවන්තභාවයේ සළු හැඳ එම ජනයා අතරට ගොස් රාති‍්‍රයේදී කොල්ල කා ගත් ධාන්‍ය ලබු කැට පුරවා ඒ ජනයා අතරෙහිම බෙදයි. ඔබ හුදෙක් ඔබගේම  ආශා පිනවාගැනීම සඳහා කාමුකත්වයට අනුබල දී අනතුරුව ධාර්මිකභාවයේ සළු හැඳ ජනයා අතරට ගොස් පශ්චාත්තාප වන ලෙසත්, පාරිශුද්ධත්වයේ මාවත් පෙන්වා දීම සඳහා ඔබ පසුපස එන ලෙසත් දන්වයි. ඔබ මිනිසුන්ගේ ධනය පැහැරගෙන, අනතුරුව මිත‍්‍රත්වයේ ලෝගු හැඳ කොල්ලකෑමෙහි යෙදුණ දුෂ්ඨයන් ලූහුබැඳ යන මෙන් ජනයාට උපදෙස් සපයයි.’’

සිවරාම් සහ වෙනම රාජ්‍යය

ඉන්දීය හමුදා දිවයිනට පැමිණි ‘80 දශකයේ පසු භාගයේදී මෙන්ම, ඔහුගේ මරණයට පෙර ද සිවරාම් ජවිපෙ තුළ යම් යහපතක් දකින්නට වෑයම් කළේය. නමුත් සිවරාම් පිළිබඳ මතකයට ගර්හා කරන්නට ජවිපෙ විසින් යොදාගනු ලැබ ඇත්තේ ද සිවරාම් තුළ බලපැවැති මෙකී යහපත් සුබවාදී අපේක්‍ෂාවයි.

2003 ඔක්තෝබරයේදී හිරු කණ්ඩායම විසින් කොළඹ දී සංවිධානය කළ සිංහල – දෙමළ සංස්කෘතික සමුළුවේ කතා කළ සිවරාම්ගෙන් කෙනෙක් අසන ලද්දේ, ඔහුට එතරම් ජීවිත අනතුරක් ඇති කොළඹ නගරයේම ජීවත්වන්නේ මන්දැයි කියා ය. වෙඩි ප්‍රහාරයකට ලක්ව ඝාතනය වීමේ ඉරණමට ගොදුරු නොවී දෙමළ මාධ්‍යවේදියෙකුට කොළඹ සිට ක්‍රියා කළ නොහැකි නම්, දෙමළ ජනයාගේ වෙනම රාජ්‍යයක් සඳහා වූ අවසාන කොන්දේසිය ද සැපිරෙන බව සිවරාම් කීවේය.   ජීවිතය කෙරෙහි එල්ල වූ බරපතල අවදානම මැද පවා කොළඹ ජීවත්වීමට තරම් එඩිතරවීම ඔස්සේ සිවරාම් සිය  ජීවිතය තුළින් ප‍්‍රකාශයට පත් කිරීමට උත්සාහ කරන ලද්දේ සිංහල සහ දෙමළ ජනයා අතර සහයෝගීතාව සඳහා තවදුරටත් ඇති අවකාශයයි. ඔහුගේ ඝාතකයින් විසින් මෙය කළ නොහැක්කක් බවට පෙරළා ඇත්තේද?

මෙම ප‍්‍රශ්නයට පිළිතුරක් සපයා දෙනු ඇත්තේ අපගේ කි‍්‍රයාකාරීත්වයන් විසිනි. (2005.05.04)

විරාජ් මෙන්ඩිස්

© JDS

 

#Gota Go Home 2022 ජනඅරගලයට ජනමාධ්‍යවේදීන්ගේ සහාය! පාගමන අප්‍රේල් 20 පස්වරු 3.00 කොටුව දුම්රිය පොළ අසළින්.

# Gota Go Home, ජනඅරගලයට සහය පළකරමින් අරගලයට සම්බන්ධවීම පිණිස ජනමාධ්‍යවේදීන්   කොටුව දුම්රිය පොළ අසළින් පාගමනක් සංවිධානය කොට ඇත.
එම පාගමන අප්‍රේල් 20 පස්වරු 3.00 කොටුව දුම්රිය පොළ අසළින් පිටත්වීමට නියමිත අතර රටපුරා විසිරී සිටින මාධ්‍යවේදීන් මෙම පාගමනට සම්බන්ධවීමට නියමාත ය. පාගමන සම්බන්ධයෙන් මාධ්‍ය සේවක වෘත්තීය සමිති සම්මේලනය නිකුත් කළ මාධ්‍ය නිවේදනය සම්පූර්ණයෙන් පහත පළවේ.

 

මාධ්‍ය නිවේදනය

 2022 අප්‍රේල් 18

#Gota Go Home 2022 ජනඅරගලයට ජනමාධ්‍යවේදීන්ගේ සහාය!

පාගමන අප්‍රේල් 20 පස්වරු 3.00 කොටුව දුම්රිය පොළ අසළින්.

ගෝඨාභය රාජපක්ෂ ආණ්ඩුවේ ජනපීඩනය දරාගත නොහැකිව සවයංසිද්ධව ආරම්භ වූ ජනඅරගලයට දින 10 ඉක්මවමින් තිබේ. සකල විධ භේදයන්ගෙන් තොරව ආරම්භ වූ රජයට එරෙහි අරගලය, රටේ ජනතාවට බලය පවරන ලෙසට බලකරමින් රටපුරා විහිදුනු වර්‍ධනය වෙන ජනඅරගලයක් බවට පත්වෙමින් තිබේ.

මේ ජනඅරගලයට, ලංකාවේ සියළු ජනමාධ්‍යවේදීන් කිසිදු සංවිධානම ය, වෘත්තීම ය, භාෂාම ය භේදයකින් තොරව පූර්‍ණ සහය පලකිරිීමට තීරණයකර තිබේ. ඒ වෙනුවෙන් ලංකාව පුරා විසිරී සිටින ජනමාධ්‍යවේදීන් සංවිධානය කරනු සහයෝගිතා පාගමන අප්‍රේල් 20 වෙනි දින පස්වරු 3.00 කොටුව දුම්රිය පොළ අසලින් ආරම්භ වේ.

ගාළුමුවදොර ජනඅරගල විරෝධතාවට සහාය පළකෙරෙන මෙම පාගමනට සංවිධානමය හෝ වෘත්තීම ය, භාෂාම ය භේදයකින් තොරව සහභාගීවෙන ලෙස මාධ්‍ය සේවක වෘත්තීය සමිති සම්මේලනය දිවයින පුරා විසිරී සේවය කරන මාධ්‍යවේදීන්ගෙන් සහෝදරත්වයෙන් ඉල්ලා සිටී.

රටේ ම ජනතාව විසින් ජනපීඩාකාරී රජයට එරෙහිව සංවිධානයකර ඇති ජනඅරගල සහයෝගිතා පාගමනට සහභාගීවීමට මාධ්‍ය ආයතන ප්‍රධානීන්ට ද ගෞරවයෙන් ආරාධනයකර සිටී. එසේම සිය මාධ්‍ය ආයතන තුළ සේවය කරන සියළු මාධ්‍යවේදීන්, මාධ්‍යවේදිනියන්හට මේ පාගමන සඳහා සහභාගීවීමට අවසර ලබාදෙමින්, ඔවුන් එදින පස්වරුවේ සේවයෙන් මුදාහැරීමට කටයුතු කරන ලෙස ද මාධ්‍ය සේවක වෘත්තීය සමිති සම්මේලනය මාධ්‍ය ආයතන ප්‍රධානීන්ගෙන් කාරුණිකව ඉල්ලා සිටී.    

විශ්වාසී,

ධර්‍මසිරි ලංකාපේලි

ප්‍රධාන ලේකම්

 

ආණ්ඩුව හැර සෙසු පක්ෂවලට “තරුණ ජනමාධ්‍යවේදීන්ගෙන් ” කරුණු 10ක ලිපියක්

වර්තමානයේ ඇතිවී තිබෙන තත්ත්වය සම්බන්ධයෙන් ශ්‍රී ලංකා තරුණ ජනමාධ්‍යවේදීන්ගේ සංගමය පාර්ලිමේන්තුවේ කෙලින්ම ආණ්ඩුව නියෝජනය කරන පක්ෂ හැර සෙසු පක්ෂ නායකයන්ට සහ මන්ත්‍රීවරුන්ට ලිපියක් යොමු කර තිබේ.
එම සම්පූර්ණ ලිපිය පහත පළවේ.

සජිත් ප්‍රේමදාස මහතා, නායක, සමගි ජන බලවේගය.

ආර් සම්පන්දන් මහතා, නායක, ඉලංකෙයි තමිල් අරුසුකච්චි,

අනුර කුමාර දිසානායක මහතා, නායක, ජාතික ජන බලවේගය.

රිෂාඩ් බදියුදීන් මහතා, නායක, සමස්ත ලංකා මහජන කොංග්‍රසය.

රාහුෆ් හකීම් මහතා, නායක, ශ්‍රි ලංකා මුස්ලිම් කොංග්‍රසය.

ගජේන්ද්‍ර කුමාර් පොන්නම්බලම් මහතා, නායක, අකිල ඉලංකෙයි තමිල් කොංග්‍රස්

සී වී විග්නේෂ්වරන් මහතා, නායක, තමිල් මක්කල් තේසිය කූට්ටනි

සෙල්වම් අඩෛක්කලනාදන් මහතා, නායක, ටෙලෝ

ධර්මලිංගම් සිද්ධාර්තන් මහතා, නායක, ප්ලොට්

ඒ එල් එම් අතාවුල්ලා මහතා, නායක, ජාතික කොංග්‍රසය

මනෝ ගනේෂන් මහතා, නායක,ප්‍රජාතන්ත්‍රවාදී ජනතා පෙරමුණ

රනිල් වික්‍රමසිංහ මහතා, නායක, එක්සත් ජාතික පක්ෂය

මෛත්‍රිපාල සිරිසේන, සභාපති, ශ්‍රි ලංකා නිදහස් පක්ෂය

ආණ්ඩුව නියෝජනය නොකරන සියලුම පක්ෂ නායකවරුනි, මන්ත්රීවරුනි,

කඩිනමින් පාර්ලිමේන්තුව කැඳවීම සහ ගෝඨාභය රාජපක්ෂ මහතාට ජනාධිපති ධුරයෙන් ඉල්ලා අස්වන ලෙස බලපෑම් කිරීම සම්බන්ධවයි!

ගෝඨාභය රාජපක්ෂ මහතාට ජනාධිපති ධුරයෙන් ඉවත් වන ලෙස බලකරමින් සහ වර්තමාන ආණ්ඩුවට ඉවත්වන ලෙස බල කරමින් කෙරෙන ජනතා අරගලය අධෛර්යමත් කිරීම සඳහා ආණ්ඩුව විසින් විවිධ මර්දනකාරී ක්‍රියාකාරකම් සිදු කරන අයුරු පසුගිය සති දෙක තුළ දක්නට ලැබිණි.

එවැනි මර්දනාකාරී වටපිටාවක් රටේ ක්‍රියාත්මක වෙද්දී, මහජනතාව නියෝජනය කරමින් පාර්ලිමේන්තුවට තේරී පත්වූ දේශපාලන පක්ෂවල ක්‍රියාකාරිත්වය ගැන සතුටුදායක මට්ටමක් මහජනතාව තුළ මෙන්ම අප තුළද නැත. මහජන අරගලයේ ප්‍රධාන සටන් පාඨය ජනාධිපතිවරයාට ඉල්ලා අස්වන ලෙස බලකිරීම වන අතර ජනාධිපතිවරයාගේ මෙන්ම රාජපක්ෂවරුන්ගේ බලය ද පාර්ලිමේන්තුව තුළ අක්‍රීය කිරීමට ඔබ පක්ෂවලට හැකියාව තිබියදී ඒ සඳහා උද්යෝගයෙන් සහ සක්‍රීයව කටයුතු කරන බවක් පෙනෙන්නට නැත.

විශේෂයෙන් ජනාධිපතිවරයාට එරෙහිව දෝෂාභියෝගකට අත්සන් ගැනීමේ කාර්යය ඔබ ආරම්භ කළ යුතුව තිබුණේ ජන අරගලය ආරම්භ කළ දිනවලදීම වුවද පාර්ලිමේන්තුවේ පසුගිය සතියේ විවාද අවසන්වනතුරුත් ඔබට එය සිදු කිරීමට නොහැකි විය. ඇතැම් පක්ෂ නායකයන් දෝෂාභියෝගයකට සහාය නොදක්වන බව මේ වන විටත් ප්‍රකාශ කර තිබේ.

ලසන්ත වික්‍රමතුංග ඝාතනය, කීත් නොයාර් පැහැරගෙන යාම, එක්නැලිගොඩ අතුරුදන් කිරීම සහ පෝද්දල ජයන්තට පහරදීම ඇතුළු ජනමාධ්‍යවේදීන්ට සම්බන්ධ සිදුවීම් රැසකට ගෝඨාභය රාජපක්ෂ ඇතුළු රාජපක්ෂවරුන්ට චෝදනා එල්ල වූ බව ඔබ සියලු දෙනාම හොඳාකාරව දන්නවා ඇතැයි අපි සිතමු. ඒ හේතුව සහ වෙනත් හේතු ගණනාවක් නිසා ශ්‍රී ලංකා තරුණ ජනමාධ්‍යවේදීන්ගේ මංගමය ලෙස අපගේ ස්ථාවරය ද මේ මොහොතේ ජනාධිපතිවරයා ධුරයෙන් ඉල්ලා අස්විය යුතු බවයි. රාජපක්ෂවරුන් ද තනතුරුවලින් ඉවත් කළ යුතු බව අපගේ ස්ථාවරයයි. ඔවුන් බලයේ සිටියහොත් ජනමාධ්‍යවේදීන්ට එරෙහිව සිදුවූ අපරාධවලටද යුක්තියක් බලාපොරොත්තු විය නොහැකි අතර යුක්තිය ඉෂ්ඨ වීම නතර කිරීමට කුමන්ත්‍රණකාරී වැඩ සිදු කිරීමට බොහෝ දුරට ඉඩ ඇත. එවැනි කුමන්ත්‍රණකාරී වැඩ ගැන ලසන්ත වික්‍රමතුංග විමර්ශනවලදී මෙන්ම වසීම් තාජුදීන් ඝාතන විමර්ශනවලදී ද අනාවරණය විය.

රටේ සෑම ප්‍රදේශයකින්ම ගෝඨාභය රාජපක්ෂ ජනාධිපතිවරයාට ඉල්ලා අස්වන ලෙස බලපෑම් කරද්දී වෙනත් දේශපාලන පක්ෂවල කටයුතු ගැන ද මේ වන විට ජනතාව ප්‍රශ්න කරන තැනට තල්ලු වී තිබේ.

එසේ හෙයින් මේ මොහොතේ වහාම මැදිහත්වී පහත ක්‍රියාමාර්ග ගන්නා ලෙස කාරුණිකව ඉල්ලා සිටිමු.
  1. මිරිහානේ පැවැති විරෝධතාවයේ දී ව්‍යාජ චෝදනා මත අත්අඩංගුවට ගත් පිරිස් වහාම මුදා හැරීමට අවශ්‍ය බලපෑම් කිරීම සහ මිරිහානේ උද්ඝෝෂණයේදී ජනතාවට පහර දුන් පිරිස් වහාම අත්අඩංගුවට ගැනීමට බලපෑම් කිරීම,
  2. විරෝධතා මර්දනය කිරීමට ගන්නා උත්සාහයන් පරාජය කිරීමට අවශ්‍ය බලපෑම් කිරීම,
  3. අරගලකරුවන්ට සහාය දක්වමින් සහ ආණ්ඩුවේ මර්දනකාරී ක්‍රියාකාරිත්වයට විරෝධය පළකරමින් රට පුරා විරෝධතා නොනවතින මාලාවක් සියලුම පක්ෂවල එකමුතුවෙන් හෝ වෙන් වශයෙන් හෝ සිදු කිරීම,
  4. ජනාධිපතිවරයාට ඉල්ලා අස්වන ලෙස කෙරන උද්ඝෝෂණ මාලාව විශේෂ තත්ත්වයක් සේ සලකා වහාම හෙටම (14) පාර්ලිමේන්තුව කැඳවන ලෙස කතානායකවරයාගෙන් ඉල්ලීමක් කිරීම,
  5. පාර්ලිමේන්තුව ඇතුළේ අග්‍රාමාත්‍යවරයාට එරෙහිව විශ්වාස භංග යෝජනාවක් ගෙන ඒම සහ ජනාධිපතිවරයාට එරෙහිව දෝෂාභිගෝයක් ගෙන ඒම,
  6. 20 වැනි ආණ්ඩුක්‍රම ව්‍යවස්ථා සංශෝධනය අහෝසි කරමින් පාර්ලිමේන්තුවේ යෝජනාවක් සම්මත කර ගැනීම,
  7. කඩිනමින් විධායක ජනාධිපති ධුරය අහෝසි කරමින් හෝ විධායක ජනාධිපතිගේ අත්තනෝමතික බලතල අහෝසි කෙරෙන 21 වැනි ආණ්ඩුක්‍රම ව්‍යවස්ථා සංශෝධනයක් ඉදිරිපත් කර සම්මත කර ගැනීම,
  8. නිශ්චිත කාලයක් ඇතුළත අලුත් ආණ්ඩුක්‍රම ව්‍යවස්ථාවක් ගෙන ඒම,
  9. රාජපක්ෂවරුන් කළ අපරාධවලට නීතිය ක්‍රියාත්මක කරන ලෙස බලපෑම් කිරීම,
  10. ජනතාව ස්වාධීනව කරන අරගලයේ හිමිකාරිත්වය කිසිම පක්ෂයකින් නොගැනීම,

මෙම යෝජනා ශ්‍රී ලංකා පොදුජන පෙරමුණ හැර සියලුම දේශපාලන පක්ෂවලට ඉදිරිපත් කරන අතර මේවා කඩිනමින් ක්‍රියාත්මක කරන ලෙස බල කර සිටිමු. මෙය ශ්‍රී ලංකා පොදුජන පෙරමුණට ඉදිරිපත් නොකරන්නේ එම පක්ෂයේ ප්‍රධානීන් දිගින් දිගටම අරගලය මර්දනය කිරීමට සහාය දක්වන බැවින් සහ රාජපක්ෂවරුන් ආරක්ෂා කිරීමට මැදිහත්වන බැවිනි.

ස්තුතියි.

මෙයට,

විශ්වාසී,

“ශ්‍රී ලංකා තරුණ ජනමාධ්‍යවේදීන්ගේ සංගමය”

 

මිරිහාන සාමකාමී උද්ඝෝෂණයට හා වාර්‍තා කළ මාධ්‍යවේදීන්ට එල්ල කළ ම්ලේච්ච ප්‍රහාරයේ වගකීම රජය භාරගත යුතුයි. – FMETU

තමන් මිරිකෙමිිින් සිටින ජීවනබර අඩුකර සහන සළසන ලෙස ඉල්ලා, නුගේගොඩ, මිරිහාන ප්‍රදේශයේ පැවති සාමකාමී උද්ඝෙෂණයට පොලීසිය හා ආරක්ෂා හමුදා විසින් එල්ල කළ මිලේච්ඡ ප්‍රහාරය හෙළා දකිමින් මාධ්‍ය සේවක වෘත්තීය සමිති සම්මේලනය ප්‍රවෘත්ති නිවේදනයක් නිකුත්කර තිබේ.

එම මාධ්‍ය නිවේදනය සමිපූර්ණයෙන් පහත පළවේ.               

මාධ්‍ය නිවේදනය, 2022 අප්‍රේල් 02

මිරිහාන සාමකාමී උද්ඝෝෂණයට හා වාර්‍තා කළ මාධ්‍යවේදීන්ට එල්ල කළ ම්ලේච්ච ප්‍රහාරයේ වගකීම රජය භාරගත යුතුයි.

තමන් වෙත එල්ලවෙමින් තිබෙන දැරිය නොහැකි ආර් ථික පීඩනය  හමුවේ සහන ඉල්ලා රජයට බලපෑම් කරමින්, නිහඞ විරෝධතාවයක නියැලුනු, නුගේගොඩ, මිරිහාන ජනතාව වෙත හා උද්ඝෝෂණය වාර්‍තා කිරීමට ගිය මාධ්‍යවේදීන් පිරිසකට පොලීසිය හා ආරක්ෂක හමුදා විසින් එල්ල කරනු ලැබූ ම්ලේච්ච, නිවට, බියගුලු ප්‍රහාරය මාධ්‍ය සේවක වෘත්තී‍ය සමිති සම්මේලනය, ජනමාධ්‍යවේදීන්ගේ ජාත්‍යන්තර සම්මේලනය සමග එකතුවෙමින් දැඩිව හෙළා දකී. ජනමාධ්‍යවේදීන්ගේ ජාත්‍යන්තර සම්මේලනය රටවල් 146 ක, මාධ්‍ය සංවිධාන 167න් සමන්විත, ලක්ෂ හයකට අධික ජනමාධ්‍යවේදීන් පිරිසක්  සාමාජිකත්වය උසුලන ලෝකයේ ප්‍රබල ම මාධ්‍ය සංවිධානය වේ.

මේ අතර මේ අතර ජනාධිපති මාධ්‍ය අංශයේ යැයි කියාගත් පිරිසක් ජනමාධ්‍යවේදීන්ට වහාම වාර්‍තාකරණයෙන් ඉවත්වෙන ලෙසට තර්‍ජනයකර ඇති අතර “අප උඹ ගැන පස්සේ බලාන්නම්” යනුවෙන් මාධ්‍යවේදී තරිඳු ජයවර්ධන ජ්‍යෙෂ්ඨ මාධ්‍යවේදියා බියගන්වා තිබේ. ඔහු මේ පිළිබඳව මිරිහාන පොලීසිය වෙත පැමිණිල්ලක් ද සිදුකර තිබේ.

පොලීසියේ හා ආරක්ෂක හමුදා පිරිස්, පහරදී වධහිංසාවන්ට ලක් කිරීම් සිදු කරමින් අත්අඩංගුවට ගනු ලැබූ මාධ්‍යවේදීන් අතර, සිදුවීම මුළුමණින්ම සජීවීව වාර්‍තා කළ සිරස මාධ්‍යවේදී අවංක කුමාර, චතුර දේශාන්, දෙරණ මාධ්‍ය ආයතනය නියෝජනය කළ සුමේධ සංජීව ගාල්ලගේ, ප්‍රදීප් වික්‍රමසිංහ, නිශ්සංක වේරපිටිය හා ලංකාදීප මාධ්‍යවේදී වරුණ වන්නිආරච්චි ද විය. බරපතල ලෙස තුවාල ලැබූ මාධ්‍යවේදීන්ට අවශ්‍ය මූලික ප්‍රතිකාර සඳහා නිසි ලෙස රෝහල්ගත කිරීමක් හෝ සිදුකිරීමට පොලීසිය කාරුණික නොවීය.

රජයේ ප්‍රවෘත්ති අධ්‍යක්ෂකවරයා විසින් නිකුත් කරන මාධ්‍ය හැඳුනුම්පත ඉදිරිපත් කළ ද, ඒ පිළිබඳව නොසළකා හරිමින් එල්ල කළ මෙම  බියගුලු ප්‍රහාරය ජනමාධ්‍යවේදීන්ගේ මාධ්‍ය වාර්‍තාකරණය වළක්වාලීමේ අරමුණින් යුතුව සිදුකළ මිලේච්ඡ ක්‍රියාවක් බවට සැකයක් නැත. මෙවැනි ප්‍රහාරයක් එල්ල කිරීම පිළිඳව රජය සම්පූර්‍ණයෙන් වගකීම භාරගතයතු බව  මාධ්‍ය සේවක වෘත්තීය සමිති සම්මේලනය අවධාරණයකර සිටී.

එබැවින් මෙම ප්‍රහාරය පිළිබඳව පුළුල් කඩිනම් පරීක්ෂණයක් සිදුකර, මාධ්‍යවේදීන්ට හා සාමකාමී ජනතාවට එල්ල කළ ප්‍රහාරය පිළිබඳව නිසි පරීක්ෂණයක් පවත්වා ජනතාව වෙත තොරතුරු ලබාදීමට මාධ්‍යවේදීන්ට ඇති ශුද්ධ අයිතිය ආරක්ෂා කරන ලෙසත් ජනාතාවගේ අදහස් ප්‍රකාශ කිරීමේ අයිතියට බාධා නොකරන ලෙසත්   මාධ්‍ය සේවක වෘත්තීය සමිති සම්මේලනය රජය ප්‍රමුඛ බලධරයන්ගේන් දැඩිව ඉල්ලා සිටී.        

විශ්වාසී

                                       

ධර්‍මසිරි ලංකාපේලි, ප්‍රධාන ලේකම්, 077 364  1111

ඔබට ගැටළු තිබේද?
අපව අමතන්න,
නැත්නම් පැමිණෙන්න.

+[94] 773 641 111

අංක 30,
අමරසේකර මාවත,
කොළඹ 05.
ශ්‍රී ලංකාව.

info@fmetu.org

Newsletter

Get latest news & update

© 2021 – FMETU. All rights reserved.

Carefully crafted by Cyber Ceylon